தமிழ்நாடு அரசியல் களத்தில் புதுவரான விஜயின் தமிழக வெற்றிக் கழகம் தான் போட்டியிட்ட முதல் தேர்தலிலேயே அமோக வெற்றி பெற்று நாட்டை திரும்பி பார்க்க வைத்துள்ளது.
234 தொகுதிகளும் கடந்த ஏப்ரல் 23ம் தேதி வாக்குப் பதிவு நடைபெற்றது. அதன் வாக்கு எண்ணிக்கை இன்று நடைபெற்று முடிவுகள் வெளியாகி வருகின்றன.
அதில் விஜயின் தவெக 107 (TVK Vijay) தொகுதிகளில் முன்னிலை பெற்று தனிப்பெரும் கட்சியாக உருவெடுத்துள்ளது. 50 ஆண்டுகளுக்கு மேலாக ஆண்ட, ஆளும் கட்சிகளான திமுக 58 தொகுதிகளிலும், அதிமுக 48 தொகுதிகளிலும் முன்னிலை பெற்று இரண்டாம் மற்றும் மூன்றாம் இடத்திற்கு தள்ளப்பட்டுள்ளன. இந்நிலையில், தவெகவின் இந்த அசத்தல் வெற்றிக்கு பிரதமர் நரேந்திர மோடி தொடங்கி, பல்வேறு தலைவர்கள் தங்கள் வாழ்த்துக்களை தெரிவித்துள்ளனர்.
விஜய்க்கு பிரதமர் மோடி வாழ்த்து
தமிழ்நாடு தேர்தல் முடிவுகள் குறித்து பிரதமர் நரேந்திர மோடி வெளியிட்ட வாழ்த்து பதிவில் (PM Modi Wishes TVK) கூறியதாவது, "தமிழகச் சட்டமன்றத் தேர்தல்களில் NDA-வை ஆதரித்த தமிழக வாக்காளர்களுக்கு எங்களது நன்றிகள். மக்களின் பிரச்சினைகளைக் களைவதிலும், அவர்களின் வாழ்க்கைத் தரத்தை மேம்படுத்துவதிலும் நாங்கள் எப்போதும் முன்னணியில் இருப்போம். அத்துடன், சிறப்பான தேர்தல் வெற்றியை பதிவு செய்த தவெகவிற்கு எங்களது வாழ்த்துகள்.
தமிழகத்தின் முன்னேற்றத்தையும், மக்களின் நலனையும் முன்னெடுத்துச் செல்வதில் மத்திய அரசு தனது அனைத்து முயற்சிகளையும் முழுமையாக மேற்கொள்ளும்" என்றார்.
அதேபோல, மக்களவை எதிர்க்கட்சித் தலைவரும் காங்கிரஸ் கட்சியின் முன்னணி தலைவருமான ராகுல் காந்தியும் விஜயிடம் தொலைபேசி வாயிலாக தொடர்பு கொண்டு வாழ்த்து தெரிவித்துள்ளார். இது தொடர்பாக காங்கிரஸ் கட்சியின் பொதுச்செயளாலர் ஜெய்ராம் ரமேஷ் வெளியிட்டுள்ள பதிவில் கூறியதாவது, மக்களவை எதிர்க்கட்சித் தலைவர் ராகுல் காந்தி, தேர்தல் முடிவுகள் குறித்து மம்தா பானர்ஜி மற்றும் மு.க. ஸ்டாலின் ஆகியோரிடம் தொடர்பு கொண்டு பேசினார். மேலும், தவெக தலைவர் விஜய் அவர்களைத் தொடர்புகொண்டு, அவரது கட்சியின் செயல்பாடுகளுக்காகப் பாராட்டுகளையும் தெரிவித்தார்" என்றுள்ளார்.
: விஜய் முதல்வராக தவெகவுக்கு ஆதரவு தருமான காங்கிரஸ்.. ராகுல் என்ன முடிவெடுக்க போகிறார்?
