"இது சாதாரண பிரச்சனைதான், தானாக சரியாகிவிடும்" என அலட்சியப்படுத்தப்படும் சில அறிகுறிகள், எதிர்காலத்தில் ஏற்படக்கூடிய தீவிரமான உடல்நலப் பிரச்சனைகளுக்கான ஆரம்ப எச்சரிக்கையாக இருக்கலாம்.

எந்தவித உணவுக் கட்டுப்பாடும், உடற்பயிற்சியும் இல்லாமல் திடீரென உடல் எடை குறைவது தைராய்டு, சர்க்கரை நோய் அல்லது ஹார்மோன் மாற்றங்களின் அறிகுறியாக இருக்கலாம். அதேபோல், தொடர்ந்து மலச்சிக்கல், வயிற்றுப்போக்கு அல்லது மலத்தில் ரத்தம் போன்ற பிரச்சனைகள் ஏற்பட்டால் உடனடியாக மருத்துவ ஆலோசனை பெறுவது அவசியம்.

பல நாட்கள் நீடிக்கும் முதுகுவலி சாதாரண தசை வலியாக மட்டுமல்லாமல், சில நேரங்களில் சிறுநீரகம் தொடர்பான பிரச்சனைகளின் அறிகுறியாகவும் இருக்கலாம். மார்பில் ஏற்படும் அழுத்தம், அசௌகரியம் அல்லது வலி போன்றவற்றை புறக்கணிப்பது ஆபத்தானது. இதேபோல், சிறிய முயற்சியிலேயே அதிக மூச்சுத்திணறல் ஏற்படுவது இதயம் அல்லது நுரையீரல் சார்ந்த பாதிப்புகளுக்கான அறிகுறியாக இருக்கலாம்.

அடிக்கடி சிறுநீர் கழித்தல், சிறுநீர் கழிக்கும் போது எரிச்சல் போன்றவை புரோஸ்டேட் பிரச்சனை அல்லது நீரிழிவு நோயுடன் தொடர்புடையதாக இருக்கலாம். எப்போதும் உடல் சோர்வாகவும், ஆற்றல் குறைவாகவும் உணர்வது இரத்த சோகை, தூக்கமின்மை அல்லது தைராய்டு பிரச்சனைகளால் ஏற்படலாம். மேலும், நீண்டகால மன அழுத்தம் மற்றும் பதற்றம் உயர் ரத்த அழுத்தம் உள்ளிட்ட பல உடல்நல பாதிப்புகளை ஏற்படுத்தக்கூடும்.

இந்த அறிகுறிகள் அனைத்தும் பெரிய நோய்களின் அறிகுறிகளாகவே இருக்கும் என்று அச்சப்பட தேவையில்லை. ஆனால், அவை தொடர்ந்து நீடித்தாலோ அல்லது அதிகரித்தாலோ அலட்சியம் செய்யாமல் மருத்துவரை அணுகி உரிய பரிசோதனை செய்து கொள்வது மிகவும் முக்கியம்.