అయోధ్య : ఉత్తర ప్రదేశ్‌లో కోవిడ్-19 కేసులు పెరుగుతుండటంతో శనివారం నిర్వహించవలసిన రామ్ బరాత్‌ను రద్దు చేశారు. సాధువులతో చర్చించి, ధర్మ యాత్ర మహా సంఘం, విశ్వ హిందూ పరిషత్ (వీహెచ్‌పీ) ఈ మేరకు నిర్ణయం తీసుకున్నాయి.

వీహెచ్‌పీ అధికార ప్రతినిథి శరద్ శర్మ మాట్లాడుతూ, సాధువులతో సంప్రదించి, శ్రీరాముని పెళ్లి ఊరేగింపు (రామ్ బరాత్)ను రద్దు చేసినట్లు తెలిపారు. ఈ సంబరాలను భక్తులు తమ ఇళ్ళ వద్దనే జరుపుకోవాలని తాము కోరుతున్నామన్నారు. జెండాను ఎగురవేసి, మట్టి ప్రమిదలలో దీపాలు వెలిగించాలని, శంఖం పూరించాలని, పవిత్రమైన మంత్రాలను పఠించాలని కోరుతున్నామన్నారు.

అయోధ్యలోని వివిధ దేవాలయాల నుంచి రామ్ బరాత్ జరుగుతుంది.

కరసేవక పురం నుంచి జనక్‌పూర్ వరకు ఈ కార్యక్రమాన్ని నిర్వహిస్తారు. ఇది ప్రతి ఐదేళ్ళకు ఒకసారి జరుగుతుంది.