மறைந்த தேமுதிக தலைவர் விஜயகாந்தால் ‘ரமணா’ திரைப்படத்தின் மூலம் திரையுலகிற்கு அறிமுகப்படுத்தப்பட்ட மீசை ராஜேந்திரன், கடந்த 31 ஆண்டுகளாக விஜயகாந்தின் ரசிகர் மன்றத்திலும், 21 ஆண்டுகளாக தேமுதிகவிலும் தீவிரமாகப் பணியாற்றி வந்தவர். நெல்லை மற்றும் தென்காசி மாவட்டங்களில் தேமுதிக சார்பில் சட்டமன்றத் தேர்தல்களில் போட்டியிட்ட இவர், விஜயகாந்த் மறைவுக்குப் பிறகும் பிரேமலதா தலைமையிலான கட்சியில் தொடர்ந்து பயணித்து வந்தார்.

கட்சியிலிருந்து விலகியது குறித்து பிரேமலதாவிற்கு கடிதம் எழுதியுள்ள மீசை ராஜேந்திரன், தனது 31 ஆண்டுகால விசுவாசத்திற்கு உரிய மரியாதையும் மதிப்பும் அளிக்கப்படவில்லை என்ற ஆதங்கத்தை வெளிப்படுத்தியுள்ளார். விஜயகாந்த் மீதோ அல்லது அவரது குடும்பத்தினர் மீதோ தனக்கு எவ்வித மனவருத்தமும் இல்லை என்று குறிப்பிட்ட அவர், தற்போது கட்சியில் உள்ள நிர்வாகச் சூழல் சரியாக இல்லை என்றும், நிர்வாகப் பொறுப்புகளில் இருப்பவர்களின் செயல்பாடுகள் அதிருப்தி அளிப்பதாகவும் தெரிவித்துள்ளார். குறிப்பாக, விஜயகாந்த் இருந்தவரை திமுக கூட்டணியை தவிர்த்து வந்த நிலையில், தற்போது தேமுதிக முதல்முறையாக திமுகவுடன் கூட்டணி அமைத்திருப்பது குறிப்பிடத்தக்க மாற்றமாகக் கருதப்படுகிறது.

திமுக கூட்டணியில் தேமுதிகவிற்கு ஒரு ராஜ்யசபா சீட் மற்றும் 10 சட்டமன்றத் தொகுதிகள் ஒதுக்கப்பட்ட நிலையில், ராஜ்யசபா உறுப்பினராக பிரேமலதாவின் தம்பி எல்.கே.சுதீஷ் தேர்வு செய்யப்பட்டுள்ளார். மேலும், சட்டமன்றத் தேர்தலில் பிரேமலதா மற்றும் விஜய பிரபாகரன் ஆகியோருக்கு வாய்ப்பு வழங்கப்பட்டுள்ள சூழலில், தனக்குப் போட்டியிட வாய்ப்பு மறுக்கப்பட்டதே மீசை ராஜேந்திரனின் இந்த முடிவுக்கு முக்கியக் காரணமாகப் பார்க்கப்படுகிறது. தனது விசுவாசம் புறக்கணிக்கப்பட்டதாக உணர்ந்த அவர், முன்னாள் அமைச்சர் கடம்பூர் ராஜு முன்னிலையில் இன்று அதிமுகவில் தன்னை இணைத்துக் கொண்டார்.

விஜயகாந்தின் மறைவுக்குப் பிறகு தேமுதிகவின் முக்கிய முகங்கள் மாற்று முகாமிற்குச் செல்வது அக்கட்சியினரிடையே அதிர்ச்சியை ஏற்படுத்தியுள்ளது. “கேப்டன் இல்லை என்றால் நான் இல்லை” என்று உருக்கமாகக் குறிப்பிட்ட மீசை ராஜேந்திரன், நிர்வாக ரீதியான முரண்பாடுகளால் கனத்த இதயத்துடன் வெளியேறுவதாகக் கூறியுள்ளார். எடப்பாடி பழனிசாமியைச் சந்தித்து அதிமுகவில் இணைந்ததன் மூலம், தனது அரசியல் பயணத்தின் அடுத்த கட்டத்தை அவர் உறுதி செய்துள்ளார். இது வரவிருக்கும் தேர்தல் களத்தில் தேமுதிகவிற்கு ஒரு பின்னடைவாகவே அரசியல் விமர்சகர்களால் பார்க்கப்படுகிறது.