தமிழக அமைச்சரவையில் ஒன்பது அமைச்சர்களின் செயல்பாடுகள் மட்டுமே திருப்திகரமாக இருப்பதாக உளவுத்துறை அறிக்கை அளித்துள்ளதாக தகவல் வெளியாகியுள்ளது.
இதனால் முதலமைச்சர் விஜய் அதிருப்தியில் இருப்பதாக கூறப்படுகிறது. ஆட்சிக்கு அவப்பெயர் ஏற்படுத்தும் வகையில் செயல்படும் அமைச்சர்களை மாற்றிவிட்டு, பட்ஜெட் கூட்டத்தொடருக்குப் பிறகு அமைச்சரவையில் மாற்றம் செய்ய திட்டமிடப்பட்டுள்ளதாகவும் தகவல்கள் தெரிவிக்கின்றன.
ஒன்பது அமைச்சர்களின் செயல்பாடுகளுக்கு திருப்தி?
அரசியல் மற்றும் நிர்வாக ரீதியாக அமைச்சர்களின் செயல்பாடுகள் குறித்து உளவுத்துறை தரப்பில் ஆய்வு மேற்கொள்ளப்பட்டதாக கூறப்படுகிறது. இதில் ஒன்பது அமைச்சர்களின் பணிகள் மட்டுமே திருப்திகரமாக இருப்பதாக அறிக்கையில் தெரிவிக்கப்பட்டுள்ளதாக தகவல். மற்ற அமைச்சர்களின் செயல்பாடுகள் குறித்து தலைமைக்கு அதிருப்தி இருப்பதாகவும் கூறப்படுகிறது.
மக்களின் அன்றாட பிரச்சினைகளில் கவனம்
பல்துறை அமைச்சர்கள் தங்களது நிர்வாகத் திறமையால் அரசியல் களத்தில் கவனம் ஈர்த்தாலும், மக்களின் அன்றாட வாழ்க்கையுடன் தொடர்புடைய பிரச்சினைகளில் எடுக்கப்படும் நடவடிக்கைகளே அவர்களின் செயல்பாட்டை தீர்மானிப்பதாக பார்க்கப்படுகிறது. குறிப்பாக சாலை வசதி, குடிநீர் தட்டுப்பாடு, பொதுப் போக்குவரத்து, வேலைவாய்ப்பு போன்ற பிரச்சினைகளுக்கு அதிகாரிகள் மூலம் நடவடிக்கை எடுப்பதைத் தாண்டி, களத்தில் நேரடியாக கவனம் செலுத்தும் அமைச்சர்களுக்கு மக்கள் மத்தியில் வரவேற்பு அதிகமாக இருப்பதாக கூறப்படுகிறது.
பட்ஜெட் கூட்டத்தொடருக்கு பிறகு மாற்றமா?
விளம்பர வெளிச்சத்தைவிட களப்பணிக்கு முக்கியத்துவம் அளிக்கும் அமைச்சர்களே மக்களின் மனதில் இடம்பிடிக்க முடியும் என்ற நிலைப்பாடு ஆட்சித் தரப்பில் நிலவுவதாக கூறப்படுகிறது. இந்த சூழலில், அமைச்சரவை மாற்றம் தொடர்பான ஆலோசனைகள் நடைபெற்று வருவதாக தகவல்கள் வெளியாகியுள்ளன. பட்ஜெட் கூட்டத்தொடர் முடிந்த பிறகு, செயல்பாடுகளில் பின்தங்கியதாக கருதப்படும் அமைச்சர்கள் மீது நடவடிக்கை எடுக்கப்படுமா என்பது அரசியல் வட்டாரங்களில் எதிர்பார்ப்பை ஏற்படுத்தியுள்ளது.
இதனால், அடுத்தகட்டத்தில் யார் அமைச்சரவையில் தொடர்வார்கள், யாருக்கு புதிய பொறுப்புகள் வழங்கப்படும் என்ற கேள்விகள் எழுந்துள்ளன. குறிப்பாக மக்களின் அடிப்படை தேவைகளில் நேரடியாக கவனம் செலுத்தும் அமைச்சர்களுக்கு முக்கியத்துவம் அளிக்கப்படலாம் என்ற எதிர்பார்ப்பு உருவாகியுள்ளது.