கடந்த 2025 செப்டம்பர் 1-ஆம் தேதி வெள்ளிக்கான HUID இணையதளம் தொடங்கப்பட்ட நிலையில், இதுவரை 77 லட்சத்துக்கும் மேற்பட்ட வெள்ளி நகைகள் மற்றும் பொருட்களுக்கு HUID குறியீட்டுடன் ஹால்மார்க் செய்யப்பட்டுள்ளதாக இந்திய தர நிர்ணய அமைப்பு (BIS) தெரிவித்துள்ளது.

HUID என்பது ஒவ்வொரு ஹால்மார்க் செய்யப்பட்ட வெள்ளிப் பொருளுக்கும் வழங்கப்படும் 6 இலக்க எழுத்து-எண் அடையாளக் குறியீடு ஆகும். இதனுடன் BIS தரக் குறியீடு, 'SILVER' என்ற குறிப்பு மற்றும் அந்த நகையின் தூய்மைத் தரம் ஆகியவையும் இடம்பெறும். இதன் மூலம் ஒரு குறிப்பிட்ட நகை எங்கு ஹால்மார்க் செய்யப்பட்டது, எந்த நகைக்கடைக்காரர் அதைச் சமர்ப்பித்தார், அதன் தூய்மைத் தரம் உள்ளிட்ட விவரங்களைத் தெரிந்துகொள்ள முடியும்.

வாடிக்கையாளர்களுக்கு முக்கியமான வசதி என்னவென்றால், HUID எண்ணை BIS CARE செயலி மூலம் சரிபார்க்க முடியும். நகையை வாங்குவதற்கு முன்பு அதில் இருக்கும் HUID எண்ணைச் சரிபார்ப்பதன் மூலம் நகையின் தூய்மை, வகை, ஹால்மார்க் மையம் மற்றும் பதிவு செய்யப்பட்ட நகைக்கடையின் விவரங்களை அறியலாம். இதனால் போலியான ஹால்மார்க் அல்லது தவறான தூய்மைத் தகவல்களால் வாடிக்கையாளர்கள் ஏமாற்றப்படுவதற்கான வாய்ப்பை குறைக்க முடியும்.

தற்போது நாடு முழுவதும் 341 வெள்ளி பரிசோதனை மற்றும் ஹால்மார்க் மையங்கள், 102 மாவட்டங்களில் செயல்பட்டு வருகின்றன. மேலும் 25,000-க்கும் மேற்பட்ட வெள்ளி நகைக்கடைகள் BIS-ல் பதிவு செய்துள்ளன. வெள்ளி ஹால்மார்க்கிங் திட்டம் தன்னார்வ அடிப்படையிலானதாக இருந்தாலும், ஹால்மார்க் செய்யப்படும் வெள்ளிப் பொருளில் HUID குறியீடு இடம்பெறுவது கட்டாயமாக்கப்பட்டுள்ளது. எனவே வெள்ளி நகை வாங்கும் போது BIS குறியீடு, தூய்மைத் தரம், HUID ஆகியவற்றை சரிபார்த்து, முறையான ரசீதையும் பெற்றுக்கொள்வது வாடிக்கையாளர்களுக்கு பாதுகாப்பானது.