குறிப்பாக சபாநாயகர் மீதான நம்பிக்கை இல்லா தீர்மானத்தின் போது தவெக-வின் ஊத்தங்கரை தொகுதி சட்டமன்ற உறுப்பினர் டாக்டர் என். இளையராஜாவுக்கு திமுக தரப்பில் சுமார் 35 கோடி ரூபாய் வரை பேரம் பேசப்பட்டதாக வெளியான தகவல் பெரும் அதிர்ச்சியை ஏற்படுத்தியுள்ளது.

இந்த விவகாரத்தில் இடைத்தரகர்களாகச் செயல்பட்ட திருநாவுக்கரசு, நரேஷ், தியாகராஜன் ஆகியோர் சென்னை காவல்துறையினரால் கைது செய்யப்பட்டுள்ள நிலையில், இந்தச் சதியின் பின்னணியில் முன்னாள் அமைச்சர் செந்தில் பாலாஜி மற்றும் அவரது சகோதரர் அசோக்குமார் ஆகியோரது பெயர்கள் எஃப்.ஐ.ஆரில் சேர்க்கப்பட்டிருப்பது அரசியல் அரங்கில் பெரும் பூகம்பத்தைக் கிளப்பியுள்ளது. இந்த அசாதாரணமான அரசியல் சூழலில், முதலமைச்சர் விஜய் தனது கட்சி முக்கிய நிர்வாகிகள் மற்றும் ஆதரவாளர்களிடம் மிகவும் ஆவேசமாகவும் கறாராகவும் பேசியதாக வெளியாகி வரும் ரகசியத் தகவல்கள் தற்போதைய அரசியல் பரபரப்பை மேலும் பன்மடங்கு அதிகரித்துள்ளது.

தனது ஆதரவாளர்களிடையே முதலமைச்சர் விஜய் பேசும்போது, தவெக சட்டமன்ற உறுப்பினர்களை விலை பேசுவதற்கு திமுகவுக்கும், குறிப்பாக செந்தில் பாலாஜிக்கும் எவ்வளவு தைரியம் இருக்க வேண்டும் என்று மிகுந்த கோபத்துடன் கேள்வி எழுப்பியதாகக் கூறப்படுகிறது. என்னைத் தொட்டுப் பார்த்திருக்கலாம், ஆனால் மக்களால் தேர்ந்தெடுக்கப்பட்ட எனது கட்சியின் சட்டமன்ற உறுப்பினர்களைத் தொட்டதன் மூலம் செந்தில் பாலாஜி மிகப் பெரிய தவறைச் செய்துவிட்டார் என்றும், என்னை இதுவரை தொட்ட எவனையும் நான் சும்மா விட்டதே இல்லை என்றும் அவர் எச்சரித்ததாகத் தெரிகிறது. இதுவரைக்கும் மேடைகளிலும் பொதுவெளியிலும் அமைதியாகவும், நாகரீகமாகவும் மட்டுமே பேசத் தெரிந்த விஜய் என்றுதானே எல்லாரும் நினைத்துக் கொண்டிருக்கிறார்கள், ஆனால் இனிமேல் சதித் திட்டங்களை உடைத்தெறிந்து அதிரடியாகச் செயல்படப் போகும் புதிய விஜயை இந்தத் தமிழகம் பார்க்கத்தான் போகிறது என்று அவர் தனது ஆதரவாளர்களிடம் சூளுரைத்துள்ளார்.

மேலும், தாம் முதலமைச்சராகப் பதவியேற்றது முதல் மிகவும் கண்ணியமான முறையில், நேர்மையான பாதையில் மட்டுமே அரசியல் செய்ய வேண்டும் என்று கஷ்டப்பட்டுப் பழகி, அதற்கான முயற்சிகளைத் தொடர்ந்து எடுத்து வருவதாக விஜய் குறிப்பிட்டுள்ளார். ஆனால், எதிர்க்கட்சியினரோ தங்களது பழைய குதிரை பேர அரசியல் புத்தியை மாற்றிக் கொள்ளாமல், தம்மையும் தங்களது தரமிறங்கிய அரசியல் பாணிக்கு இழுத்துவிட்டு அசிங்கமான அரசியலைச் செய்ய வச்சிருவீங்க போல தெரியுது என்று ஆதங்கத்துடனும் ஆவேசத்துடனும் அவர் பேசியதாகத் தெரிகிறது. நேர்மையான முறையில் ஆட்சி நடத்த நினைக்கும் ஒரு புதிய அரசை, குறுக்கு வழியில் கவிழ்க்க நினைக்கும் இத்தகைய கீழ்த்தரமான அரசியல் முயற்சிகள் ஒருபோதும் பலிக்காது என்பதைத் தனது கடுமையான வார்த்தைகள் மூலம் அவர் வெளிப்படுத்தியுள்ளார்.

