TRS Party: కొత్త పార్టీతో ప్రజల పరీక్ష ఎదుర్కోవడానికి సిద్ధమైన కవితకు ఎన్నికల సంఘం గుడ్ న్యూస్ చెప్పింది. అయితే తెలంగాణ రాష్ట్ర సేనను కాస్త రక్షణ సేనగా మార్చిన తర్వాత టీఆర్‌ఎస్‌ను రాజకీయ పార్టీగా గుర్తించేందుకు అంగీకరించింది.

ఈ మేరకు ప్రక్రియ పూర్తి చేసి అంగీకార పత్రాలను కవితకు అందజేశారు. గతంలో కవిత ఇచ్చిన ఆప్షన్స్‌లో ఇది కూడా ఉండటంతో ఆమె కూడా అభ్యంతరం చెప్పలేదు.

భారత రాష్ట్ర సమితి బీఆర్‌ఎస్ నుంచి బహిష్కరణకు గురైన మాజీ ఎమ్మెల్సీ కవిత TRS పేరుతో కొత్త రాజకీయ పార్టీ పెట్టారు. ఓబీసీలకు 50 శాతం రిజర్వేషన్లు ధ్యేయంగా సామాజిక తెలంగాణ ఆకాంక్షల కోసం ఆమె ఈ నిర్ణయం తీసుకుంటున్నట్టు చెప్పారు. దీనికి ఎన్నికల సంఘం నుంచి గుర్తింపు రాదని బీఆర్‌ఎస్ నేతలు చెప్పారు. పెద్ద హిస్టరీ ఉన్న పార్టీలు పేర్లు పెట్టుకునేందుకు ఎన్నికల సంఘం అనుమతి ఇవ్వదని కూడా ప్రచారం చేశారు. కానీ వారికి షాక్ ఇస్తూ ఎన్నికల సంఘం టీఆర్‌ఎస్‌కు గుర్తింపు ఇస్తూ ఆదేశాలు జారీ చేసింది. నేరుగా తెలంగాణ రాష్ట్ర సమితి పెట్టుకునే ఉంటే అనుమతి వచ్చేది కాదేమో కానీ ఆమె తెలంగాణ రాష్ట్ర సేన అని తెలివిగా ఇంగ్లీష్‌లో టీఆర్‌ఎస్ అని వచ్చేలా పేరును డిజైన్ చేశారు.

పార్టీకి ఈసీ గుర్తించడంపై ఆనందం వ్యక్తం చేసిన కవిత టీఆర్ఎస్ నాకు రాసి పెట్టిందేమో అని కామెంట్ చేశారు. "*తెలంగాణ రక్షణ సేన (టీఆర్ఎస్)* కు కేంద్ర ఎన్నికల సంఘం ఆమోదం తెలిపిందని సమస్త తెలంగాణ సమాజానికి తెలియ చేయడానికి సంతోషిస్తున్నాము రెండు దశాబ్దాలుగా తెలంగాణ సాంస్కృతిక పరిరక్షణ, పునరుజ్జీవం కోసం నేను చేసిన కృషిని కొనసాగిస్తూ, ఇక ముందు కూడా తెలంగాణ అస్తిత్వ పరిరక్షణే ధ్యేయంగా అంకితభావంతో పని చేస్తానని తెలియజేస్తున్నాను. జనవరి 2026 లో జాతీయ ఎన్నికల సంఘం నిబంధనలకు అనుగుణంగా ఐదు పేర్లతో దరఖాస్తు చేసుకున్నాం. అందులో మూడవ ప్రాధాన్యత గా మేము ఇచ్చిన పేరును ఈసీ ఆమోదించడం కేవలం యాదృచ్ఛికం. TRS నాకు రాసిపెట్టుండేమో" అని వెల్లడించారు.