ஆந்திர பிரதேச முதலமைச்சர் சந்திரபாபு நாயுடு வெளியிட்டுள்ள வாழ்த்து பதிவில், "தமிழ்நாடு சட்டமன்றத் தேர்தலில் விஜய் அவர்கள் ஈட்டியிருக்கும் மகத்தான வெற்றிக்கு எனது வாழ்த்துகளைத் தெரிவித்துக்கொள்கிறேன். தமிழ்நாட்டு மக்களுக்குச் சேவையாற்றுவதிலும், அவர்களின் முன்னேற்றம் மற்றும் நல்வாழ்விற்குப் பொருள்செறிந்த பங்களிப்பை வழங்குவதிலும், அவருக்கு அனைத்து வெற்றிகளும் கிட்ட வாழ்த்துகிறேன்." என்றுள்ளார்.
ஆந்திர பிரதேச முதலமைச்சரின் மகனும் அமைச்சருமான நாரா லோகேஷ் விஜய்க்கு வாழ்த்து தெரிவித்துள்ளார். அவர் தனது எக்ஸ் வலைத்தளப் பதிவில் கூறுகையில், "தமிழகத் தேர்தல் களத்தில் வியக்கத்தக்க வகையில் அறிமுகமாகியுள்ள தவெக தலைவர் விஜய்க்கு பாராட்டுகள். இந்தத் தேர்தல் முடிவு, மாநில வாக்காளர்களின் மாறிவரும் எதிர்பார்ப்புகளைப் பிரதிபலிப்பதோடு, தமிழக அரசியல் களத்திற்கு ஒரு புதிய பரிமாணத்தையும் சேர்த்துள்ளது. பொதுவாழ்வில் அடியெடுத்து வைத்து, மக்களின் எதிர்பார்ப்புகளைப் பொறுப்புணர்வுடனும் அர்ப்பணிப்புடனும் நிறைவேற்றிட அவர் மேற்கொள்ளும் முயற்சிகளுக்கு எனது மனமார்ந்த நல்வாழ்த்துகள்" என்றுள்ளார்.
: கொளத்தூரில் முதல்வர் ஸ்டாலினை வீழ்த்திய விஜயின் தவெக.. யார் இந்த வி.எஸ். பாபு?
அதேபோல, ஆந்திர பிரதேசத்தின் முன்னாள் முதலமைச்சரும், YSRCP கட்சியின் தலைவருமன ஜெகன் மோகன் ரெட்டியும் தனது வாழ்த்தை தெரிவித்துள்ளார். அவர் தனது எக்ஸ் வலைத்தளப் பதிவில், "எனது அன்புச் சகோதரர் விஜய்க்கு, ஒரு சிறப்பான மற்றும் மனமார்ந்த வாழ்த்து! உங்களின் முதல் தேர்தலிலேயே தனிப்பெரும் கட்சியாக உருவெடுத்திருப்பது மிகவும் பாராட்டுக்குரியது. சேவைக்கான இந்தப் புதிய அத்தியாயத்தைத் நீங்கள் தொடங்கும்போது, உங்களுக்கு அளவற்ற வலிமையும் வெற்றியும் கிடைக்க வாழ்த்துகிறேன். இறைவன் துணை நிற்கட்டும்" என்றுள்ளார்.
மக்கள் நீதி மய்யம் கட்சியின் தலைவரும் மாநிலங்களவை உறுப்பினருமான கமல்ஹாசன் வெளியிட்டுள்ள எக்ஸ் வலைத்தளப் பதிவில் கூறியதாவது, "தங்களுடைய முதல் தேர்தலிலேயே மக்களுடைய நம்பிக்கையைப் பெற்று பெருவெற்றி பெற்றிருக்கும் தவெக தலைவர் விஜய்க்கும், அவரது கட்சியினருக்கும் என்னுடைய பாராட்டுகள். மக்கள் பணி சிறக்க என்னுடைய வாழ்த்துகள்" என்றுள்ளார்.