சென்னை: தமிழக வெற்றிக் கழகம் (தவெக) தலைவர் நடிகர் சி.ஜோசப் விஜய் இன்று காலை 10.15 மணிக்கு சென்னை நேரு உள்விளையாட்டு அரங்கில் தமிழ்நாட்டின் 13ஆவது முதலமைச்சராக பதவியேற்றார்.

ஆளுநர் ராஜேந்திர விஸ்வநாத் அர்லேகர் அவருக்கு பதவிப் பிரமாணம் செய்து வைத்தார். அதன்பின்னர் 9 பேர் அமைச்சர்களாக பதவியேற்றனர்.

விஜய் தலைமையிலான புதிய அமைச்சரவையில் இளம் வயது அமைச்சராக 29 வயதான எஸ். கீர்த்தனா பதவியேற்றுள்ளார். ஒரு மருத்துவர், ஒரு பல் மருத்துவர், முன்னாள் வருவாய்த்துறை அதிகாரி உள்ளிட்ட பல்வேறு துறைகளைச் சேர்ந்தவர்களுக்கு வாய்ப்பு அளிக்கப்பட்டுள்ள இந்த அமைச்சரவையில் கீர்த்தனாவின் நியமனம் குறிப்பிடத்தக்கதாகப் பார்க்கப்படுகிறது.

சிவகாசி சட்டப்பேரவைத் தொகுதியில் தவெக சார்பில் போட்டியிட்ட கீர்த்தனா 68,709 வாக்குகள் பெற்று 11,670 வாக்குகள் வித்தியாசத்தில் வெற்றி பெற்றார். அதிமுகவின் முன்னாள் அமைச்சர் கே.டி. ராஜேந்திரபாலாஜி 51,078 வாக்குகளுடன் மூன்றாவது இடத்துக்கு தள்ளப்பட்டார். சிவகாசியில் இருந்து வெற்றி பெற்ற முதல் பெண் எம்எல்ஏ என்ற பெருமையையும் கீர்த்தனா பெற்றுள்ளார்.

சமூக வலைதளங்களில் சரளமான ஹிந்தி பேச்சு வீடியோக்கள் மூலம் பிரபலமான கீர்த்தனா, தவெக பிரசாரத்தில் இளைஞர்களை அணி திரட்டுவதில் முக்கியப் பங்கு வகித்தார். விஜய்க்கு இளைஞர் ரசிகர்கள் அதிகம் என்பதைக் கருத்தில் கொண்டு அவருக்கு அமைச்சர் பதவி வழங்கப்பட்டதாக தவெக வட்டாரங்கள் தெரிவித்தன.

அமைச்சர் பதவியேற்ற பின்னர் செய்தியாளர்களிடம் பேசிய கீர்த்தனா, 'அடுத்த 50 ஆண்டுகளுக்கு தவெக அரசு நிலைத்திருக்கும்' என்று புன்னகையுடன் தெரிவித்தார். இளம் வயதில் அமைச்சர் பொறுப்பேற்ற கீர்த்தனா, புதிய அரசின் இளமை உணர்வையும், புதிய எண்ணங்களையும் பிரதிபலிப்பவராகப் பார்க்கப்படுகிறார்.

தேர்தலில் 108 தொகுதிகளில் வெற்றி பெற்ற தவெக, கூட்டணி ஆதரவுடன் ஆட்சியமைத்துள்ளது. முதலமைச்சர் விஜய் தலைமையிலான புதிய அரசு இளம் தலைமுறைக்கு முக்கியத்துவம் அளித்து செயல்படும் என எதிர்பார்ப்பு எழுந்துள்ளது. தமிழக அரசியலில் இளம் முகங்கள் அதிகம் இடம்பெறும் புதிய அத்தியாயத்தை இந்த அமைச்சரவை தொடங்கியுள்ளது.