ట్రేడింగ్ ముగిసే సమయానికి బాంబే స్టాక్ ఎక్స్ఛేంజ్ సూచీ సెన్సెక్స్ ఏకంగా 1,765 పాయింట్లకు పైగా (2.26%) కుప్పకూలింది. మరోవైపు నేషనల్ స్టాక్ ఎక్స్ఛేంజ్ సూచీ నిఫ్టీ 500 పాయింట్లకు పైగా నష్టపోయి ఇన్వెస్టర్ల సంపదను ఆవిరి చేసింది.

ప్రపంచవ్యాప్తంగా మార్కెట్ల పతనం

అమెరికా ఇరాన్ సైనిక స్థావరాలపై దాడులు చేయడం, ప్రతిగా ఇరాన్ కూడా ఎదురుదాడులకు దిగడంతో గ్లోబల్ మార్కెట్లు ఒక్కసారిగా కుదుపునకు లోనయ్యాయి. ఆసియా మార్కెట్లతో పాటు ఐరోపా మార్కెట్లు సైతం ఎరుపు రంగులోనే ట్రేడ్ అయ్యాయి. యుద్ధ భయాల నేపథ్యంలో ఇన్వెస్టర్లు ఈక్విటీల నుంచి పెట్టుబడులను ఉపసంహరించుకుని, సురక్షితమైన బంగారం వంటి ప్రత్యామ్నాయాల వైపు మొగ్గు చూపడం మార్కెట్ల పతనానికి ప్రధాన కారణమైంది.

మళ్లీ పెరిగిన ముడిచమురు ధరలు

పశ్చిమాసియాలో ఉద్రిక్తతలు పెరిగితే సరఫరాకు తీవ్ర అంతరాయం కలుగుతుందనే ఆందోళనల మధ్య అంతర్జాతీయ మార్కెట్‌లో ముడిచమురు(Crude Oil) ధరలు మరోసారి భారీగా పెరిగాయి. బ్యారెల్ ముడిచమురు ధర ఒక్కసారిగా 78.73 డాలర్లకు చేరుకుంది. భారత్ తన చమురు అవసరాల కోసం ప్రధానంగా దిగుమతులపైనే ఆధారపడుతున్నందున, క్రూడాయిల్ ధరలు పెరగడం దేశీయ ద్రవ్యోల్బణంపై ప్రభావం చూపుతుందనే భయాలు మార్కెట్‌ను మరింత కుంగదీశాయి.

ఇన్వెస్టర్లకు భారీ నష్టాలు

ఈ నాటకీయ పతనంలో దాదాపు అన్ని రంగాల షేర్లు నష్టాల్లోనే కొనసాగుతున్నాయి. ముఖ్యంగా బ్యాంకింగ్, ఐటీ, ఆటోమొబైల్, మెటల్ రంగాల షేర్లు భారీగా అమ్మకాల ఒత్తిడిని ఎదుర్కొన్నాయి. మార్కెట్ ఒక్కరోజే ఈ స్థాయిలో పడిపోవడంతో మదుపరులు లక్షల కోట్ల రూపాయల సంపదను కోల్పోయారు. రాబోయే రోజుల్లో పశ్చిమాసియా పరిస్థితులు శాంతించకపోతే మార్కెట్లు మరికొంత కాలం ఒడుదొడుకులకు లోనయ్యే అవకాశముందని మార్కెట్ విశ్లేషకులు భావిస్తున్నారు.

అదృశ్యమైన పాకిస్థాన్ కార్గో విమానం.. అరేబియా సముద్రంలో గాలింపు..

స్వల్పంగా తగ్గిన బంగారం ధరలు.. ప్రస్తుతం ఎలా ఉన్నాయంటే..