ఆంధ్రజ్యోతి, ఆగస్టు 30: కోడింగ్ రంగంతో ఎలాంటి సంబంధం లేకపోయినా, కేవలం ఆర్టిఫిషియల్ ఇంటెలిజెన్స్ (AI) సాయంతో భారతదేశ సుసంపన్నమైన చరిత్రను ప్రతిబింబించే 'భారత్రాజ్య' ( www.bharatrajya.com ) వెబ్సైట్ను రూపొందించిన ముంబైకి చెందిన కృష్ణ శేషాద్రి కృషిని ప్రధాని నరేంద్ర మోదీ కొనియాడారు.
ఇవాళ 'మన్ కీ బాత్' 137వ ఎపిసోడ్లో ప్రధాని మోదీ ఈ డిజిటల్ చారిత్రక అట్లాస్ (Historical Atlas) ప్రత్యేకతను దేశ ప్రజలకు వివరించారు.
AI సాంకేతికతతో 15 ఏళ్ల కల నిజం
ఇంజినీరింగ్, ఎంబీఏ పూర్తిచేసి మార్కెటింగ్ రంగంలో స్థిరపడిన కృష్ణ శేషాద్రికి చిన్నతనం నుంచే చరిత్రపై అమితమైన ఆసక్తి ఉండేది. గత 800 ఏళ్లకు పైగా భారతదేశంలోని వివిధ జిల్లాలను ఏ కాలంలో ఏ రాజులు, రాజవంశాలు పాలించాయో వివరించే ఒక ఇంటరాక్టివ్ వెబ్సైట్ తయారు చేయాలని ఆయన 15 ఏళ్లుగా భావిస్తున్నారు. అయితే, కోడింగ్ పరిజ్ఞానం లేకపోవడంతో ఆ ఆలోచన నిలిచిపోయింది.
ఇటీవల అందుబాటులోకి వచ్చిన ఆంత్రోపిక్ (Anthropic) సంస్థకు చెందిన 'క్లాడ్' (Claude) అనే AI మోడల్ సాయంతో ఆయన తన ఆలోచనను కార్యరూపంలోకి తెచ్చారు. 'నాకు కోడింగ్తో ఉన్న సంబంధం నా ఇంటి పిన్కోడ్ మాత్రమే. అలాంటిది క్లాడ్ AI సాయంతో ఈ సైట్ను నిర్మించగలిగాను' అని కృష్ణ సంతోషం వ్యక్తం చేశారు.
'మన్ కీ బాత్'లో మోదీ ప్రత్యేక సంభాషణ
అషాఢ ఏకాదశి సందర్భంగా సోషల్ మీడియాలో ప్రారంభమైన ఈ ప్రాజెక్ట్పై దృష్టి సారించిన ప్రధాని మోదీ, స్వయంగా కృష్ణతో ఫోన్లో మాట్లాడి వివరాలు తెలుసుకున్నారు. భారత్రాజ్య వెబ్సైట్లో టైమ్లైన్ స్లైడర్ను జరపడం ద్వారా ఏ కాలంలో ఏ సామ్రాజ్యం ఉందో సులభంగా తెలుసుకోవచ్చని, చారిత్రక విషయాలను కథల రూపంలో ఆసక్తికరంగా అందించేందుకు ఇది బాగా ఉపయోగపడుతుందని మోదీ అభినందించారు.
ఈ వెబ్సైట్లో దాదాపు 1000 జిల్లాలకు సంబంధించిన 800 ఏళ్ల (క్రీ.శ. 700 నుంచి ఆధునిక కాలం వరకు) చారిత్రక డేటాను పొందుపరిచారు. విద్యా ప్రయోజనాల దృష్ట్యా విద్యార్థులు, ఉపాధ్యాయులు ఉచితంగా వాడుకునేలా దీనిని క్రియేటివ్ కామన్స్ (CCO) లైసెన్స్ కింద అందుబాటులో ఉంచారు. దేశ ప్రధాని నుంచి లభించిన ఈ గుర్తింపు తన జీవితంలో లభించిన అతిపెద్ద గౌరవమని కృష్ణ శేషాద్రి ఆనందం వ్యక్తం చేశారు.
భిన్నత్వంలో ఏకత్వం ఇండియా డీఎన్ఏలోనే ఉంది: ఆర్ఎస్ఎస్ చీఫ్ మోహన్ భాగవత్