உலக கச்சா எண்ணெய் விநியோகத்தில் ஐந்தில் ஒரு பங்கு பயணிக்கும் மிக முக்கியமான பாதையான ஹார்முஸ் ஜலசந்தியில், தற்போது போர் மேகங்கள் சூழ்ந்துள்ளன.

வளைகுடா பிராந்தியத்தில் நிலவும் பதற்றங்களுக்கு இடையே, அந்த வழியாகச் செல்லும் கப்பல்களிடம் சுங்கக் கட்டணம் வசூலிக்கும் அதிரடித் திட்டத்தை ஈரான் அதிகாரப்பூர்வமாகத் தொடங்கியுள்ளது. இதற்காக ‘பாரசீக வளைகுடா ஜலசந்தி ஆணையம்’ என்ற புதிய அமைப்பை நிறுவியுள்ள ஈரான், ஒவ்வொரு கப்பலும் தங்களைப் பற்றிய 40-க்கும் மேற்பட்ட விரிவான தகவல்களை முன்கூட்டியே சமர்ப்பிக்க வேண்டும் என்று கட்டாயப்படுத்தியுள்ளது. இந்தத் தகவல்களில் ஏதேனும் முரண்பாடு இருந்தால் கப்பல்கள் சிறைபிடிக்கப்படும் என்ற ஈரானின் எச்சரிக்கை, சர்வதேசச் சந்தையில் கச்சா எண்ணெய் விலையை எகிற வைத்துள்ளது.

ஈரானின் இந்த புதிய விதிகளின்படி, கப்பல் உரிமையாளர்கள், காப்பீட்டு விவரங்கள் மற்றும் மாலுமிகளின் குடியுரிமை போன்ற தரவுகளை மின்னஞ்சல் வாயிலாகத் தாக்கல் செய்ய வேண்டும். குறிப்பாக, அமெரிக்காவின் பொருளாதாரத் தடைகளுக்கு ஆதரவு தெரிவிக்கும் நாடுகள் ஹார்முஸ் ஜலசந்தியைப் பயன்படுத்துவதில் கடுமையான சிக்கல்களைச் சந்திக்க நேரிடும் என ஈரான் வெளிப்படையாகவே மிரட்டல் விடுத்துள்ளது. ஓமன் நாட்டுடன் எல்லையைப் பகிர்ந்து கொள்வதால், வசூலிக்கப்படும் தொகையை ஓமனுடன் பகிர்ந்து கொள்ளவும் ஈரான் முன்வந்துள்ளது. அமெரிக்காவின் தொடர்ச்சியான பொருளாதார முற்றுகைகளுக்குப் பதிலடி கொடுக்கும் விதமாகவே ஈரானின் இந்த ‘நிழல் யுத்தம்’ பார்க்கப்படுகிறது.

இந்தியாவைப் பொறுத்தவரை, ஈரானுடனான சுமுகமான உறவு காரணமாக இந்தியக் கப்பல்கள் இந்தக் கட்டுப்பாடுகளில் இருந்து விலக்கு பெற்றுள்ளன. சீனா மற்றும் இந்தியா போன்ற நாடுகளின் கப்பல்கள் தடையின்றிச் செல்ல ஈரான் ஏற்கனவே அனுமதி வழங்கியுள்ளது. இருப்பினும், சர்வதேச அளவில் ஏற்படும் எரிசக்தித் தட்டுப்பாடு இந்தியாவையும் பாதிக்கக்கூடும் என்பதால், பிரதமர் நரேந்திர மோடி பெட்ரோல் மற்றும் டீசல் பயன்பாட்டைக் குறைக்க மக்களைக் கேட்டுக்கொண்டுள்ளார். தங்கம் வாங்குவதைத் தவிர்ப்பது மற்றும் அவசியமான இடங்களில் ‘வொர்க் ஃபிரம் ஹோம்’ முறையைப் பின்பற்றுவது போன்ற ஆலோசனைகள் மூலம் நாட்டின் அந்நியச் செலாவணி கையிருப்பை பாதுகாக்க அரசு முயன்று வருகிறது.

அமெரிக்காவின் மேலாதிக்கத்திற்கும் ஈரானின் பிடிவாதத்திற்கும் இடையே நடக்கும் இந்தப் ‘பவர் கேம்’, உலக நாடுகளின் எரிசக்தி பாதுகாப்பையே கேள்விக்குறியாக்கியுள்ளது. ஹார்முஸ் ஜலசந்தி வழியாகச் செல்லும் சரக்கு போக்குவரத்தில் ஏற்படும் சிறு தடங்கலும், சாமானிய மக்களின் சமையலறை வரை விலைவாசி உயர்வை ஏற்படுத்திவிடும். சர்வதேச நாடுகள் பேச்சுவார்த்தை மூலம் இந்த விவகாரத்திற்குத் தீர்வு காணாதவரை, வளைகுடா பிராந்தியத்தில் நிலவும் இந்தப் பதற்றம் உலகப் பொருளாதாரத்திற்கு ஒரு தீராத தலைவலியாகவே நீடிக்கும் என்பதில் ஐயமில்லை.