నామినేషన్ కేంద్రాలపై దాడులు, ప్రత్యర్థుల మధ్య ఘర్షణలు, నామినేషన్ పత్రాలను చింపివేయడం వంటి ఘటనలు రాజకీయంగా కలకలం రేపాయి. ప్రజాస్వామ్యంపై జరిగిన ప్రత్యక్ష దాడిగా దీనిని పరిగణిస్తామని రాష్ట్ర డైరెక్టర్ జనరల్ ఆఫ్ పోలీసు (DGP) తీవ్రంగా హెచ్చరించారు. రాజకీయ పార్టీలతో సంబంధం లేకుండా హింసకు పాల్పడిన వారిపై కఠినమైన క్రిమినల్ చర్యలుంటాయని స్పష్టం చేశారు.

పోలీసులు వెల్లడించిన సమాచారం ప్రకారం.. మొత్తం 31 ఘటనల్లో 22 హింసాత్మక ఘర్షణలు, శాంతిభద్రతల సమస్యలు కాగా, మరో 9 ప్రత్యేక నామినేషన్ పత్రాల ఎత్తుకెళ్లిపోవడం లేదా చింపివేయడానికి సంబంధించినవి ఉన్నాయి. మొత్తంగా 16 చోట్ల నామినేషన్ పేపర్లు ధ్వంసమయ్యాయి.

అత్యధికంగా అనంతపూర్ జిల్లాలో 8 ఘటనలు నమోదయ్యాయి. అన్నమయ్య, కడప, ప్రకాశం, తిరుపతి జిల్లాల్లో మూడేసి చొప్పున జరిగాయి. చిత్తూరు, శ్రీ సత్యసాయి, పల్నాడులో రెండేసి చొప్పున.. నెల్లూరు, కర్నూలు, మార్కాపురం, నంద్యాల, ఏలూరులలో ఒక్కో ఘటన నమోదైంది.

ఈ అల్లర్లలో రెండు కార్లు, రెండు బైక్‌లు సహా మొత్తం నాలుగు వాహనాలకు నిప్పు పెట్టారు. రెండు నివాస గృహాలపై దాడి చేసి ధ్వంసం చేయగా, ఒక ఇంటిని జేసీబీతో కూల్చివేశారు. రాళ్లు, కర్రలతో దాడులు చేసుకోవడం, గాల్లోకి కాల్పులు జరపడం వంటి ఘటనలు భయాందోళనకు గురిచేశాయి. ఈ ఘర్షణల్లో ఒక పోలీసు కానిస్టేబుల్‌కు తలకు తీవ్ర గాయమవగా, పోటీ చేస్తున్న ఒక అభ్యర్థితో సహా ఇద్దరు తీవ్రంగా గాయపడ్డారు. పోలీసుల ఎస్కార్ట్ వాహనంపై కూడా రాళ్ల దాడి జరిగింది.

టీడీపీ, వైఎస్సార్సీపీ, సీపీఎం (CPI-M) పార్టీలకు చెందిన అభ్యర్థులతో పాటు కొందరు ఇండిపెండెంట్ అభ్యర్థులు కూడా ఈ దాడుల లక్ష్యంగా మారారు. నామినేషన్ కేంద్రాల గేట్లు, లోపల, రిటర్నింగ్ ఆఫీసర్ కార్యాలయాల్లోనే పత్రాలను బలవంతంగా లాక్కొని చింపేశారు.

ఈ ఘటనలపై ఇప్పటివరకు 16 కేసులు నమోదయ్యాయి. మరో 11 ఘటనలకు సంబంధించి కేసులు నమోదు చేసే ప్రక్రియ కొనసాగుతోంది. మొత్తం 54 మందిని నిందితులుగా గుర్తించగా, నలుగురిని స్పాట్‌లోనే అదుపులోకి తీసుకున్నారు. గుంపును చెదరగొట్టడానికి పోలీసులు మూడుసార్లు లాఠీచార్జీ చేసి, రెండు టియర్ గ్యాస్ షెల్స్‌ను ప్రయోగించారు. సీసీటీవీ ఫుటేజ్, వీడియోల ఆధారంగా మిగతా నిందితులను గుర్తిస్తున్నామని డీజీపీ తెలిపారు. సున్నితమైన ప్రాంతాల్లో భద్రతను కట్టుదిట్టం చేశామని, బెదిరింపులకు పాల్పడితే 100 లేదా 112 నంబర్లకు ఫోన్ చేసి ఫిర్యాదు చేయవచ్చని ప్రజలకు పోలీసులు సూచించారు.