வேலூர் மாவட்டம் அணைக்கட்டு சட்டமன்ற தொகுதிக்குட்பட்ட அகரம் அரசு கலை மற்றும் அறிவியல் கல்லூரிக்கு விளையாட்டு அரங்கம், மாணவ-மாணவியருக்கு தனித்தனி விடுதிகள் மற்றும் வகுப்பறைகள் உள்ளிட்ட அடிப்படை வசதிகளை ஏற்படுத்தித் தர வேண்டும் என திமுக சட்டமன்ற உறுப்பினர் வில்லவநாதன் கோரிக்கை முன்வைத்தார். இதற்குப் பதிலளித்த உயர்கல்வித்துறை அமைச்சர் விஸ்வநாதன், மாநிலத்தில் உள்ள கல்லூரிகளின் விளையாட்டு மைதான வசதிகள் மற்றும் உள்கட்டமைப்பை மேம்படுத்த ரூ.1,000 கோடி ஒதுக்கப்பட்டுள்ளதாகவும், விரைவில் உரிய நடவடிக்கை எடுக்கப்படும் என்றும் விளக்கம் அளித்தார்.

இருப்பினும், அமைச்சர் பதிலளிக்கும் போதே பிற விவரங்களையும் சேர்த்துப் பேச முற்பட்டதால், சபாநாயகர் மற்றும் பிற உறுப்பினர்கள் குறுக்கிட்டு, கேள்விக்குரிய குறிப்பிட்ட விவகாரத்துடன் பதில்களை நிறைவு செய்யுமாறு கேட்டுக்கொண்டனர். இதனைத் தொடர்ந்து அவையில் பேசிய எதிர்க்கட்சித் தலைவர் உதயநிதி ஸ்டாலின், “சட்டமன்ற உறுப்பினர் கல்லூரிக்கு அரங்கம் மட்டுமே கேட்டுள்ளார்; ஆனால் அமைச்சர் அளிக்கும் பதிலோ, யாரும் அவசரப்பட்டு கோரிக்கை வைத்துவிடாதீர்கள், யோசித்து கேளுங்கள் என்பது போல் இருக்கிறது” என நகைச்சுவையாகக் குறிப்பிட்டார். இதனால் சட்டப்பேரவையில் திடீரென சிரிப்பலை ஏற்பட்டது.

உதயநிதி ஸ்டாலினின் இந்த கிண்டலான கருத்தைக் கேட்டு அவையில் இருந்த உறுப்பினர்கள் அனைவரும் குலுங்கிச் சிரித்தனர். இதற்குப் பதிலளித்த அமைச்சர் விஸ்வநாதன், எதிர்க்கட்சித் தலைவர் மிகவும் அழகான கருத்தைப் பதிவு செய்திருப்பதாகக் கூறியதுடன், “அவையில் எதையும் பேசக்கூடாதா?” என்று கலகலப்பாகக் கேட்டார். அமைச்சரின் இந்த எதிர்பாராத பதில் அவையில் மீண்டும் சிரிப்பலையை ஏற்படுத்தியதுடன், சில விவாதங்களுக்கு மத்தியில் சட்டப்பேரவைச் சூழலை மிகவும் இயல்பாகவும் கலகலப்பாகவும் மாற்றியது.