திமுகவின் அசைக்க முடியாத கோட்டையாகக் கருதப்பட்ட கொளத்தூர் தொகுதியில், அக்கட்சியின் தலைவர் மு.க.ஸ்டாலின் சந்தித்த எதிர்பாராத தோல்வி தமிழக அரசியல் களத்தில் பெரும் அதிர்வலைகளை ஏற்படுத்தியுள்ளது.

2011 முதல் தொடர்ந்து மூன்று முறை வெற்றி பெற்று, 2021-ல் முதலமைச்சராகப் பொறுப்பேற்ற பிறகும் இத்தொகுதியில் பல்வேறு நவீன வசதிகளைச் செய்திருந்த நிலையில், தமிழக வெற்றிக் கழக வேட்பாளர் வி.எஸ்.பாபுவிடம் அவர் தோற்றது அக்கட்சியினரைச் சோகத்தில் ஆழ்த்தியுள்ளது. இந்தச் சூழலில், தோல்விக்கான உண்மையான காரணங்களைக் கண்டறிய மு.க.ஸ்டாலினின் மனைவி துர்கா ஸ்டாலின் நேரடியாகக் களத்தில் இறங்கியுள்ளார்.

தனது பழைய தொடர்புகளைப் பயன்படுத்தி ரகசிய விசாரணையைத் தொடங்கியுள்ள துர்கா ஸ்டாலின், மகளிர் அணி நிர்வாகிகள் மற்றும் சமூக நல ஆர்வலர்களுடன் தனித்தனியாகப் பேசி தகவல்களைச் சேகரித்து வருகிறார். இந்த விசாரணையில், தொகுதி மக்கள் ஸ்டாலின் வீட்டிற்கு அனுப்பிய கோரிக்கை மனுக்கள் பலவும் படிக்கப்படாமலேயே அலட்சியப்படுத்தப்பட்டதாகக் குற்றச்சாட்டுகள் எழுந்துள்ளன. இது போன்ற நிர்வாகக் குறைபாடுகளே மக்களின் அதிருப்திக்கு முதன்மைக் காரணம் என்பது முதற்கட்ட ஆய்வில் தெரியவந்துள்ளது.

மேலும், கட்சி நிர்வாகிகள் கடந்த ஐந்து ஆண்டுகளாகத் தொகுதி மக்களைச் சரியாக ஒருங்கிணைக்காமல், வெளியூர்களிலிருந்து ஆட்களை அழைத்து வந்து கூட்டத்தைக் காட்டி தலைமையைத் தவறாக வழிநடத்தியது அம்பலமாகியுள்ளது. சேப்பாக்கம்-திருவல்லிக்கேணி தொகுதியில் உதயநிதிக்காகத் தேர்தல் பொறுப்பாளர்கள் வீடு வீடாகச் சென்று தீவிரப் பணியாற்றியது போல, கொளத்தூரில் எந்தவொரு ஆக்கப்பூர்வமான பணியும் நடைபெறவில்லை என்ற வேதனையான உண்மையைச் சொந்தக் கட்சியினரே துர்கா ஸ்டாலினிடம் முன்வைத்துள்ளனர்.

வாக்காளர் பட்டியலில் ஒரு லட்சத்திற்கும் அதிகமான பெயர்கள் நீக்கப்பட்ட விவகாரத்தில், அமைச்சர் சேகர்பாபுவின் பேச்சை நம்பிக் கொளத்தூரில் மீண்டும் போட்டியிட்டது தவறான முடிவு என்ற விமர்சனங்கள் ஒருபுறம் எழுந்துள்ளன. துர்கா ஸ்டாலின் சேகரித்துள்ள இந்தத் தகவல்கள் அனைத்தும் அறிவாலயத் தலைமைக்குத் தெரிவிக்கப்பட்டுள்ள நிலையில், கொளத்தூர் பகுதியில் மெத்தனமாகச் செயல்பட்ட மற்றும் தவறான தகவல்களை வழங்கிய முக்கிய நிர்வாகிகள் பலரின் பதவிகள் விரைவில் பறிக்கப்படலாம் என எதிர்பார்க்கப்படுகிறது.