நடப்பு ஐபிஎல் 2026 தொடரில் சன்ரைசர்ஸ் ஹைதராபாத் அணிக்கு எதிராக நடைபெற்ற போட்டியில் மும்பை இந்தியன்ஸ் அணி 6 விக்கெட் வித்தியாசத்தில் படுதோல்வி அடைந்தது.
சொந்த மைதானமான வான்கடேயில் இந்த தோல்வியைத் தழுவியது மும்பை ரசிகர்களிடையே பெரும் ஏமாற்றத்தை ஏற்படுத்தியது.
குறிப்பாக, ஆட்டத்தின் போது மும்பை அணியின் கேப்டன் ஹர்திக் பாண்டியாவின் உடல்மொழி அவர் எவ்வளவு அழுத்தத்தில் இருக்கிறார் என்பதை வெளிச்சம் போட்டு காட்டியது.
ஹைதராபாத் அணி வீரர்கள் அதிரடியாக விளையாடி வெற்றியை நோக்கி நகர்ந்த போது, விரக்தியின் உச்சத்திற்கு சென்ற பாண்டியா, தனது பந்துவீச்சு முனைக்குத் திரும்பும் போது ஸ்டம்புகளை எட்டி உதைக்கச் சென்றது போன்ற காட்சிகள் கேமராவில் பதிவாகி சமூக வலைதளங்களில் காட்டுத்தீயாய் பரவி வருகிறது.
இந்த சீசனில் மும்பை இந்தியன்ஸ் அணி பேட்டிங் மற்றும் பந்துவீச்சு என இரண்டிலும் தடுமாறி வருவது இந்த போட்டியிலும் அப்பட்டமாகத் தெரிந்தது. ஐந்து முறை சாம்பியன் பட்டம் வென்ற ஒரு அணி, தனது கோட்டையிலேயே ரன்களைக் கட்டுப்படுத்த முடியாமல் திணறியது பாண்டியாவின் பொறுமையைச் சோதித்துள்ளது.
இருப்பினும், அந்த கோபத்தை உடனடியாகக் கட்டுப்படுத்திக் கொண்ட அவர், தொடர்ந்து அணியை வழிநடத்தினார். ஹைதராபாத் அணி மிகவும் நிதானமாகவும் அதே சமயம் அதிரடியாகவும் செயல்பட்டு மும்பையின் வெற்றிக் கனவைத் தகர்த்தது.
இந்தத் தோல்வி மும்பை அணிக்கு பல கேள்விகளை எழுப்பியுள்ள நிலையில், வரும் போட்டிகளில் பாண்டியாவின் ஆக்ரோஷம் அணியின் வெற்றிக்குத் திரும்புமா என்பதைப் பொறுத்திருந்துதான் பார்க்க வேண்டும்.