తాజాగా, ఆమెకు కాంగ్రెస్ హైకమాండ్ రాజ్యసభ సీటు దాదాపు ఖరారు చేసిందన్న వార్త తెలుగు రాష్ట్రాలతో పాటు ఢిల్లీ రాజకీయ వర్గాల్లోనూ తీవ్ర చర్చకు దారితీస్తోంది. పార్టీ విలీన సమయంలో రాహుల్ గాంధీ ఇచ్చిన హామీ మేరకే ఈ నిర్ణయం తీసుకుంటున్నట్లు తెలుస్తోంది. ఈ పరిణామం ఆంధ్రప్రదేశ్ రాజకీయాలపై, ముఖ్యంగా వైఎస్ జగన్ మోహన్ రెడ్డి భవిష్యత్ వ్యూహాలపై ప్రభావం చూపే అవకాశం ఉంది.

షర్మిలకు రాజ్యసభ వెనుక బలమైన రాజకీయ వ్యూహం

వైఎస్ షర్మిలను రాజ్యసభకు పంపాలనే కాంగ్రెస్ హైకమాండ్ ఆలోచన కేవలం ఒక హామీ నెరవేర్పు మాత్రమే కాదు, దీని వెనుక ఒక బలమైన రాజకీయ వ్యూహం దాగి ఉందని అనుకోవచ్చు. పార్టీని విలీనం చేసినప్పుడు రాహుల్ గాంధీ స్వయంగా ఆమెకు పార్లమెంటు పెద్దల సభకు పంపుతామని మాట ఇచ్చారు. ఇప్పుడు ఆ సమయం ఆసన్నమవడంతో షర్మిల ఢిల్లీ పయనం దాదాపు ఖాయంగా కనిపిస్తోంది. అయితే, ఆమెకు ఈ పదవి దక్కిన తర్వాత ఏపీలో కాంగ్రెస్ పార్టీ అనుసరించబోయే వ్యూహం ఏంటనేదే ఇప్పుడు అత్యంత కీలకంగా మారింది. ఈ నిర్ణయం ఏపీ రాజకీయాల్లో కొత్త సమీకరణాలకు తెరలేపబోతోంది.

కర్ణాటక కోటాలో షర్మిళకు రాజ్యసభ? ఏపీ కాంగ్రెస్ పై ఫోకస్| ABP Desam" src="https://www.youtube.com/embed/aEw1S49ydhE" width="919" height="517" frameborder="0" allowfullscreen="allowfullscreen">

ఢిల్లీకి పరిమితం చేస్తే.. జగన్కు మేలేనా?

రాజ్యసభ సభ్యురాలిగా బాధ్యతలు స్వీకరించిన తర్వాత షర్మిలను కేవలం జాతీయ రాజకీయాలకే పరిమితం చేసి, ఏపీ కాంగ్రెస్ పగ్గాలను వేరే నేతకు అప్పగిస్తే.. అది రాష్ట్రంలో భిన్నమైన రాజకీయాలకు దారితీస్తుంది. ఒక రకంగా ఇది వైఎస్ జగన్ మోహన్ రెడ్డికి పరోక్షంగా మద్దతు ఇచ్చినట్లుగా మారుతుందని కొందరు భావిస్తున్నారు. ఎందుకంటే, జగన్ను రాజకీయంగా తీవ్రంగా ఢీకొడుతున్న షర్మిల రాష్ట్ర రాజకీయాల నుంచి తప్పుకుంటే, వైఎస్సార్ కాంగ్రెస్ పార్టీ కి కాస్త ఊరట లభిస్తుంది. షర్మిల లేని ఏపీ కాంగ్రెస్ జగన్ను గట్టిగా ప్రతిఘటించలేకపోవచ్చు, దీనివల్ల జగన్ తన పాత ఓటు బ్యాంకును కాపాడుకునే అవకాశం దక్కుతుంది.

పదవితో మరింత దూకుడు పెంచితే జగన్కు ఇబ్బందే!

