TVK Vijay Native Village : தமிழக சட்டமன்றத் தேர்தலில் போட்டியிட்டு தனது முதல் முயற்சியிலேயே வெற்றி பெற்று முதலமைச்சராக இருக்கிறார் தமிழக வெற்றிக் கழகத்தின் தலைவரான விஜய்..
எம்.ஜி.ஆர் பாணியில் விஜய் வெற்றி
சினிமா துறையில் சூப்பர் ஸ்டாராக ஜொலித்த அவர் மக்கள் திலகம் எம்.ஜி.ஆர் பாணியில், இன்னும் சொல்லப்போனால் எம்ஜிஆரின் சாதனையையே மிஞ்சும் அளவுக்கு தமிழக அரசியல் வரலாற்றில் சரித்திர வெற்றியை படைத்து தமிழ்நாட்டின் ஆட்சியை கைப்பற்றி இருக்கிறார்.
தமிழ்நாட்டை பல ஆண்டு காலமாக மாறி மாறி ஆட்சி செய்து வந்த திராவிட கட்சிகளான திமுகவுக்கும், அதிமுகவுக்கும் ஒரு சேர அதிர்ச்சி வைத்தியம் அளித்து மக்களின் பேராதரவுடன் தமிழ்நாட்டின் அரியணையில் அமர்ந்திருக்கிறார் விஜய். அவரது இந்த விஸ்வரூப வெற்றியை விஜயின் பூர்வீக கிராமத்து மக்கள் பெரும் மகிழ்ச்சியுடன் கொண்டாடி வருகின்றனர்.
சொந்த ஊரில் மகிழ்ச்சி
தமிழ்நாட்டின் முதலமைச்சர் ஆக நாளை (மே 7) விஜய் பொறுப்பேற்க இருக்கும் நிலையில், அவரது பூர்வீக மாவட்டமான ராமநாதபுரம் மக்கள் பெரும் மகிழ்ச்சி அடைந்துள்ளனர்.
தமிழ்நாடு சட்டமன்றத்துக்குள் நுழையும் தவெகவின் 108 எம்.எல்.ஏக்கள் யார்?
விஜயின் தந்தை இயக்குனர் எஸ்.ஏ. சந்திரசேகர் ராமநாதபுரம் அருகே உள்ள திருப்புல்லாணி ஒன்றியத்துக்கு உட்பட்ட ரெகுநாதபுரத்தை அடுத்துள்ள முத்துப்பேட்டை என்ற கிராமத்தை சேர்ந்தவர் ஆவார். எஸ் ஏ சந்திரசேகரின் தாயார் அரசு பள்ளியின் ஆசிரியையாக வேலை பார்த்தவர். இவர் முத்துப்பேட்டை மற்றும் சத்திரக்குடி அடுத்துள்ள காமன்கோட்டை ஆகிய ஊர்களில் உள்ள அரசுப் பள்ளிகளில் வேலை பார்த்தவர்.
ஸ்டேஷன் மாஸ்டர்
அதே போல எஸ்.ஏ. சந்திரசேகரின் தந்தை சேனாதிபதி, ரயில்வே துறையில் ஸ்டேஷன் மாஸ்டராக பணிபுரிந்தவர். இவர் சத்திரக்குடி, தங்கச்சிமடம் ஆகிய ஊர்களில் ஸ்டேஷன் மாஸ்டராக பணிபுரிந்துள்ளார். அந்த வகையில் சந்திரசேகர் ராமநாதபுரத்தில் படித்து வளர்ந்தவர். அதன் பின்னரே சென்னைக்கு வந்து திரைத்துறையில் நுழைந்து, சினிமா டைரக்டராக வெற்றி பெற்றார்.
சந்திரசேகர் இயக்குனராகி சென்னையில் வசித்து வந்த போதிலும், அவரது தந்தை சேனாதிபதி முத்துப்பேட்டை கிராமத்தில் வசித்துள்ளார். அவரது கல்லறை முத்துப்பேட்டை தேவாலயத்தில் உள்ளது. இந்த கல்லறைக்கு அவ்வப்போது இயக்குனர் சந்திரசேகர் வந்து அஞ்சலி செலுத்தி விட்டு செல்வதாக அப்பகுதி மக்கள் கூறுகின்றனர். சந்திரசேகர உடன் அவரது மகன் விஜய்யும் தனது 10வது வயதில் தனது தாத்தாவின் கல்லறைக்கு வந்து சென்றதாக அந்த ஊரில் வசிக்கும் சிலர் கூறுகின்றனர்.
தவெக அமைச்சரவை உத்தேச பட்டியல்.. விஜயின் 20 பேர் டீம்.. மே 7-ல் தமிழக முதல்வராக விஜய் பதவியேற்பு?
பூர்விக கிராமத்தினரின் விருப்பம்
என்னதான் விஜய் சென்னையில் பிறந்து, படித்து வளர்ந்தவராக இருந்தாலும், அவரது பூர்வீகம் ராமநாதபுரம் மாவட்டம் முத்துப்பேட்டை கிராமம் ஆகும். (TVK Vijay Native ) அந்த வகையில் ராமநாதபுரம் மாவட்டத்தை பூர்வீகமாகக் கொண்ட விஜய் முதலமைச்சர் ஆக பொறுப்பேற்க இருப்பதை நினைத்து முத்துப்பேட்டை மட்டுமல்லாது ராமநாதபுரம் மாவட்ட மக்களுமே மகிழ்ச்சி அடைந்துள்ளனர். விஜய் முதலமைச்சர் ஆன பிறகு அவரது சொந்த கிராமமான முத்துப்பேட்டைக்கு வர வேண்டும் என அந்த கிராமத்து மக்கள் தங்களது விருப்பத்தை தெரிவித்து வருகின்றனர்.
3வது முதலமைச்சர்
ஒருங்கிணைந்த ராமநாதபுரம் மாவட்டமானது இன்றைய சிவகங்கை, விருதுநகர் ஆகிய மாவட்டங்களையும் உள்ளடக்கியதாக இருந்தது. அவ்வாறு ஒருங்கிணைந்த ராமநாதபுரம் மாவட்டமாக இருந்த காலகட்டத்தில் பி.எஸ்.குமாரசாமி ராஜா, பெருந்தலைவர் காமராஜர் ஆகியோர் தமிழக முதலமைச்சர் ஆக பொறுப்பு வகித்து பெருமை சேர்த்துள்ளனர்.
1985 ஆம் ஆண்டில் தான் ராமநாதபுரத்தில் இருந்து பிரிக்கப்பட்டு விருதுநகர் தனி மாவட்டமானது. அந்த வகையில் பார்த்தால் ராமநாதபுரம் மாவட்டத்தைச் சேர்ந்த 3வது நபராக விஜய் தமிழ்நாட்டின் முதலமைச்சராக பொறுப்பேற்க இருக்கிறார்.
ஏற்கனவே ராமநாதபுரம் மாவட்டம் ராமேஸ்வரத்தைச் சேர்ந்த அப்துல் கலாம், நாட்டின் குடியரசுத் தலைவர் பதவியை அலங்கரித்தவர் என்பது ராமநாதபுரம் மாவட்டத்திற்கு கூடுதல் சிறப்பாக அமைந்துள்ளது.