இங்கிலாந்தின் நாட்டிங்ஹாம் நகரைச் சேர்ந்த மிஷேல் மற்றும் லவினியா ஆஸ்போர்ன் சகோதரிகளின் கதை, மருத்துவ உலகின் ஆகச்சிறந்த அதிசயங்களில் ஒன்றாக மாறியுள்ளது.

கடந்த 50 ஆண்டுகளாகத் தங்களை இரட்டையர்கள் என்று கருதி வந்த இவர்களுக்கு, ஒரு டிஎன்ஏ பரிசோதனை மூலம் அவர்கள் இருவரும் ஒரே தாய்க்கும், வெவ்வேறு தந்தைக்கும் பிறந்தவர்கள் என்ற உண்மை தெரியவந்தது. “ஹெட்டெரோபேட்டர்னல் சூப்பர்ஃபெகுண்டேஷன்” (Heteropaternal Superfecundation) என்று அழைக்கப்படும் இந்த அரிய மருத்துவ நிகழ்வு, உலகளவில் இதுவரை 24 முறை மட்டுமே பதிவாகியுள்ளது; இது இங்கிலாந்தில் கண்டறியப்பட்ட முதல் சம்பவமாகக் கருதப்படுகிறது.

இந்த விசித்திரமான நிலை, ஒரு பெண் தனது மாதவிடாய் சுழற்சியில் இரண்டு கருமுட்டைகளை வெளியிடும்போது, அவை மிகக்குறுகிய கால இடைவெளியில் வெவ்வேறு ஆண்களின் விந்தணுக்களால் கருவுறுவதால் நிகழ்கிறது. நீண்ட காலமாகத் தங்களை வளர்த்த ஜேம்ஸ் என்பவரே தந்தை என நம்பி வந்த மிஷேலுக்கு, அவரது முகச்சாயலில் ஏற்பட்ட சந்தேகம் டிஎன்ஏ பரிசோதனைக்கு வழிவகுத்தது. அதன் முடிவில், மிஷேலின் தந்தை அலெக்ஸ் என்பதும், லவினியாவின் தந்தை ஆர்தர் என்பதும் உறுதியானபோது ஒட்டுமொத்த குடும்பமே அதிர்ச்சியில் உறைந்தது.