BCI Seeks Withdrawal Of Judicial Work of AP High Court Judge: ఆంధ్రప్రదేశ్ హైకోర్టులో చోటుచేసుకున్న ఒక వివాదాస్పద ఘటనపై భారత బార్ కౌన్సిల్ (BCI) తీవ్రంగా స్పందించింది.

యువ న్యాయవాదిని పోలీసు కస్టడీకి పంపాలని ఆదేశించిన హైకోర్టు న్యాయమూర్తిపై చర్యలు తీసుకోవాలని కోరుతూ భారత ప్రధాన న్యాయమూర్తి (CJI)కి లేఖ రాసింది.

ఆంధ్రప్రదేశ్ హైకోర్టులో ఒక యువ న్యాయవాది పట్ల అనుచితంగా వ్యవహరించి, పోలీసు కస్టడీకి ఆదేశించిన న్యాయమూర్తి జస్టిస్ టి. రాజశేఖరరావుపై చర్యలు తీసుకోవాలని భారత బార్ కౌన్సిల్ (BCI) డిమాండ్ చేసింది. కోర్టు విచారణ సమయంలో ఒక ఉత్తర్వు ప్రతిని సమర్పించలేదనే కారణంతో 24 గంటల పాటు పోలీసు కస్టడీకి ఆదేశించడం న్యాయ వర్గాల్లో తీవ్ర కలకలం రేపింది. ఈ ఘటనపై తక్షణమే జోక్యం చేసుకోవాలని కోరుతూ బి.సి.ఐ చైర్మన్, సీనియర్ అడ్వకేట్ మనన్ కుమార్ మిశ్రా సుప్రీంకోర్టు ప్రధాన న్యాయమూర్తికి లేఖ రాశారు.

కోర్టు హాల్లో యువ న్యాయవాదిని మందలిస్తూ, పోలీసు కస్టడీకి పంపుతామని బెదిరించిన వీడియో సోషల్ మీడియాలో వైరల్ అయ్యింది. ఆ న్యాయవాది పదేపదే క్షమాపణలు కోరినప్పటికీ, న్యాయమూర్తి వినకుండా కస్టడీకి ఆదేశించడంపై బి.సి.ఐ తీవ్ర అభ్యంతరం వ్యక్తం చేసింది. ఈ చర్య న్యాయవ్యవస్థకు ఉండాల్సిన సంయమనం, నిష్పాక్షికత , న్యాయవాద వృత్తి గౌరవానికి విరుద్ధమని లేఖలో పేర్కొన్నారు. కేవలం ఒక విధానపరమైన లోపం జరిగినందుకు యువ న్యాయవాదిని జైలుకు పంపాలని చూడటం ప్రాథమికంగా అత్యంత అనుచితం అని బి.సి.ఐ స్పష్టం చేసింది.