தமிழக அரசியல் வரலாற்றில் எம்.ஜி.ஆர் பிறகு ஒரு பெரிய தாக்கத்தை விஜய் ஏற்படுத்தியுள்ளார். 2026 சட்டமன்றத் தேர்தலில் தனித்து களமிறங்கிய தமிழக வெற்றிக்கழகம் தேர்தல் வாக்கு எண்ணிக்கையில் தொடர்ந்து முன்னிலையில் உள்ளது.

தவெக பொதுகூட்டம், பிரச்சாரங்கள் விஜய் பேசும் போது எம்ஜிஆரை போலவே திரைத்துறையில் இருந்து அரசியலுக்கு வந்துள்ளதாகவும், அவரை போன்று வெற்றி வாகை சூடி தமிழக அரசியலில் சரித்திரம் படைப்பேன் என்று விஜய் கூறி வந்தார். மதுரை மாநாட்டில் தமிழ்நாட்டின் முன்னாள் முதலமைச்சர்கள் அண்ணா மற்றும் எம்ஜிஆருடன் விஜய் கட் அவுட்கள் வைத்தார்.

எம்.ஜி.ஆருடன் உடன் எல்லாம் விஜய்-யை ஓப்பிடாதீங்க என்று அதிமுகவினர் போர்க்கொடி தூக்கினர். எம்.ஜி.ஆரின் வரலாறு தெரியுமா எனக் கேள்வி எழுப்பியிருந்தனர். அதிமுக பொதுச்செயலாளர் எடப்பாடி பழனிசாமி ஒரு கூட்டத்தில், "சினிமாவில் அரசியலைப் புகுத்தி வெற்றி கண்ட ஒரே தலைவர் நம் எம்ஜிஆர் மட்டுமே. சினிமாவில் அசைக்க முடியாத சூப்பர் ஸ்டார். அவர் நிஜமாகவே உச்சத்தில் இருக்கும்போது அரசியலுக்கு வந்தவர். இன்று யார் யாரோ, திரைப்படத்தில் நடித்துவிட்டு எம்ஜிஆரைப் போல கனவு காண்கிறார்கள். ஒருபோதும் நனவாகாது.
புரட்சித் தலைவர் எம்ஜிஆர் அவர்கள் உயிரோடு இருந்தபோது கொடுத்துக் கொடுத்து சிவந்த கரங்களுக்குச் சொந்தக்காரர். இந்த மண்ணில் மறைந்தாலும் அவர் இன்றைக்கும் மக்கள் மனதில் வாழ்ந்துக்கொண்டு இருக்கிறார்." என விமர்சித்தார்.

திமுக ஆட்சியை பிடிக்க காரணமாக இருந்தவர் எம்.ஜி.ஆர்

திமுக 1967ல் ஆட்சியைப் பிடிக்கக் காரணமாக இருந்தவர் எம்ஜிஆர். எம்ஜிஆர் சுடப்பட்டு கழுத்தில் கட்டு போட்ட போஸ்டர் தமிழகம் முழுவதும் ஒட்டப்பட்டது. எம்ஜிஆரின் போஸ்டரைப் பார்த்து திமுகவை மக்கள் ஆட்சிக் கட்டிலில் அமர்த்தினார்கள். அண்ணா மறைவுக்குப் பின்னர் கருணாநிதி முதல்வர் ஆவதற்கும், 1971ல் திமுக இரண்டாவது முறை ஆட்சி அமைப்பதற்கும் காரணமானவர் அண்ணா, கருணாநிதி உள்ளிட்ட தலைவர்களுடன் நட்பு கொண்டிருந்த எம்.ஜி.ஆர் 1950களின் தொடக்கத்திலேயே திமுகவில் இணைந்தார். பேரறிஞர் அண்ணா சொன்ன கருத்தையெல்லாம் சினிமாவில் எளிமையாகச் சொன்னவர் எம்ஜிஆர்.தன்னுடைய திரைப்படங்களில் திராவிட இயக்கம், திமுகவின் கொள்கைகளை பேசினார். திமுகவுக்காக அப்போதிலிருந்து தேர்தல்களில் பணியாற்றியுள்ளார்.

திமுக 1967ல் ஆட்சியைப் பிடிக்கக் காரணமாக இருந்தவர் எம்ஜிஆர். இதனால் அவருக்கு சட்டமன்ற மேலவை உறுப்பினர் பதவியை வழங்கினார் அண்ணா. அண்ணாவின் மறைவுக்கு பிறகு கருணாநிதிக்கும் எம்.ஜி.ஆர்-க்கும் இடையே பிளவு ஏற்பட்டது. தனது ஆதரவாளர்களுடன் திமுகவில் இருந்து வெளியேறி 1972-ல் அண்ணா திராவிட முன்னேற்ற கழகத்தை தொடங்கினார். 1973-ல் நடந்த இடைத்தேர்தலில் அதிமுக சார்பில் களமிறங்கிய மாயத்தேவர் வெற்றிப்பெற்றார். 1977 சட்டமன்ற தேர்தலில் அதிமுக 130 இடங்களைப் பிடித்தது. கட்சி தொடங்கி ஐந்து ஆண்டுகளிலேயே எம்ஜிஆர் ஆட்சியைப் பிடித்தார். அதன்பின்னர் அரசியல் அவர் செய்தது சரித்திரம்.

அதேபோன்று 49 வருடங்களுக்கு பிறகு 2026ல் விஜய் ஆட்சியை பிடிப்பது உறுதியாகி உள்ளது. முதலமைச்சர் மு.க.ஸ்டாலின், திமுக அமைச்சர்கள் என பலரும் பின்னடைவை சந்தித்து வருகின்றனர். தவெக தலைவர் விஜய் போட்டியிட்ட பெரம்பூர் மற்றும் திருச்சி கிழக்கும் தொகுதிகளில் முன்னிலையில் உள்ளார். தவெக தனிப்பெரும்பான்மையுடன் ஆட்சி அமைத்தால் 60 ஆண்டுகளுக்கு பிறகு திராவிட கட்சிகள் அல்லாத ஒரு கட்சி ஆட்சியில் அமரும்.

எம்.ஜி.ஆரைப் போலவே அடித்தட்டு மக்களின் ஆதரவையும், குறிப்பாகப் பெண்களின் வாக்குகளை அறுவடை செய்துள்ளார். எம்.ஜி.ஆர் அன்று எப்படித் தனது முதல் தேர்தலிலேயே முதல்வராகி சரித்திரம் படைத்தாரோ, அதேபோல 2026-ல் விஜய் முதல்வராவது ஏறக்குறைய உறுதியாகிவிட்டது. தமிழக வெற்றிக்கழகம் தற்போது 108 தொகுதிகளில் முன்னிலையில் உள்ளது. தமிழகத்தில் தனிப்பெரும்பான்மையுடன் ஆட்சி அமைக்க, மொத்தம் உள்ள 234 சட்டமன்றத் தொகுதிகளில் 118 தொகுதிகளில் வெற்றி பெற வேண்டும்.