என்றைக்குத் தனது கட்சியின் சட்டமன்ற உறுப்பினர் மீதே கையை வைத்து, அவரை மிரட்டிப் பணிய வைக்க திமுக தரப்பு துணிந்ததோ, அன்றைக்கே அவர்களுக்குச் சனியன் பிடித்துவிட்டது என்றும், இந்தச் சதித் திட்டத்தில் ஈடுபட்ட யாரையும் சட்டத்தின் பிடியில் இருந்து ஒரு நாளும் தப்பிக்க விடமாட்டேன் என்றும் விஜய் மிகவும் கறாராகக் கூறியுள்ளார். இந்த விவகாரத்தில் சட்ட ரீதியான நடவடிக்கைகள் மிகக் கடுமையான முறையில் பாயும் என்றும், தவறு செய்தவர்கள் தங்களது ஆயுசு முழுக்க ஜெயில்தான் கிடக்க வேண்டும் என்கிற அளவுக்குக் காவல்துறை விசாரணை எவ்வித அரசியல் தலையீடும் இன்றி ஆழமாகச் செல்லும் என்றும் அவர் உறுதியளித்துள்ளார். அரசியல் பலத்தை வச்சு அதிகாரத்தைக் கைப்பற்ற நினைக்கும் இந்தச் சக்திகளுக்குச் சட்டத்தின் மூலமாகவே தகுந்த பாடம் புகட்டப்படும் என்பது அவரது பேச்சில் அப்பட்டமாகத் தெரிந்துள்ளது.

சுமார் 1500 கோடி ரூபாய் வரை பட்ஜெட் போட்டு இந்த விஜய் அரசை எப்படியாவது கவிழ்த்துவிட வேண்டும் என்று திமுகவினர் தீட்டிய ரகசியத் திட்டம், தற்போதைக்கு அவர்களுக்கே பெரும் வினையாக முடிந்துள்ளதை இந்தச் சம்பவங்கள் காட்டுகின்றன. சபாநாயகரை அவையின் மூலமாக வெளியேற்றிவிட்டால், சட்டமன்றப் பெரும்பான்மையைச் சோதிப்பதில் சட்டச் சிக்கல்களை உருவாக்கி ஆட்சியைப் பிடித்துவிடலாம் என்று மனப்பால் குடித்தவர்களின் கணக்கு, தவெக-வின் மக்கள் பலத்தாலும், சட்ட விழிப்புணர்வாலும் தற்போதைக்குத் தலைகீழாக மாறியுள்ளது. இடைத்தரகர்களிடம் நடத்தப்படும் தீவிர விசாரணையின் மூலம் இந்த பேரத்திற்குப் பின்னால் இருந்து கோடிக்கணக்கான நிதியைத் திரட்டிக் கொடுத்தது யார், முன்னாள் அமைச்சர் செந்தில் பாலாஜியைப் பின்னால் இருந்து இயக்கியது யார் என்ற ஆணிவேர் வரையிலான உண்மைகள் விரைவில் வெளிச்சத்திற்கு வரும் என்று அரசியல் வட்டாரங்கள் நம்புகின்றன.

ஒட்டுமொத்தமாகப் பார்க்கும்போது, இதுவரை அமைதியான முறையில் அரசியல் நகர்வுகளை மேற்கொண்டு வந்த முதலமைச்சர் விஜய், தற்போதைய எம்எல்ஏ குதிரை பேர விவகாரத்தால் கடுமையான கோபத்திற்கு ஆளாகியுள்ளார் என்பது அவரது இந்த ரகசியப் பேச்சின் மூலம் தெளிவாகிறது. இந்த விவகாரத்தில் சம்மந்தப்பட்ட திமுகவின் முக்கியப் புள்ளிகளுக்குப் பெரும் சட்டச் சிக்கல் ஏற்பட்டுள்ள நிலையில், இந்த வழக்கின் அடுத்தடுத்த நகர்வுகள் திமுகவின் ஒட்டுமொத்த அஸ்திவாரத்தையே ஆட்டம்காண வைக்கும் என்று அரசியல் விமர்சகர்கள் கருதுகின்றனர். கோடிக்கணக்கான பணத்தை நம்பி தவெக அரசை வீழ்த்த நினைத்து திமுக தோண்டிய குழி, தற்போதைய கள எதார்த்தத்தில் அவர்களது எதிர்கால அரசியல் நகர்வுகளையே முடக்கும் அளவிற்குப் பாரிய ஆபத்தாக மாறியுள்ளதோடு, முதலமைச்சர் விஜயின் இந்த அதிரடி ஆவேச முகம் தமிழக அரசியலில் ஒரு புதிய திருப்பத்தை ஏற்படுத்தியுள்ளது.

Author: Bala Siva