Thursday, 20 Apr, 9.16 am தமிழகம்

தமிழகம்
அரசு மேல்நிலைப் பள்ளிபணி ஓய்வுஊர்மக்கள் ஒத்துழைப்புபரிசுகளை மாணவர்களின் நலனுக்கு கொடுத்தார்

மறமடக்கி கிராமத்தில் உள்ள அரசு பள்ளி மாணவர்களை முதலிடம் பெற வைத்து டாக்டர், பல் டாக்டர், பொறியியலாளர், வேளாண்மை என பல துறைகளுக்கும் படிக்க உதவிய தலைமை ஆசிரியரின் பணி நிறைவை சுற்றுவட்டார கிராமங்களே ஊர்வலமாக சென்று பரிசுகளும், பாராட்டுகளும் வழங்கி வழியனுப்பி வைத்த சம்பவம் நெகிழ்ச்சியை ஏற்படுத்தியுள்ளது. பெற்றோர்கள் கொடுத்த பரிசுகளை அந்தப் பள்ளி மாணவர்களின் வளர்ச்சிக்காக அப்பள்ளியின் தலைமை ஆசிரியர் திருப்பி கொடுத்தது மேலும் நெகிழச் செய்துள்ளது.

:

புதுக்கோட்டை மாவட்டம் கீரமங்கலம் அருகில் உள்ள மறமடக்கி அரசு மேல்நிலைப் பள்ளிக்கு கடந்த 2009-ஆம் ஆண்டு பள்ளித் தலைமை ஆசிரியராக திருச்சியைச் சேர்ந்த ரமேஷ் இடமாறுதலில் வந்தார். அவர் வருவதற்கு முன்பு வரை அந்தப் பள்ளியில் மறமடக்கி, திருநாளூர் உள்ளிட்ட சுற்றுவட்டார கிராமங்களைச் சேர்ந்த சுமார் 580 மாணவ, மாணவிகள் படித்துள்ளனர். அதன்பிறகு பள்ளி மாணவர்களின் படிப்பு திறன் உயர  ஊர் மக்களின் ஒத்துழைப்போடு  பொதுத்தேர்வு எழுதும் மாணவர்களுக்கு காலை, மாலையில் கூடுதல் நேர வகுப்பு, மாலை நேரங்களில் மின் தடையால் மாணவர்களின் படிப்பு தடைப்படுவதைத் தடுக்க ஜெனரேட்டர் வசதி, அனைத்து வகுப்புகளுக்கும் ரூ.1,69 லட்சத்தில் கண்காணிப்பு கேமரா உள்ளிட்ட வசதிகளை ஏற்படுத்தியுள்ளார்.

மேலும், பல்வேறு பொதுநல அமைப்புகள் மற்றும் தன்னார்வ அமைப்புகள் உதவியுடன் கூடுதல் கழிப்பறை,  சுத்திகரிக்கப்பட்ட குடிநீர் வசதிகளை ஏற்படுத்தியுள்ளார். அதன் பிறகு இந்தப் பள்ளி மாணவ, மாணவிகள் 10, மற்றும் 12-ஆம் வகுப்புகளில் பல முறை 100 சதவீதம் தேர்ச்சி அடைந்துள்ளனர். இந்த தேர்ச்சி விகிதத்தை பார்த்த பெற்றோர்கள், தனியார் பள்ளிகளில் படித்துவந்த தங்களின் பிள்ளைகளையும்  மறமடக்கி அரசு பள்ளியில் சேர்த்தனர். இதனால்  பள்ளியில் படிக்கும் மாணவர்களின் எண்ணிக்கை இருமடங்காக உயர்ந்துள்ளது. 

:

 

இப்பள்ளியின் வளர்ச்சியிலும் மாணவர்களின் வளர்ச்சியிலும் அக்கறை கொண்டிருந்த தலைமை ஆசிரியர் ரமேஷுக்கு நேற்று பணிநிறைவு பெற்றதையொட்டி பாராட்டு விழா நடைபெற்றது. இந்த விழாவில் மறமடக்கி மட்டுமின்றி சுற்றுவட்டார கிராம மக்கள் ஒன்றுகூடி மேள தாளங்கள், வானவேடிக்கையுடன் பூ, காய், கனிகளுடன் ஊர்வலமாக பள்ளியில் நடைபெற்ற விழாவிற்குச் சென்றனர்.

