சமீபத்திய சட்டமன்றத் தேர்தலுக்குப் பிறகு அதிமுகவில் ஏற்பட்டுள்ள உட்கட்சிப் பரபரப்பு புதிய கட்டத்தை எட்டியுள்ளது.
முன்னாள் அமைச்சர் விஜயபாஸ்கர் கட்சிப் பொறுப்புகளிலிருந்தும் அடிப்படை உறுப்பினர் பதவியிலிருந்தும் விலகியதைத் தொடர்ந்து, அவரது அடுத்த அரசியல் முடிவு குறித்த எதிர்பார்ப்பு அதிகரித்துள்ளது. குறிப்பாக புதுக்கோட்டை மாவட்ட அரசியலில் இந்த விவகாரம் பெரும் பேசுபொருளாக மாறியுள்ளது.
அதிமுக விலகலுக்குப் பின் புதிய அரசியல் பாதை?
எடப்பாடி பழனிசாமியுடன் ஏற்பட்ட கருத்து வேறுபாடுகளுக்குப் பிறகு, தனது ஆதரவாளர்களுடன் விஜயபாஸ்கர் தீவிர ஆலோசனை நடத்தியதாக கூறப்படுகிறது. அதன்பின் அவர் கட்சியிலிருந்து விலகுவதாக அறிவித்தது அரசியல் வட்டாரங்களில் அதிர்வலைகளை ஏற்படுத்தியது.
இதையடுத்து, அவர் திமுகவில் இணையப்போகிறாரா அல்லது நடிகர் விஜய் தலைமையிலான தமிழக வெற்றிக் கழகத்தில் இணைகிறாரா என்ற கேள்வி எழுந்தது. தற்போது வெளியாகும் தகவல்களின்படி, அவரது அரசியல் பயணம் தவெக நோக்கி நகரக்கூடும் என்ற பேச்சு அதிகரித்துள்ளது.
விஜய்யை நேரில் சந்திக்க முயற்சி
ஏற்கனவே பல முன்னாள் முக்கிய நிர்வாகிகள் மற்றும் தலைவர்கள் தவெகவில் இணைந்துள்ள நிலையில், விஜயபாஸ்கரும் அந்த அணியில் இணைய விருப்பம் தெரிவித்துள்ளதாக கூறப்படுகிறது. புதுக்கோட்டை மாவட்டத்தில் தனக்குள்ள செல்வாக்கை கருத்தில் கொண்டு, கட்சித் தலைவரான விஜய் முன்னிலையிலேயே இணைவதற்கான ஏற்பாடுகள் நடைபெற்று வருவதாக அரசியல் வட்டாரங்கள் தெரிவிக்கின்றன.
அதற்காக முதலமைச்சர் விஜய்யை நேரில் சந்திக்க நேரம் கோரப்பட்டுள்ளதாகவும் தகவல்கள் வெளியாகியுள்ளன. எனினும், இதுகுறித்து அதிகாரப்பூர்வ அறிவிப்பு இதுவரை வெளியாகவில்லை.
ஆதரவாளர்களின் ஒருமித்த ஆதரவு
புதுக்கோட்டையில் நடைபெற்ற ஆதரவாளர்கள் ஆலோசனைக் கூட்டத்தில், விஜயபாஸ்கரின் எதிர்கால அரசியல் முடிவுக்கு முழு ஆதரவு தெரிவிக்கப்பட்டதாக கூறப்படுகிறது. மேலும், ஆயிரக்கணக்கான ஆதரவாளர்களுடன் பிரம்மாண்ட நிகழ்ச்சியில் அவர் புதிய கட்சியில் இணையலாம் என்ற எதிர்பார்ப்பும் நிலவுகிறது.
வரவிருக்கும் இடைத்தேர்தலில் விஜயபாஸ்கர் முக்கிய வேட்பாளராக களமிறங்கலாம் என்றும், வெற்றி பெற்றால் அவருக்கு முக்கியப் பொறுப்பு வழங்கப்படலாம் என்றும் அரசியல் வட்டாரங்களில் பேசப்படுகிறது. அதேநேரத்தில், பாரம்பரிய கட்சிகளில் இருந்து வரும் மூத்த தலைவர்களுக்கு வழங்கப்படும் முக்கியத்துவம், ஆரம்ப காலத்திலிருந்தே கட்சிக்காக உழைத்து வரும் சில நிர்வாகிகள் மத்தியில் அதிருப்தியை ஏற்படுத்தியுள்ளதாக அரசியல் விமர்சகர்கள் கருத்து தெரிவிக்கின்றனர்.