தமிழக அரசியலில் தற்போது அதிகமாக பேசப்படும் இளம் அரசியல் முகங்களில் ஒருவராக கீர்த்தனா உருவெடுத்துள்ளார்.

சிவகாசி தொகுதியில் வெற்றி பெற்று அந்த தொகுதியின் முதல் பெண் சட்டமன்ற உறுப்பினராக சாதனை படைத்துள்ள அவர், தற்போது தமிழக வெற்றிக் கழகத்தின் முதல் பெண் அமைச்சராகவும் புதிய வரலாறு எழுதியுள்ளார். தேர்தல் பிரச்சாரத்தின் போது செங்கல்லை கையில் தூக்கிக்காட்டி பேசிய வீடியோ சமூக வலைதளங்களில் வைரலான பிறகே கீர்த்தனா என்ற பெயர் தமிழகம் முழுவதும் கவனம் பெற்றது.

சிவகாசியில் வரலாறு படைத்த கீர்த்தனா

கடந்த சட்டப்பேரவைத் தேர்தலில் சிவகாசி தொகுதியில் போட்டியிட்ட கீர்த்தனா, அதிமுக மற்றும் காங்கிரஸ் வேட்பாளர்களுக்கு கடும் சவால் ஏற்படுத்தினார். பல ஆண்டுகளாக முக்கிய கட்சிகளின் ஆதிக்கத்தில் இருந்த அந்த தொகுதியில் புதிய முகமாக களமிறங்கிய அவர், மக்கள் மத்தியில் நேரடி பிரச்சாரம் மூலம் பெரும் வரவேற்பைப் பெற்றார்.

இறுதியில் 68 ஆயிரத்திற்கும் மேற்பட்ட வாக்குகள் பெற்று வெற்றி பெற்ற கீர்த்தனா, சிவகாசியின் முதல் பெண் சட்டமன்ற உறுப்பினர் என்ற பெருமையை பெற்றார். முன்னாள் அமைச்சர் ராஜேந்திர பாலாஜி உள்ளிட்ட முக்கிய தலைவர்களை பின்னுக்கு தள்ளிய அவரது வெற்றி அரசியல் வட்டாரங்களில் பெரிய அதிர்வை ஏற்படுத்தியது.

- புதுச்சேரி எம்எல்ஏ டூ சென்னை அமைச்சர்.. விஜய்யின் ஆஸ்தான தளபதி.. யார் இந்த புஸ்ஸி ஆனந்த் தெரியுமா?

அரசியல் ஆலோசகரில் இருந்து அமைச்சர் வரை

விருதுநகர் மாவட்டத்தை சேர்ந்த கீர்த்தனா, கல்வியிலும் சிறந்து விளங்கியவர். கணிதம் மற்றும் புள்ளியியல் துறைகளில் உயர்கல்வி முடித்துள்ள அவர், அரசியலுக்கு வருவதற்கு முன்பு தேர்தல் ஆலோசனை பணிகளில் ஈடுபட்டிருந்தார்.

பல முக்கிய அரசியல் கட்சிகளின் தேர்தல் திட்டங்களில் பணியாற்றிய அனுபவம் அவருக்கு இருந்ததாக கூறப்படுகிறது. குறிப்பாக தேர்தல் வியூகங்களை உருவாக்கும் பணிகளில் அவர் முக்கிய பங்கு வகித்துள்ளார். அதன்பிறகு தமிழக வெற்றிக் கழகத்தில் இணைந்த அவர், குறுகிய காலத்திலேயே முக்கிய தலைவர்களின் நம்பிக்கையை பெற்றார்.

செங்கல் பிரச்சாரம் எப்படி வைரலானது?

தேர்தல் பிரச்சாரத்தின் போது "விருதுநகருக்கு பல் மருத்துவக் கல்லூரி எங்கே?" என்று கேட்டு செங்கல்லை தூக்கிக்காட்டிய கீர்த்தனாவின் பேச்சு சமூக வலைதளங்களில் வேகமாக பரவியது. இளைஞர்கள் மத்தியில் அவரது பிரச்சார முறை அதிக கவனத்தை ஈர்த்தது. அந்த நிகழ்வுக்குப் பிறகு கீர்த்தனா பெயர் மாநிலம் முழுவதும் பேசப்பட்டதுடன், தவெக பிரச்சாரத்தின் முக்கிய முகமாகவும் மாறினார். அவரது பேச்சு நடை, தன்னம்பிக்கை மற்றும் தரவுகளுடன் பேசும் திறன் ஆகியவை பலரின் கவனத்தை பெற்றன.