వృత్తిపరంగా మోడ్రన్‌గా కనిపించడం వేరు... మనిషి లోపల భక్తి ఉండటం వేరు అని ప్రియాంకా చోప్రా ప్రూవ్ చేశారు. ఇన్‌స్టాగ్రామ్‌లో ఆవిడ తాజాగా షేర్ చేసిన వీడియో చూస్తే ఎవరైనా ఆ మాటే అంటారు. అమ్మాయి మాలతీ మేరీకి మంగళ శ్లోకాలు నేర్పిస్తున్నారు ప్రియాంకా చోప్రా.

సర్వ మంగళ మాంగళ్యే...
అమ్మాయితో కలిసి దుర్గ సప్తశతి!
సౌండ్ ఆన్ చేసి వీడియో చూడమని సోమవారం రాత్రి (ఆగస్టు 2, 2026న) ఇన్‌స్టాలో ప్రియాంకా చోప్రా ఓ వీడియో షేర్ చేశారు. ''నాలో రెండు వ్యక్తిత్వాలు ఉన్నాయి. ఒకటి... మామ (అంటే అమ్మ). రెండు... మామసీటా (సరదా మనిషి)'' అని వీడియోపై క్యాప్షన్ ఇచ్చారు.

వీడియోలో ఏముంది? అనే విషయానికి వస్తే... మొదట అమ్మాయి మాలతీ మేరీ చోప్రా జోనాస్ (Malti Marie Chopra Jonas)తో కలిసి మంగళ శ్లోకం చదువుతూ కనిపించారు. ఆ తర్వాత వెస్ట్రన్ మ్యూజిక్ ప్లే అవుతుంటే స్నేహితుల మధ్య డ్యాన్స్ చేస్తూ కనిపించారు. ప్రియాంకా చోప్రాలో రెండు పర్సనాలిటీస్ చూశారు ప్రేక్షకులు. అయితే... అందులో భారతీయులకు ఎక్కువగా నచ్చినది మాత్రం మొదట మంగళ శ్లోకమే.

'సర్వ మంగళ మాంగళ్యే శివే సర్వార్థ సాధికే...
శరణ్యే త్ర్యంబకే గౌరీ నారాయణి నమోఽస్తు తే'
- ఇదీ అమ్మాయి మాలతీతో కలిసి ప్రియాంక చెప్పిన శ్లోకం. ఆ వీడియోలో ఒక్క లైన్ మాత్రమే ఉంది. కానీ, పూర్తి శ్లోకం ఇది.

దేవీ మాహాత్మ్యం (దుర్గ సప్తశతి)లోని ప్రసిద్ధ మంగళ శ్లోకంలో ఒక భాగాన్ని ప్రియాంకా చోప్రా చదివారు. అమ్మాయికి నేర్పిస్తున్నారు. తెలుగు సంప్రదాయం ప్రకారం ఇప్పుడు ఆషాడ మాసం. కానీ, ఉత్తరాది సంప్రదాయం ప్రకారం శ్రావణ మాసం వచ్చింది. అక్కడ గౌరీ పూజలు చేస్తుంటారు. అందులో భాగంగా అమ్మాయికి శ్లోకాన్ని నేర్పినట్టు ఉన్నారు. అదీ సంగతి.