ஆலங்குடி சட்டமன்ற உறுப்பினர் சிவ.வீ.மெய்யநாதன் தலைமையில் நடைபெற்ற இந்த விழாவில் சுற்றவட்டார கிராமங்களைச் சேர்ந்த பெற்றோர்களும் பள்ளி மாணவ, மாணவிகளும், முன்னாள் மாணவர்களும் கலந்துகொண்டு வாழ்த்தினர். பல மாணவர்கள் தங்கள் வளர்ச்சிக்குத் துணையாக இருந்த தலைமை ஆசிரியர் என்று கண் கலங்கி நெகிழ்ந்தனர். கிராமத்தினர், பெற்றோர்கள் சார்பில் தங்க மோதிரம், சங்கிலி, கைகடிகாரம் போன்ற ஏராளமான பரிசுகளும், மாலை மரியாதைகளும் அவருக்கு செய்யப்பட்டது. 

:

பணி ஓய்வு பெற்று செல்லும் பள்ளியின் தலைமை ஆசிரியர் ரமேஷ் கூறியபோது.. “கிராம மக்கள், ஆசிரியர்கள், மாணவர்கள் ஒத்துழைப்பு கொடுத்ததனால்தான் ஆசிரியர் பற்றாக்குறை இருந்தபோதிலும் தொடர்ந்து முழு தேர்ச்சி பெற முடிந்தது. மேலும், இப்பள்ளியில் படித்த மாணவர்கள்  எம்பிபிஎஸ், பல் மருத்துவம், வேளாண், பொறியியல் போன்ற துறைகளில் படிக்கக்கூடிய வாய்ப்பு ஏற்பட்டுள்ளது. ஊர் மக்களின் ஒத்துழைப்பு இருந்தால்தான் அரசுப் பள்ளிகள் வளர்ச்சியடைய முடியும்” என்றார்.

ஆலங்குடி சட்டமன்ற உறுப்பினர் சிவ.வீ.மெய்யநாதன் பணி ஓய்வு பெற்ற தலைமை ஆசிரியரை வாழ்த்திப் பேசும் போது.. “அரசிடம் மட்டுமின்றி  கிராம மக்கள், பல்வேறு சேவை அமைப்புகள் மூலம் பள்ளிக்குத் தேவையான வசதிகளைக் கேட்டு பெற்று செய்துள்ளார். கடந்த 8 ஆண்டுகளில் சுற்றுவட்டார மாணவர்களின் வாழ்க்கைக்கு வழிகாட்டியாகவும் இருந்துள்ளார் தலைமையாசிரியர் ரமேஷ். பள்ளிக்கு வராத மாணவர்களின் வீட்டிற்கே சென்று அழைத்து வருவார். அதனால் ஊர்கூடி பாராட்டு விழா எடுத்துள்ளோம்” என்றார்.

:

நிறைவாக கிராமத்தினர் மற்றும் பெற்றோர்கள் கொடுத்த தங்க மோதிரம், மற்றும் பரிசுகளை அப்படியே பள்ளி நிர்வாகத்திடம் திருப்பிக் கொடுத்த தலைமை ஆசிரியர் ரமேஷ், இந்த நகைகள் மற்றும் பொருட்களை வைத்து மாணவர்களின் நலனுக்காக அறக்கட்டளை தொடங்கி, மாணவர்களின் கல்வி வளர்ச்சிக்குப் பயன்படுத்த வேண்டும். மேலும் இது பொன்ற கிராமப்புற ஏழை மாணவர்களின் கல்வி வளர்ச்சிக்காக இன்னும் என்னால் முடிந்த பொருளாதார உதவிகளையும் ஆலோசனைகளையும் வழங்குகிறேன் என்று கூறி பரிசு பொருட்களை திருப்பிக் கொடுத்த போது திரண்டிருந்த பெற்றோர்கள், மாணவர்கள் நெகிழ்ந்துவிட்டனர்.

அரசுப்பள்ளி ஆசிரியரின் இந்த கல்வி சேவை மாணவர்களால் என்றும் மறக்கப்படாமல் இருக்கும். அடுத்து வரும் தலைமுறைக்கும் இது பாடமாக அமையும்.

-இரா.பகத்சிங்


Dailyhunt
Top