மருத்துவத் துறையில் நிலவும் முறையற்ற வணிகப் போக்குகளுக்கு அடிபணிய மறுத்து, ஒரு இளம் பெண் மருத்துவர் தனது பணியை முதல் நாளிலேயே ராஜினாமா செய்துள்ள சம்பவம் சமூக வலைதளங்களில் பெரும் விவாதத்தை ஏற்படுத்தியுள்ளது.

தனது முடிவைப் பற்றி அந்த மருத்துவர் கூறுகையில், "அங்கு எனது பெயர் மட்டுமே பயன்படுத்தப்படும், ஆனால் தவறுகள் அனைத்தும் நிர்வாகத்தால் செய்யப்படும். நோயாளிகளின் பாதுகாப்பை விலையாகக் கொடுத்து எனக்கு இந்த வேலை தேவையில்லை. எந்தவொரு பெரிய ஊதியமும் நோயாளிகளின் உயிருக்கு ஈடாகாது" எனத் தெரிவித்துள்ளார்.

இந்த வீடியோ வெளியானதைத் தொடர்ந்து இணையவாசிகள் இருவேறு கருத்துகளைப் பகிர்ந்து வருகின்றனர். பலரும் அந்த மருத்துவரின் துணிச்சலைப் பாராட்டி வருகின்றனர். "சிஸ்டம் மாற வேண்டும்" என்றும், அவர் சொந்தமாக மருத்துவமனை தொடங்கி நேர்மையாகச் சேவை செய்ய வேண்டும் என்றும் வாழ்த்துகின்றனர். சம்பந்தப்பட்ட மருத்துவமனையின் பெயரை வெளியிட வேண்டும் என்றும், உரிய அதிகாரிகள் இது குறித்து விசாரணை நடத்த வேண்டும் என்றும் கோரிக்கைகள் எழுந்துள்ளன.

இருப்பினும், ஒரு சிலர் இத்தகைய புகார்கள் அதிகரிப்பது கவலை அளிப்பதாகவும், தனிநபர் விலகுவது மட்டுமே தீர்வாகாது, ஒட்டுமொத்த மருத்துவக் கட்டமைப்பிலும் மாற்றம் தேவை என்றும் கருத்து தெரிவித்துள்ளனர். மேலும் தனியார் மருத்துவமனைகளில் லாப நோக்கம் அதிகரிப்பது குறித்த கவலையை இந்தச் சம்பவம் மீண்டும் ஒருமுறை உறுதிப்படுத்தியுள்ளது.