அரிசிபாளையத்தைச் சேர்ந்த ரமேஷ் என்பவர் தனது வீட்டின் மொட்டை மாடியில் உள்ள குடிநீர் தொட்டியைச் சுத்தம் செய்யத் திறந்தபோது துர்நாற்றம் வீசியுள்ளது. சந்தேகமடைந்து தொட்டியைச் சோதனையிட்டபோது, அதற்குள் சாக்கு மூட்டையில் மனித உடல் பாகங்கள் இருப்பது கண்டுபிடிக்கப்பட்டது. உடனடியாகப் பள்ளப்பட்டி காவல்துறையினருக்குத் தகவல் தெரிவிக்கப்பட்டதைத் தொடர்ந்து, அங்கு வந்த போலீசார் அப்பகுதியில் உள்ள 3 குடிநீர் தொட்டிகளில் சாக்கு மூட்டைகளில் அடைத்து வைக்கப்பட்டிருந்த உடல் பாகங்களைக் கைப்பற்றி தீவிர விசாரணை மேற்கொண்டனர்.

காவல்துறையினரின் முதற்கட்ட விசாரணையில், படுகொலை செய்யப்பட்டவர் சேலம் மேட்டுப்பட்டி தாதனூரைச் சேர்ந்த தங்கமணி (52) என்பது தெரியவந்தது. இவர் கடந்த ஆகஸ்ட் 28-ம் தேதி முதல் காணாமல் போனதாகக் கூறப்பட்ட நிலையில், அவரது சடலம் துண்டு துண்டாக வெட்டப்பட்டுக் குடிநீர் தொட்டிகளில் வீசப்பட்டுள்ளது உறுதி செய்யப்பட்டது. இந்த கொடூர சம்பவத்தில் தொடர்புடைய குற்றவாளிகளைக் கண்டறியத் தீவிர விசாரணை முடுக்கிவிடப்பட்டது.

விசாரணையின் முடிவில், இக்கொலை தொடர்பாகச் சொக்கம்பட்டியைச் சேர்ந்த நந்தினி (27), அஸ்தம்பட்டியைச் சேர்ந்த மாலிக் பாஷா (27) மற்றும் குரங்குசாவடியைச் சேர்ந்த சிவராமன் (29) ஆகிய 3 பேரை காவல்துறையினர் கைது செய்தனர். நந்தினியும் மாலிக் பாஷாவும் கடந்த 5 ஆண்டுகளாகக் காதலித்து வந்த நிலையில், அவர்களுக்கு ஏற்பட்ட பணத் தேவையை பூர்த்தி செய்ய இந்த கொடூர திட்டத்தைத் தீட்டியுள்ளனர். பழக்கமான தங்கமணியைக் கொலை செய்து அவரிடமிருந்த நகைகளைக் கொள்ளையடிக்க முடிவு செய்த இவர்கள், திட்டமிட்டபடி இக்கொடூரத்தைச் செய்து முடித்துள்ளனர்.

வீட்டு வேலை வாங்கித் தருவதாக ஆசை வார்த்தை கூறி தங்கமணியை ஆகஸ்ட் 28 அன்று நந்தினியின் சித்தி வீட்டிற்கு வரவழைத்துள்ளனர். அங்கு மாலிக் பாஷா மற்றும் அவரது நண்பர் சிவராமன் உதவியுடன், தங்கமணியைக் கட்டையால் தலையில் தாக்கிக் கொடூரமாகக் கொலை செய்து நகைகளைக் கொள்ளையடித்துள்ளனர். பின்னர், பிடிபடாமல் இருக்க உடலைத் துண்டு துண்டாக வெட்டி சாக்கு மூட்டைகளில் கட்டி, அருகில் உள்ள மாடி வீடுகளின் குடிநீர் தொட்டிகளில் போட்டு மறைத்துள்ளனர். குற்றச்செயலில் ஈடுபட்ட 3 பேரையும் கைது செய்த காவல்துறையினர், அவர்களை நீதிமன்றத்தில் ஆஜர்படுத்திச் சிறையில் அடைத்தனர்.