ఆర్టికల్ 142 ప్రకారం సుప్రీంకోర్టు ఇచ్చిన ఈ ఆదేశాలు, లైంగిక వృత్తిని కేవలం ఒక సామాజిక కోణంలోనే కాకుండా, పౌర హక్కుల కోణంలో చూడాలని స్పష్టం చేశాయి. అయితే, చట్టబద్ధత, నేరపూరితం కాకుండా చూడటం మధ్య ఉన్న గీతను అర్థం చేసుకోవడం ఇక్కడ చాలా ముఖ్యం.

గౌరవప్రదమైన జీవన హక్కు ఆర్టికల్ 21

రాజ్యాంగంలోని ఆర్టికల్ 21 ప్రతి పౌరుడికి ప్రసాదించిన వ్యక్తిగత స్వేచ్ఛ , గౌరవప్రదమైన జీవన హక్కు సెక్స్ వర్కర్లకు కూడా వర్తిస్తుందని కోర్టు నొక్కి చెప్పింది. మేజర్లు అయి ఉండి, తమ అంగీకారంతో లైంగిక వృత్తిని నిర్వహిస్తున్న వారి పట్ల పోలీసులు అమానవీయంగా ప్రవర్తించకూడదని సుప్రీంకోర్టు స్పష్టం చేసింది. వృత్తి ఏదైనప్పటికీ, వారి దేహంపై వారికి పూర్తి హక్కు ఉంటుందని, పోలీసు దాడుల సమయంలో వారిని నేరస్థులుగా పరిగణించి వేధించడం చట్టవిరుద్ధమని కోర్టు తేల్చిచెప్పింది.

సెక్స్ వర్కర్ల గుర్తింపు - పౌర హక్కులు

సామాజికంగా వెలివేతకు గురవుతున్న సెక్స్ వర్కర్లకు పౌర గుర్తింపు కల్పించేందుకు సుప్రీంకోర్టు కీలక ఆదేశాలు జారీ చేసింది. నివాస ధృవీకరణ పత్రాలు లేకపోయినా, వారిని ఒక ప్రత్యేక కేటగిరీ కింద పరిగణించి, తక్షణమే ప్రభుత్వ గుర్తింపు కార్డులు జారీ చేయాలని UIDAI యూనిక్ ఐడెంటిఫికేషన్ అథారిటీ ఆఫ్ ఇండియా కి ఆదేశాలు ఇచ్చింది. ఇది కేవలం కార్డు జారీ మాత్రమే కాదు, రేషన్ కార్డులు, బ్యాంక్ ఖాతాలు, యు ఓటు హక్కు వంటి కనీస సౌకర్యాల కల్పనలో వారిని భాగస్వామ్యం చేయడం ద్వారా ప్రజాస్వామ్య గుర్తింపు ఇవ్వడం ఈ తీర్పులోని అసలు ఉద్దేశం.

ITPA యాక్ట్ - చట్టపరమైన చిక్కుముడులు

భారతదేశంలో సెక్స్ వర్క్ పూర్తిగా చట్టబద్ధమా? అంటే కాదు అనే చెప్పాలి. ఇమ్మోరల్ ట్రాఫిక్ (ప్రివెన్షన్) యాక్ట్, 1956 (ITPA) ప్రకారం.. లైంగిక వృత్తిని ప్రైవేట్ గా నిర్వహించడం నేరం కాదు. కానీ, వ్యభిచార గృహాలు నడపడం, పబ్లిక్ ప్రదేశాలలో కస్టమర్లను ఆకర్షించడం, పింపింగ్, మైనర్లను ఈ వృత్తిలోకి లాగడం వంటివి ఇప్పటికీ కఠినమైన శిక్షార్హమైన నేరాలు. సుప్రీంకోర్టు తీర్పు ఈ చట్టాన్ని రద్దు చేయలేదు, కానీ అమలు తీరులో మానవత్వాన్ని జత చేయాలని ఆదేశించింది. బాధితులను నేరస్థుల నుండి వేరు చేయడమే పోలీసుల ప్రాథమిక విధి కావాలని పేర్కొంది.

మీడియా , పోలీసు యంత్రాంగానికి హెచ్చరిక

లైంగిక వృత్తిలో ఉన్న మహిళల గోప్యతను కాపాడాలని కోర్టు స్పష్టమైన ఆదేశాలిచ్చింది. పోలీసు దాడుల సమయంలో బాధితుల ఫోటోలు తీయడం, మీడియాలో ప్రసారం చేయడం వ్యక్తిగత గోప్యతకు భంగం కలిగించడమే అవుతుందని హెచ్చరించింది. అలాగే, సెక్స్ వర్కర్ల బిడ్డలను వారి వృత్తిని కారణం చూపి తల్లి నుండి వేరు చేయడం రాజ్యాంగ విరుద్ధమని, వారి సంరక్షణ హక్కు ఆ తల్లికే ఉంటుందని కోర్టు మానవీయ కోణాన్ని ఆవిష్కరించింది.

సెక్స్ వర్క్ ను ఒక వృత్తిగా గుర్తించినంత మాత్రాన అది సామాజికంగా అమోదించిన వాణిజ్య వ్యాపారం అయిపోదు. సుప్రీంకోర్టు తీర్పు ప్రధాన ఉద్దేశం - అక్రమ రవాణా కు గురవుతున్న వారిని రక్షించడం , స్వచ్ఛందంగా ఉన్నవారికి రాజ్యాంగ రక్షణ కల్పించడం. ఈ తీర్పు ద్వారా సెక్స్ వర్కర్ల పట్ల పోలీసుల క్రూరత్వం తగ్గే అవకాశం ఉంది.

Author : Raja Sekhar Allu