2026 தமிழக சட்டமன்றத் தேர்தல் முடிவுகள், தமிழக அரசியலில் மட்டுமல்லாது, ஊடகத் துறையிலும் பெரும் அதிர்வலைகளை ஏற்படுத்தியுள்ளன.

குறிப்பாக, தேர்தலுக்கு முன்பாகத் தமிழக வெற்றிக் கழகத்தின் வெற்றியைப் பற்றி மிகக் கடுமையான விமர்சனங்களையும், சவால்களையும் முன்வைத்த ஊடகவியலாளர் ரங்கராஜ் பாண்டேவை நோக்கி இப்போது பொதுமக்கள் சரமாரியாகக் கேள்விகளை எழுப்பி வருகின்றனர். “தவெக 10 சீட் ஜெயித்தால் நான் இனி அரசியலே பேச மாட்டேன்” என்று அவர் விடுத்த சவால், தற்போது தவெக 108 தொகுதிகளில் முன்னிலை வகித்து வரும் சூழலில் அவருக்கே பெரும் நெருக்கடியாக மாறியுள்ளது.

தேர்தல் களத்தில் நிலவிய எதார்த்தமான மாற்றத்தை உணராமல், “முதலமைச்சர் மு.க. ஸ்டாலின் மீண்டும் வெற்றி பெறுவார் என்பதில் எனக்கு எள்ளளவும் சந்தேகமில்லை” என்று பாண்டே போன்றவர்கள் ஆணித்தரமாகக் கூறி வந்தனர். ஆனால், ஆளுங்கட்சிக்கு எதிராக மக்கள் ஒரு மௌனப் புரட்சியை நிகழ்த்தியுள்ளதை ஊடகங்கள் கணிக்கத் தவறிவிட்டன. முதல்வர் ஸ்டாலினே தனது கோட்டையான கொளத்தூரில் பின்னடைவை சந்தித்திருப்பது, பாண்டேவின் கணிப்புகள் எவ்வளவு தூரம் எதார்த்தத்திற்கு புறம்பாக இருந்தன என்பதை பறைசாற்றுகின்றன.

“விஜய் முதலமைச்சராகவும் மாட்டார், குறைந்தபட்சம் எதிர்க்கட்சி தலைவராகவும் கூட வரமாட்டார்” என்று மிக தீவிரமாக கருத்துத் தெரிவித்திருந்த பாண்டேவின் நிலைப்பாடு, தற்போது ஜனநாயக தீர்ப்பால் கேள்விக்குறியாக்கப்பட்டுள்ளது. தமிழக மக்கள் ஒரு புதிய தலைமையை நோக்கி நகர்வதை ஒரு மூத்த பத்திரிகையாளர் ஏன் அடையாளம் காண தவறினார் என்பதே பொதுமக்களின் பிரதான கேள்வியாக உள்ளது. மக்களின் மனநிலையை புரிந்து கொள்ளாதவர்கள் எப்படி ஒரு நடுநிலையான செய்தியாளராக இருக்க முடியும் என்ற விவாதம் சமூக வலைதளங்களில் காட்டுத்தீயாக பரவி வருகிறது.

பத்திரிகையாளர் என்பவர் மக்களின் நாடி துடிப்பை அறிபவராக இருக்க வேண்டும்; மாறாக தனது தனிப்பட்ட விருப்பு வெறுப்புகளை கணிப்புகளாக திணிக்க கூடாது என்பதே இன்று பொதுமக்கள் பாண்டேவிற்கு வைக்கும் குற்றச்சாட்டாகும். விஜய்யின் அரசியல் வருகையை வெறும் ஒரு திரையுலக கவர்ச்சியாக மட்டுமே பார்த்த பாண்டே, அடித்தட்டு மக்களிடம் நிலவிய நிர்வாகத்தின் மீதான அதிருப்தியை புறக்கணித்துவிட்டார். 39 கட்சிகளை கொண்ட பெரும் கூட்டணிகளை எதிர்த்து ஒரு தனி மனிதன் நிகழ்த்தியுள்ள இந்த அசாத்திய வெற்றியை ஜீரணிக்க முடியாமல் ஊடகங்கள் திகைத்து போயுள்ளன.