అలా కాకుండా, రాజ్యసభ పదవి ఇవ్వడం ద్వారా షర్మిలకు జాతీయ స్థాయి హోదాను కల్పించి, మరింత బలంతో ఆమెను ఏపీలోనే ఉంచి రాజకీయం చేయిస్తే పరిస్థితి మరోలా ఉంటుంది. కాంగ్రెస్ పార్టీని వీడి గతంలో వైఎస్సార్సీపీ వైపు వెళ్లిన సంప్రదాయ ఓటు బ్యాంకును ముఖ్యంగా దళితులు, మైనారిటీలు, వైఎస్సార్ అభిమానులను తిరిగి కాంగ్రెస్ గూటికి తెచ్చేందుకు ఈ పదవి ఒక ఆయుధంగా మారుతుంది. ఎంపీ హోదాతో షర్మిల క్షేత్రస్థాయిలో మరింత దూకుడుగా పర్యటిస్తే, అది జగన్కు రాజకీయంగా అత్యంత ఇబ్బందికరమైన పరిణామంగా మారుతుంది. అన్న వర్సెస్ చెల్లెలు వివాదం మరింత ముదిరి వైఎస్సార్సీపీ మనుగడకే ముప్పుగా మారే ప్రమాదం ఉంది.

జాతీయ స్థాయిలో జగన్ అడుగులు.. కాంగ్రెస్ మైండ్ గేమ్?

ఇదే సమయంలో, జాతీయ రాజకీయాల్లో వైఎస్ జగన్ మోహన్ రెడ్డి సైతం ఇండియా కూటమి వైపు అడుగులు వేస్తున్నారనే ప్రచారం జోరుగా సాగుతోంది. కేంద్రంలో మారుతున్న సమీకరణాలతో జగన్ కాంగ్రెస్తో సత్సంబంధాలు కోరుకుంటున్న తరుణంలో.. షర్మిలకు రాజ్యసభ ఇవ్వడం అనేది కాంగ్రెస్ ఆడుతున్న గేమ్ ఛేంజర్ స్టెప్ అని కొంత మంది భావిస్తున్నారు. జగన్ ఒకవేళ కాంగ్రెస్ వైపు రాకూడదనుకుంటే షర్మిల ఉనికిని , ఆమె హోదాను అంగీకరించాల్సి ఉంటుంది. ఇది జగన్ను ఒత్తిడిలోకి నెట్టడానికి కాంగ్రెస్ వేసిన పక్కా స్కెచ్గా కనిపిస్తోంది. ఏపీలో ప్రస్తుతం అధికారంలో ఉన్న కూటమి బలంగా ఉన్న తరుణంలో, ప్రతిపక్ష స్థానం కోసం వైఎస్సార్సీపీ, కాంగ్రెస్ మధ్యే అసలైన పోటీ నడుస్తోంది. షర్మిలకు దక్కబోయే పార్లమెంటరీ హోదా కాంగ్రెస్ శ్రేణుల్లో కొత్త ఉత్సాహాన్ని నింపుతుంది. జగన్కు ప్రత్యామ్నాయంగా వైఎస్సార్ వారసత్వాన్ని తానే మోస్తున్నానని చెప్పుకోవడానికి షర్మిలకు ఇది గొప్ప అవకాశం. ఢిల్లీ వేదికగా ఆమె చేసే వ్యాఖ్యలు ఏపీ రాజకీయాలపై ఖచ్చితంగా ప్రభావం చూపుతాయి.

మొత్తంగా చూస్తే, వైఎస్ షర్మిలకు రాజ్యసభ సీటు అనేది కేవలం ఒక పదవి కాదు.. అది ఏపీ రాజకీయ భవిష్యత్తును మార్చగల ఒక వ్యూహాత్మక అడుగు. కాంగ్రెస్ అధిష్టానం ఈ కార్డును జగన్తో దోస్తీ కోసం వాడుకుంటుందా లేక జగన్ను మరింత బలహీనపరిచేందుకు వాడుకుంటుందా అనేది కొద్ది రోజుల్లోనే స్పష్టమవనుంది.

Author : Raja Sekhar Allu