வன்னியர்களுக்கான 10.5 சதவீத உள் ஒதுக்கீடு தொடர்பான விவாதத்தின்போது, திமுக தலைவர் குடும்பத்தைச் சேர்ந்த ஒருவர் நீதிமன்றத்தில் வழக்கு தொடர்ந்ததாக சி.வி.சண்முகம் கூறியதாக திமுக தரப்பில் எதிர்ப்பு தெரிவிக்கப்பட்டது.

திமுக உறுப்பினர்கள் அந்தக் குற்றச்சாட்டை அவைக்குறிப்பில் இருந்து நீக்க வேண்டும் என வலியுறுத்தினர். திமுக கொறடா எ.வ.வேலு பேசுகையில், சட்டப் பாதுகாப்புடன் வன்னியர்களுக்கு 10.5 சதவீத இடஒதுக்கீடு வழங்க வேண்டும் என்பதே திமுகவின் நிலைப்பாடு என தெரிவித்தார்.

இதற்கு பதிலளித்த சி.வி.சண்முகம், குறிப்பிட்ட நபரின் பெயரிலேயே வழக்கு தொடரப்பட்டு, அதில் வெற்றி பெறப்பட்டதாக கூறினார்.

முன்னாள் முதல்வர் பழனிசாமி பேசுகையில், அதிமுக ஆட்சிக் காலத்தில் 10.5 சதவீத இடஒதுக்கீடு வழங்கப்பட்டதாகவும், ஓய்வுபெற்ற நீதிபதி தலைமையில் குழு அமைக்கப்பட்டதாகவும் தெரிவித்தார். ஆட்சி மாற்றத்துக்குப் பிறகு அந்த நடவடிக்கைகள் தொடரப்படவில்லை என்றும் குற்றம்சாட்டினார்.

இதனிடையே திமுக உறுப்பினர் மெய்யநாதன், திமுக தலைவர் குடும்பத்தைச் சேர்ந்தவர் வழக்கு தொடர்ந்ததாக கூறுவது உண்மைக்கு புறம்பானது என எதிர்ப்பு தெரிவித்தார். பாமக உறுப்பினர் கணேஷ்குமார், சாதிவாரி கணக்கெடுப்புக்கும் 10.5 சதவீத இடஒதுக்கீட்டுக்கும் நேரடி தொடர்பில்லை என்றும், உச்சநீதிமன்றம் கோரும் தரவுகள் வழங்கப்படாததால் மக்கள் பாதிக்கப்பட்டுள்ளதாகவும் தெரிவித்தார்.

இறுதியில், திமுக முன்னாள் அமைச்சர் கூறிய விளக்கம் சரி என ஏற்றுக்கொண்ட சி.வி.சண்முகம், தான் முன்வைத்த குற்றச்சாட்டை திரும்பப் பெற்றுக்கொள்வதாக அறிவித்தார்.