2026 தமிழ்நாடு சட்டப்பேரவை தேர்தல் களம் முக்கிய கட்டத்தை எட்டியுள்ளது. அனைத்து கட்சிகளும் வேட்பாளர்களை அறிவித்து பிரச்சாரத்தை தீவிரப்படுத்தியுள்ளன.

அத்துடன் வேட்புமனு தாக்கல் மார்ச் 30ம் தேதி தொடங்கியுள்ள நிலையில், பெரும்பாலான வேட்பாளர்கள் இந்த பணியை நிறைவு செய்துள்ளனர்.

தேர்தல் ஆணையத்தினிடம் வேட்பாளர்கள் தாக்கல் பிரமாண பத்திரத்தில் அவர்களின் சொத்து விவரம், கல்வித் தகுதி, குற்றப் பிண்ணனி உள்ளிட்ட விவரங்கள் இடம் பெற்றுள்ளன. இந்நிலையில், தேர்தல் ஆணையத்தின் ECINET தளத்தைப் பயன்படுத்தி உங்கள் வேட்பாளரின் கல்வித் தகுதிகள் மற்றும் குற்றப் பின்னணிகளைத் தெரிந்து கொள்ளும் வசதி ஏற்பாடு செய்யப்பட்டுள்ளது.

சட்டப்பேரவை பொதுத் தேர்தல் மற்றும் இடைத் தேர்தல்கள்
இது தொடர்பாக தேர்தல் ஆணையம் வெளியிட்டுள்ள செய்திக் குறிப்பில் கூறியதாவது: அசாம், கேரளா, புதுச்சேரி, தமிழ்நாடு மற்றும் மேற்கு வங்காள சட்டப்பேரவைகளுக்கான பொதுத் தேர்தல் மற்றும் கோவா, குஜராத், கர்நாடகா, மகாராஷ்டிரா, நாகாலாந்து மற்றும் திரிபுரா ஆகிய மாநிலங்களில் உள்ள 8 (எட்டு) சட்டப்பேரவைத் தொகுதிகளுக்கான இடைத்தேர்தல் அட்டவணையை இந்தியத் தேர்தல் ஆணையம் (ECI) மார்ச் 15, 2026 அன்று அறிவித்தது.

ஏப்ரல் 9, 2026 அன்று வாக்குப்பதிவு நடைபெறவுள்ள அஸ்ஸாம், கேரளா மாநிலங்கள் மற்றும் புதுச்சேரி யூனியன் பிரதேசத்தின் சட்டப்பேரவைத் தேர்தல்கள் மற்றும் 4 மாநிலங்களில் நடைபெறும் இடைத்தேர்தல்களில் மொத்தம் 1,955 வேட்பாளர்கள் களத்தில் உள்ளனர்.

மேற்கு வங்காளம் (கட்டம்-I மற்றும் II) மற்றும் தமிழ்நாடு சட்டப்பேரவைத் தேர்தல்களுக்கான வேட்புமனுத் தாக்கல் தொடங்கியுள்ளது. வேட்புமனுக்களைத் திரும்பப் பெறுவதற்கான கடைசி நாள் தமிழ்நாடு மற்றும் மேற்கு வங்காளத்திற்கு (கட்டம்-I) ஏப்ரல் 9 ஆகும், மேலும் மேற்கு வங்காளத்திற்கு (கட்டம்-II) ஏப்ரல் 13 ஆகும்.

ECI-இன் KYC வசதி
வேட்பாளர்களின் குற்றவியல் வழக்குகள், சொத்துக்கள் மற்றும் கடன்கள், கல்வித் தகுதிகள் மற்றும் வேட்பாளர்களின் அதிகாரப்பூர்வ சமூக ஊடக கணக்குகள் பற்றிய தகவல்களைப் பெற குடிமக்கள் ECINet-ன் "உங்கள் வேட்பாளரைத் தெரிந்துகொள்ளுங்கள் (KYC)" தொகுதியைப் பயன்படுத்தலாம்.

பயனர்கள் ECINet-ன் "தேர்தல் நடத்தை (Conduct of Elections)" பகுதியின் கீழ் KYC தொகுதியை அணுகலாம். வேட்பாளர்கள் சமர்ப்பித்த முழுமையான உறுதிமொழிப் பத்திரத்தையும் (படிவம் 26) அவர்கள் ECINet மூலம் பதிவிறக்கம் செய்யலாம்.

ECINET என்பது உலகின் மிகப்பெரிய ஜனநாயகத்தின் அனைத்து தேர்தல் சேவைகளையும் ஒரே தடையற்ற தளத்தில் ஒருங்கிணைக்கும் உலகின் மிகப்பெரிய தேர்தல் சேவை தளமாகும். இது இந்தியத் தேர்தல் ஆணையத்தின் 40-க்கும் மேற்பட்ட செயலிகள் மற்றும் இணையதளங்களை ஒருங்கிணைக்கிறது.

: விஷு பண்டிகை.. சென்னையில் இருந்து கேரளாவுக்கு சிறப்பு ரயில் சேவை அறிவிப்பு

ECINET வாக்காளர்களுக்கு வாக்காளர் பதிவு, வாக்காளர் பட்டியல் தேடல், உங்கள் விண்ணப்பங்களைக் கண்காணித்தல், தேர்தல் அதிகாரிகளுடன் தொடர்புகொள்ளுதல், வாக்குச்சாவடி நிலை அலுவலருடன் (BLO) அழைப்பை முன்பதிவு செய்தல், e-EPIC பதிவிறக்கம், வாக்குப்பதிவு போக்குகள் மற்றும் குறைகளைத் தீர்ப்பது போன்ற சேவைகளை ஒரே பாதுகாப்பான தளத்தில் வழங்குகிறது.

இது நிகழ்நேரத் தகவல் அணுகல் மற்றும் புகார் தீர்வுக்கான ஒற்றைச் சாளரத் தளத்தையும் வழங்குகிறது. இதில் விதிமீறல்களைப் புகாரளிக்க cVIGIL மற்றும் மாற்றுத்திறனாளிகளுக்கான அணுகக்கூடிய தேர்தல் சேவைகளை உறுதி செய்ய Saksham போன்ற கருவிகளும் அடங்கும்.