சமீபத்தில், 11 வயது சிறுமி ஒருவரின் தாய், தனது மகளின் டிக்டாக் மற்றும் பிற குறுஞ்செய்திகளைப் படித்து அதிர்ச்சியடைந்தார். அந்தப் பதிவுகளில், அச்சிறுமி தான் ஒல்லியாகத் தெரிய வேண்டும் என்பதற்காக வேண்டுமென்றே பட்டினி கிடப்பது குறித்தும், உணவு சாப்பிடாமல் இருப்பதைப் பெருமையாகவும் தனது தோழிகளிடம் பகிர்ந்துகொண்டுள்ளார்.

தனது 11 வயது மகள் உடல்நலனைக் கெடுத்துக்கொள்ளும் வகையில் டிக்டாக் வீடியோக்களுக்காகப் பட்டினி கிடப்பதைக் கண்டு வேதனையடைந்த அந்தத் தாய், இந்தச் செயலுக்காக அவளுக்கு எப்படித் தண்டனை வழங்குவது என இணையவாசிகளிடம் ஆலோசனை கேட்டுள்ளார். “டிக்டாக் போன்ற செயலிகளால் எனது மகள் தவறான வழியில் செல்கிறாள்; அவளை எப்படித் திருத்துவது? அவளுக்கு என்ன மாதிரியான தண்டனை கொடுத்தால் இந்தச் செயலிலிருந்து அவளை மீட்க முடியும்?” என அவர் சமூக வலைத்தளத்தில் கேள்வியெழுப்பியிருந்தார்.

இந்தச் செய்தியைப் பார்த்த இணையவாசிகள் பலரும் அந்தத் தாய்க்கு பல்வேறு அறிவுரைகளை வழங்கி வருகின்றனர். பெரும்பாலானோர், “இது தண்டனை வழங்குவதற்கான நேரம் அல்ல; உங்கள் மகளுக்கு இப்போது உங்களின் அரவணைப்பும் மனநல ஆலோசனையும்தான் தேவை. அவளிடம் அன்பாகப் பேசி, உடல்நலத்தின் முக்கியத்துவத்தைப் புரிய வையுங்கள். டிக்டாக் போன்ற செயலிகளில் இருந்து அவளை விலக்கி வைக்க, ஸ்மார்ட்போனுக்குப் பதிலாக அடிப்படை வசதிகள் மட்டுமே உள்ள செல்போனை வழங்குங்கள்” என்று கருத்து தெரிவித்து வருகின்றனர். குழந்தைகளின் மொபைல் பயன்பாட்டைக் கண்காணிக்க வேண்டியதன் அவசியத்தையும் இது உணர்த்துகிறது.