சித்திரை மாத பவுர்ணமி தினம் தமிழ் இந்து பாரம்பரியத்தில் சிறப்பான ஆன்மீக நாளாகக் கொண்டாடப்படுகிறது. ஒவ்வொரு மாதமும் பவுர்ணமி வந்தாலும், சித்திரை மாதத்தில் வரும் இந்த நாளை சித்ரா பவுர்ணமி என்று தனித்து சிறப்பித்து வழிபடுகிறோம்.

இந்த நாளில் சூரிய பகவான் உச்ச நிலையில் இருக்க, சந்திரனும் முழு ஒளியுடன் பிரகாசிப்பதால், தெய்வ வழிபாட்டுக்கு அதிக பலன் கிடைக்கும் என்பது ஐதீகம்.

சித்ரா பவுர்ணமியின் மையப் பொருள் சித்ரகுப்தர் ஆவார். எமதர்மராஜனின் தலைமை கணக்கராகப் பணியாற்றும் இவர், உலக உயிர்களின் ஒவ்வொரு செயலையும் - நல்லது, தீயது என இரண்டையும் - துல்லியமாகப் பதிவு செய்கிறார். இறப்புக்குப் பின் ஆன்மா எமலோகம் சென்றவுடன், இவரின் கணக்கின் அடிப்படையில் சொர்க்கம் அல்லது நரகம் தீர்மானிக்கப்படுகிறது. எனவே, இவரை வழிபடுவதன் மூலம் செய்த பாவங்களிலிருந்து விடுபடலாம், புண்ணியம் பெருகும் என்று நம்பப்படுகிறது.

சித்ரகுப்தரின் அவதாரக் கதை: புராணங்களில் சித்ரகுப்தரின் பிறப்பு குறித்து பல கதைகள் உள்ளன. பிரபலமான ஒன்று: கயிலாய மலையில் பார்வதி தேவி விளையாட்டாக ஒரு அழகிய ஆண் குழந்தையின் ஓவியத்தை வரைந்தார். அதைப் பார்த்த சிவபெருமானுக்கு, எமதர்மனின் அதிக வேலைப்பளு நினைவுக்கு வந்தது. உடனே தன் பிராண வாயுவை ஓவியத்தில் செலுத்தி, அதற்கு உயிர் கொடுத்தார். சிவசக்தியின் அம்சமாக ஓவியத்திலிருந்து உதித்ததால் இவருக்கு சித்ரகுப்தன் என்று பெயர் சூட்டப்பட்டது.

'சித்ர' என்றால் சித்திரம் (ஓவியம் அல்லது மனம்), 'குப்த' என்றால் மறைவு எனப் பொருள். அதாவது, மனதில் மறைந்திருக்கும் எண்ணங்கள் மற்றும் செயல்களை இரகசியமாகக் கண்காணித்து பதிவு செய்பவர் என்பது பொருள். சில புராணங்களில் பிரம்மதேவன் சூரிய பகவானின் மூலம் இவரைப் படைத்ததாகவும், சித்திரை நட்சத்திரத்தில் பிறந்ததால் சித்ரபுத்ரன் என்றும் அழைக்கப்படுவதாகவும் கூறப்படுகிறது. பிறப்பின்போதே எழுத்தாணி மற்றும் ஓலைச்சுவடியுடன் அவதரித்த இவர், எமனின் உதவியாளராக நியமிக்கப்பட்டார்.

இவரின் கணக்குப் புத்தகம் 'அக்ர சந்தானி' என்று அழைக்கப்படுகிறது.வழிபாட்டு முறைகள்சித்ரா பவுர்ணமி அன்று காலையில் புனித நதிகளிலோ, கடலிலோ அல்லது தீர்த்தங்களிலோ நீராடி விரதம் இருப்பது வழக்கம். சித்ரகுப்தர் கோயில்களுக்குச் சென்று சிறப்பு பூஜை செய்யலாம். வீட்டில் பூஜை அறையை சுத்தம் செய்து, சித்ரகுப்தரின் படத்தை தெற்கு திசையில் வைத்து, மாவிலை தோரணம் கட்டி அலங்கரிக்க வேண்டும். எழுத்தாணி, கணக்கு நோட்டு, பேனா போன்றவற்றை வைத்து வழிபடுவது வாழ்வில் வளம் பெருக உதவும் என்பது நம்பிக்கை.

சுகாசனத்தில் அமர்ந்த நிலையில், வலது கையில் எழுத்தாணியும் இடது கையில் ஓலைச்சுவடியும் ஏந்திய சித்ரகுப்தரை தியானித்து பூஜை செய்ய வேண்டும். உப்பு சேர்க்காத உணவுகள் (பால், தயிர் தவிர்த்து எருமைப் பால் பயன்படுத்தி), சர்க்கரைப் பொங்கல், பாயசம், கொழுக்கட்டை போன்றவற்றை நைவேத்தியம் செய்யலாம். ஏழை எளியோருக்கு அன்னதானம் செய்வது, தான தர்மங்கள் செய்வது மிகுந்த புண்ணியத்தைத் தரும்.இரவில் நிலவை ரசித்தபடி 'சித்ரா அன்னம்' (கலவை சாதம்) உண்ணும் வழக்கம் உள்ளது. இது குடும்ப ஒற்றுமையையும் அன்பையும் வளர்க்கும்.