Telangana Formation Day Janasena Meet: ఆంధ్రప్రదేశ్ ఉపముఖ్యమంత్రి, జనసేన అధినేత పవన్ కళ్యాణ్ జూన్ 2న హైదరాబాద్లో నిర్వహించ తలపెట్టిన తెలంగాణ నవనిర్మాణ సంకల్ప సభ కు సైబరాబాద్ పోలీసులు అనుమతి నిరాకరించారు.

తెలంగాణాలో కూడా పార్టీ శ్రేణుల్లో ఉత్సాహం నింపేందుకు గచ్చిబౌలి వేదికగా ఈ భారీ సభకు ప్లాన్ చేశారు. అయితే, చివరి నిమిషంలో పోలీసులు పర్మిషన్ రిజెక్ట్ చేయడంతో జనసేన కేడర్ తీవ్ర దిగ్భ్రాంతికి లోనైంది.

పవన్ కళ్యాణ్ హైదరాబాద్ సభకు పోలీసుల బ్రేక్!

తెలంగాణలో జనసేన పార్టీ ఉనికిని చాటడంతో పాటు, రాబోయే జీహెచ్ఎంసీ ఎన్నికలను టార్గెట్ చేస్తూ పవన్ కళ్యాణ్ వ్యూహాత్మకంగా ఈ సభకు శ్రీకారం చుట్టారు. అయితే, జూన్ 2వ తేదీన తెలంగాణ ఆవిర్భావ దినోత్సవం సందర్భంగా రాష్ట్ర ప్రభుత్వం అధికారికంగా పెద్ద ఎత్తున వేడుకలు నిర్వహిస్తుండటంతో పాటు శాంతిభద్రతల సమస్యలు, ట్రాఫిక్ ఇబ్బందులను సాకుగా చూపుతూ పోలీసులు ఈ సభకు అనుమతి నిరాకరించారు. గచ్చిబౌలి ఏరియాలో భారీగా జనసమీకరణ జరిగితే ఐటీ కారిడార్లో ట్రాఫిక్ స్తంభించిపోయే ప్రమాదం ఉందన్నది పోలీసుల వాదన.

రాజకీయ వ్యూహమా? ప్రభుత్వ ఒత్తిడా?

పోలీసుల నిర్ణయం వెనుక గట్టి రాజకీయ వ్యూహం ఉందనే ఆరోపణలు జనసేన శ్రేణుల నుంచి వినిపిస్తున్నాయి. గత రెండు రోజులుగా తెలంగాణ రవాణా శాఖ మంత్రి పొన్నం ప్రభాకర్ తో పాటు కాంగ్రెస్ శ్రేణులు, పలువురు మేధావులు పవన్ కళ్యాణ్ సభను తీవ్రంగా వ్యతిరేకిస్తున్నారు. తెలంగాణ సెంటిమెంట్ను దెబ్బతీసేలా గతంలో పవన్ చేసిన వ్యాఖ్యలకు క్షమాపణ చెప్పిన తర్వాతే ఇక్కడ సభ పెట్టుకోవాలని మంత్రి పొన్నం డిమాండ్ చేశారు. ప్రభుత్వం కావాలనే పోలీసు యంత్రాంగం ద్వారా సభను అడ్డుకుందనే విమర్శలు వస్తున్నాయి.