குறிப்பாக, தமிழக வெற்றிக் கழகத் தலைவர் விஜய் அரசியலில் மறைந்த விஜயகாந்த் போன்று ஒரு மிகப்பெரிய தாக்கத்தை ஏற்படுத்துவார் என்று அவர் கணித்துள்ளார். மக்கள் ஏற்கனவே திமுக ஆட்சியில் குமுறிக்கொண்டிருப்பதால், ஆட்சி மாற்றத்தை விரும்பும் சூழலில் விஜய்யின் அரசியல் வருகை திமுகவிற்குப் பெரும் பாதிப்பை ஏற்படுத்தும் என்று அவர் தெரிவித்தார்.

முதல்வர் ஸ்டாலின் முன்வைத்த விமர்சனங்களுக்குப் பதிலடி கொடுத்த தினகரன், குற்றவாளி என்பதற்கும் அக்யூஸ்ட் (Accused) என்பதற்கும் வித்தியாசம் தெரியாமல் முதல்வர் பேசுகிறார் என்று சாடினார். திமுக ஆட்சியில் லஞ்சமும் ஊழலும் மலிந்துவிட்டதாகவும், ‘திராவிட மாடல்’ என்பது தற்போது ‘சீட்டிங் மாடல்’ ஆக மாறிவிட்டதாகவும் அவர் விமர்சித்தார். தோல்வி பயத்தின் காரணமாகவே முதல்வர் இது போன்ற தேவையற்ற கருத்துக்களைக் கூறி வருவதாக அவர் குற்றம் சாட்டினார்.

தமிழக பாஜக தலைவர் அண்ணாமலை தேர்தலில் போட்டியிடாதது குறித்த கேள்விக்கு, அது அண்ணாமலையின் தனிப்பட்ட முடிவு என்று தினகரன் விளக்கமளித்தார். அண்ணாமலை தன்னிடம் பேசியபோது, தேர்தலில் போட்டியிடாமல் தமிழகம் முழுவதும் தேசிய ஜனநாயகக் கூட்டணி (NDA) வேட்பாளர்களுக்காகப் பிரச்சாரம் செய்யப்போவதாகக் கூறியதை அவர் சுட்டிக்காட்டினார். அண்ணாமலை குறித்து சமூக வலைதளங்களில் பரப்பப்படும் யூகங்கள் மற்றும் வதந்திகள் அனைத்தும் பொய் என்றும் அவர் தெளிவுபடுத்தினார்.

தமிழகத்தில் சட்டம் ஒழுங்கு சீர்குலைந்துள்ளதாகவும், பெண் குழந்தைகளுக்கு எதிரான குற்றங்கள் அதிகரித்து வருவதாகவும் கவலை தெரிவித்த தினகரன், இதையெல்லாம் விடுத்து அண்ணாமலை போட்டியிடாததையே பெரிய செய்தியாக விவாதிப்பது தேவையற்றது என்றார். தான் தேர்தலில் போட்டியிடாதது குறித்துத் தொண்டர்களுக்கு வருத்தம் இருந்தாலும், தனது முடிவை அவர்கள் ஏற்றுக்கொண்டதாகக் குறிப்பிட்ட அவர், வரும் தேர்தலில் அதிமுக தலைமையிலான கூட்டணி தனிப் பெரும்பான்மையுடன் ஆட்சி அமைப்பதே தனது விருப்பம் என்றும் தெரிவித்தார்.

சிறுபான்மையின மக்களின் வாக்குகளைப் பெறுவதற்காக பாஜகவை ஒரு பூச்சாண்டியாகக் காட்டி திமுக பிரச்சாரம் செய்து வருவதாக அவர் விமர்சித்தார். மேலும், சசிகலா மற்றும் ராமதாஸ் கூட்டணி தங்களுக்கு எந்தப் பாதிப்பையும் ஏற்படுத்தாது என்றும், அத்தி பூத்தாற்போல அவர்கள் ஏதோ ஒரு தொகுதியில் சில வாக்குகளைப் பெறலாமே தவிர, பெரிய மாற்றத்தை உருவாக்க முடியாது என்றும் கூறினார். தவெக தனித்துப் போட்டியிடுவதால் ஏற்படும் பாதிப்பை ஈடுகட்டவே திமுக கூடுதல் தொகுதிகளில் களம் இறங்கியுள்ளதாகவும் அவர் சுட்டிக்காட்டினார்.