தமிழக சட்டமன்றத் தேர்தல் ஏப்ரல் 23-ம் தேதி ஒரே கட்டமாக நடைபெற உள்ளது. இந்த முறை திமுக, அதிமுக, தமிழக வெற்றிக் கழகம் (தவெக) மற்றும் நாம் தமிழர் கட்சி (நாதக) என நான்கு முனை போட்டி உருவாகியுள்ளது.

இதில் நடிகர் விஜய்யின் தவெக கட்சியின் வருகை பெரும் எதிர்பார்ப்பை ஏற்படுத்தியுள்ளது. குறிப்பாக இளைஞர்கள் மத்தியில் விஜய்க்கு உள்ள வரவேற்பு, எதிர்க்கட்சிகளிடையே சற்று கலக்கத்தை உண்டாக்கியுள்ளது.

இந்த சூழலில், வெளிநாடுகளில் வசிக்கும் தமிழர்கள் பலர் தங்கள் ஊருக்கு திரும்பி வாக்களிக்க வருகை தருகின்றனர். 'அண்ணா இது உனக்காக' என டிக்கெட்டை காட்டி சமூக வலைதளங்களில் பதிவிட்டு, உற்சாகத்துடன் பயணம் செய்ய தயாராகி வருகின்றனர். துபாய், பிரான்ஸ், சீனா, ஜெர்மனி, குவைத், ஓமன், அமெரிக்கா உள்ளிட்ட பல நாடுகளில் இருந்து ஆயிரக்கணக்கானோர் இந்த முறை தமிழகம் வருகின்றனர்.

கடந்த தேர்தல்களில் வெளிநாட்டு தமிழர்கள் பெரும்பாலும் சமூக வலைதளங்களில் மட்டுமே தங்கள் கருத்துகளைப் பகிர்ந்து வந்தனர். நேரடியாக வாக்களிக்க வருவது அரிதாகவே இருந்தது. பயண செலவு, வேலைப் பளு உள்ளிட்ட காரணங்களால் அவர்களால் வர முடியாமல் போனது. ஆனால் இந்த முறை அத்தகைய தடைகளைத் தாண்டி, பெரும் தொகையை செலவழித்து ஊருக்கு வந்து வாக்களிக்க முடிவு செய்துள்ளனர்.

தவெக தலைவர் விஜய்யின் மீதான இளைஞர்களின் ஆர்வமும், அவரது கட்சியின் புதிய அணுகுமுறையும் இந்த மாற்றத்துக்கு முக்கிய காரணமாக அமைந்துள்ளது. வெளிநாட்டு தமிழர்களின் இந்த வருகை, தேர்தல் அரசியலில் ஒரு புதிய மாற்றத்தை சுட்டிக்காட்டுகிறது. இதனால் ஓட்டுப்பதிவு விகிதம் கணிசமாக அதிகரிக்கும் என எதிர்பார்க்கப்படுகிறது.

இளைஞர்கள் மற்றும் வெளிநாட்டு வாழ் தமிழர்களின் பங்களிப்பு இந்த தேர்தலை சுவாரஸ்யமாக்கியுள்ளது. பாரம்பரிய கட்சிகளுக்கு இது ஒரு புதிய சவாலாகவும், தவெகவுக்கு வாய்ப்பாகவும் பார்க்கப்படுகிறது. தேர்தல் நெருங்கும் நிலையில், வெளிநாட்டில் இருந்து வரும் வாக்காளர்களின் எண்ணிக்கை மேலும் அதிகரிக்கும் என அரசியல் வட்டாரங்கள் தெரிவிக்கின்றன.