புதிய ரேஷன் கார்டுக்கு விண்ணப்பிக்கத் திட்டமிடுபவர்கள் முதலில் சில அத்தியாவசிய ஆவணங்களைத் தயாராக வைத்திருக்க வேண்டும்.

குடும்பத் தலைவரின் பாஸ்போர்ட் அளவு புகைப்படம், குடும்ப உறுப்பினர்கள் அனைவரின் ஆதார் எண்கள் மற்றும் முகவரி சான்றிற்காக மின்சாரக் கட்டண ரசீது, எரிவாயு நுகர்வோர் அட்டை அல்லது வங்கி கணக்கு புத்தகம் ஆகியவற்றில் ஏதேனும் ஒன்று அவசியம். மிக முக்கியமாக, விண்ணப்பதாரரின் பெயர் ஏற்கனவே வேறு ஒரு ரேஷன் கார்டில் இருந்தால், அங்கிருந்து பெயர் நீக்கம் செய்யப்பட்டதற்கான சான்றிதழைப் பெற்றிருப்பது கட்டாயமாகும்.

விண்ணப்பிக்கும் முறையைப் பொறுத்தவரை, தமிழக அரசின் அதிகாரப்பூர்வ டிஎன்பிடிஎஸ் (www.tnpds.gov.in) இணையதளத்திற்குச் சென்று, அதில் ‘தமிழ்’ மொழியைத் தேர்வு செய்ய வேண்டும். முகப்புப் பக்கத்தில் உள்ள “மின்னணு அட்டை சேவைகள்” பிரிவில் “புதிய மின்னணு அட்டை விண்ணப்பிக்க” என்பதைத் தேர்ந்தெடுக்க வேண்டும். அங்கு குடும்பத் தலைவரின் பெயர், முகவரி போன்ற விவரங்களைத் தமிழ் மற்றும் ஆங்கிலத்தில் உள்ளீடு செய்து, புகைப்படம் மற்றும் முகவரிச் சான்றைப் பதிவேற்றம் செய்ய வேண்டும்.

தொடர்ந்து, “உறுப்பினரைச் சேர்க்க” என்ற பொத்தானைப் பயன்படுத்தி குடும்பத்தினர் அனைவரின் பெயர், பிறந்த தேதி மற்றும் ஆதார் விவரங்களை ஒவ்வொன்றாக இணைக்க வேண்டும். அதன் பிறகு, உங்களுக்குத் தேவையான அட்டை வகையை (அரிசி அல்லது சர்க்கரை அட்டை) தேர்வு செய்து, எரிவாயு இணைப்பு விவரங்களைக் குறிப்பிட வேண்டும். அனைத்துத் தகவல்களும் சரியாக இருப்பதை உறுதி செய்த பின் “பதிவு செய்” என்பதை கிளிக் செய்தால், உங்கள் விண்ணப்பம் சமர்ப்பிக்கப்பட்டு மொபைல் எண்ணிற்கு ஒரு குறிப்பு எண் (Reference Number) குறுஞ்செய்தியாக வரும்.

விண்ணப்பித்த 30 முதல் 60 நாட்களுக்குள் ஆவணங்கள் சரியாக இருக்கும் பட்சத்தில் உங்கள் விண்ணப்பம் பரிசீலிக்கப்பட்டு புதிய ரேஷன் அட்டை வழங்கப்படும். இணையதளத்திலேயே உங்கள் விண்ணப்பத்தின் நிலையை அவ்வப்போது சரிபார்த்துக் கொள்ளலாம். கூடுதல் சந்தேகங்களுக்கு 1967 அல்லது 1800-425-5901 என்ற இலவச உதவி எண்களைத் தொடர்பு கொள்ளலாம் அல்லது அருகிலுள்ள இ-சேவை மையங்களை அணுகிச் சேவையைப் பெறலாம்.