முன்னணி வாகன உற்பத்தி நிறுவனமான டிவிஸ் மோட்டார்ஸ், மார்கெட்டில் ஒரு புத்தம் புதிய ஸ்கூட்டரை அறிமுகப்படுத்தியுள்ளது.
ஒரே சார்ஜில் 212 கிலோ மீட்டர் வரை பயணிக்கும் திறன் கொண்ட டிவிஎஸ் ஐ-கியூப் (TVS iQube) பைக்கின் மூலம், எலக்ட்ரிக் ஸ்கூட்டர் பிரிவில் அந்நிறுவனம் ஒரு புதிய சாதனையைப் படைத்துள்ளது. இதன் விளைவாக, அந்நிறுவனத்தின் முதன்மை மாடலானடிவிஎஸ் ஐ-கியூபின் விற்பனை, கடந்த 2026 ஆம் ஆண்டு பிப்ரவரி மாதத்தில் விற்பனையில் மிகப்பெரிய வளர்ச்சியை பெற்றது. ரஷ்லன் என்ற இணையதளம் வெளியிட்ட சமீபத்திய புள்ளிவிவரங்களின்படி, கடந்த 2025 ஆம் ஆண்டோடு ஒப்பிடுகையில், இந்த ஆண்டில் ஐ-கியூபின் விற்பனை முன்னெப்போதும் இல்லாத அளவுக்கு உயர்ந்துள்ளது.
குறிப்பாக கடந்த பிப்ரவரி 2025ல் வெறும் 23,581 யூனிட்டுகளாக இருந்த ஐ-கியூபின் விற்பனை, பிப்ரவரி 2026-இல் 38,054 யூனிட்டுகளாக உயர்ந்திருப்பது தெரியவருகிறது. அதாவது, ஒரே ஆண்டிற்குள் சுமார் 14,473 கூடுதல் ஸ்கூட்டர்கள் விற்பனையாகியுள்ளன. அதன் சிறப்பான அம்சங்களின் துணையுடன், 61.38% என்ற குறிப்பிடத்தக்க வளர்ச்சி விகிதத்தைப் பதிவு செய்துள்ளது. இதன் விளைவாக, நாட்டின் அதிகம் விற்பனையாகும் எலக்ட்ரிக் ஸ்கூட்டர்களின் பட்டியலில் இது முதலிடத்தைப் பிடித்துள்ளது.
நாட்டின் முதல் 10 ஸ்கூட்டர்களின் பட்டியலை ஆய்வு செய்யும்போது, டிவிஎஸ் ஐ-கியூப் குறிப்பிடத்தக்க வகையில் 4வது இடத்தைப் பிடித்துள்ளது தெரியவருகிறது. முதல் 3 இடங்களை ஹோண்டா ஆக்டிவா, டிவிஎஸ் ஜூப்பிட்டர், சுசூகி அக்சஸ் போன்ற பெட்ரோலில் இயங்கும் ஸ்கூட்டர்கள் ஆக்கிரமித்துள்ளன. இருப்பினும், எலக்ட்ரிக் வாகனப் பிரிவில், ஐகியூப் முதல் 5 இடங்களுக்குள் வந்து, இந்த பாரம்பரிய மாடல்களுக்குக் கடும் போட்டியை அளித்து வருகிறது. இந்திய வாகன சந்தையில் எதிர்காலத்தில் குறிப்பிடத்தக்க மாற்றங்கள் நிகழவிருப்பதை இது உணர்த்துவதாக நிபுணர்கள் கருத்து தெரிவிக்கின்றனர்.
டிவிஎஸ் ஐகியூப் ஸ்கூட்டர் தற்போது மூன்று முக்கிய வேரியண்டுகளில் விற்பனைக்குக் கிடைக்கிறது. அடிப்படை மாடலான ஐகியூப், 2.2 kW முதல் 3.5 kW வரையிலான மூன்று பேட்டரி ஆப்சன்களை வழங்குகிறது. இவை 94 கி.மீ முதல் 145 கி.மீ வரையிலான பயணத் தொலைவை அளிக்கின்றன. ஐ-கியூப் எஸ் என்ற மாடல் 145 கி.மீ பயணத் தொலைவை வழங்கும் நிலையில், டாப் மாடலான ஐ-கியூப் எஸ்டி 5.3 kW பேட்டரியின் துணையுடன் 212 கி.மீ பயணத் தொலைவை வழங்குவதாக நிறுவனம் குறிப்பிடுகிறது.
விலையைப் பொறுத்தவரை, டிவிஎஸ் ஐகியூபின் அடிப்படை மாடலின் விலை ரூ.1.08 லட்சம் முதல் தொடங்குகிறது. இருப்பினும், battery-only service mode என்பதன் கீழ் இதை வாங்கத் தேர்ந்தெடுப்பவர்களுக்கு, இது வெறும் ரூ. 59,999க்குக் கிடைக்கிறது. இந்தச் சேவை முறையின் கீழ், வாடிக்கையாளர்கள் மாதந்தோறும் ஒரு கட்டணத்தைச் செலுத்த வேண்டும். இதற்கென ரூ.1,202 சந்தா கட்டணம் பொருந்தும்.