சிவகங்கை மாவட்ட திமுகவின் அசைக்க முடியாத தூணாகவும், அமைச்சராகவும் வலம் வந்த பெரியகருப்பன், திருப்பத்தூர் தொகுதியில் தமிழக வெற்றிக் கழக வேட்பாளரிடம் வெறும் ஒரே ஒரு வாக்கு வித்தியாசத்தில் தோல்வியடைந்தது ஒட்டுமொத்த தமிழக அரசியலையும் உலுக்கியுள்ளது.

கடந்த 2006-ம் ஆண்டு முதல் தொடர்ந்து நான்கு முறை இதே தொகுதியில் வெற்றி வாகை சூடியவர் பெரியகருப்பன். அடிமட்டத் தொண்டராகத் தொடங்கி, மாவட்டச் செயலாளர் மற்றும் அமைச்சர் எனப் படிப்படியாக உயர்ந்த இவரது கோட்டையாகக் கருதப்பட்ட திருப்பத்தூரில், இந்த முறை ஐந்தாவது வெற்றியைப் பதிவு செய்வார் என திமுகவினர் மிகுந்த நம்பிக்கையுடன் இருந்தனர்.

வாக்கு எண்ணிக்கை அன்று காலை முதலே பெரியகருப்பன் முன்னிலையில் இருந்து வந்தார். 20-வது சுற்று வரை தவெக வேட்பாளர் சீனிவாச சேதுபதியை விட சுமார் 5,000 வாக்குகள் அதிகம் பெற்று வெற்றியை நெருங்கிக் கொண்டிருந்தார். ஆனால், கடைசி கட்ட சுற்றுகளில் நிலைமை தலைகீழாக மாறியது. 26-வது சுற்றில் தவெக வேட்பாளர் 199 வாக்குகள் வித்தியாசத்தில் பெரியகருப்பனை முந்தினார். இதனால் வாக்கு எண்ணிக்கை மையத்தில் பதற்றம் தொற்றிக்கொண்டது. நள்ளிரவு வரை நீடித்த இந்த இழுபறியில், மின்னணு இயந்திரங்களில் ஏற்பட்ட தொழில்நுட்பக் கோளாறுகள் மற்றும் தபால் வாக்குகளை எண்ணுவதில் ஏற்பட்ட தாமதம் ஆகியவற்றால் இரு தரப்பினரிடையேயும் பெரும் திக் திக் நிமிடங்கள் நிலவின.

இறுதிச் சுற்றில் பழுதடைந்த மூன்று இயந்திரங்கள் சரிசெய்யப்பட்டு வாக்குகள் எண்ணப்பட்டபோது, நள்ளிரவைத் தாண்டியும் பரபரப்பு நீடித்தது. முடிவில், தவெக வேட்பாளர் சீனிவாச சேதுபதி 83,375 வாக்குகளும், அமைச்சர் பெரியகருப்பன் 83,374 வாக்குகளும் பெற்றதாக அறிவிக்கப்பட்டது. வெறும் ஒரு வாக்கு வித்தியாசத்தில் தனது வெற்றியைப் பறி கொடுத்ததை ஏற்க மறுத்த பெரியகருப்பன், மறுவாக்கு எண்ணிக்கை கோரினார். அதிகாரிகளால் மீண்டும் சரிபார்க்கப்பட்ட பின்னரும், அதே ஒரு வாக்கு வித்தியாசம் உறுதி செய்யப்பட்டதால், மாவட்ட ஆட்சியர் தவெக வேட்பாளரை வெற்றியாளராக அதிகாரப்பூர்வமாக அறிவித்தார்.

இந்தத் தோல்வி திமுக வட்டாரத்தில் பெரும் அதிர்ச்சியை ஏற்படுத்தியுள்ளது. அதிமுக கூட்டணி மற்றும் தவெக ஆகியவற்றுக்கு இடையேயான மும்முனைப் போட்டியில், புதிய கட்சியான தவெக அமைச்சரையே வீழ்த்தியது தேசிய அளவில் கவனத்தை ஈர்த்துள்ளது. இந்தத் தீர்ப்பை எதிர்த்து நீதிமன்றத்தில் வழக்கு தொடர பெரியகருப்பன் தரப்பு முடிவு செய்துள்ளதால், திருப்பத்தூர் தொகுதி தேர்தல் விவகாரம் இன்னும் முடிவுக்கு வராமல் சட்டப் போராட்டத்தை நோக்கி நகர்கிறது. பல தசாப்த கால அரசியல் அனுபவம் கொண்ட ஒரு மூத்த தலைவர், ஒரு சாதாரண வாக்காளரின் வாக்கு மதிப்பால் வீழ்ந்தது ஜனநாயகத்தின் வலிமையை உணர்த்துவதாக அரசியல் விமர்சகர்கள் கருதுகின்றனர்.