బ్రసిలియా: కరోనా మహమ్మారి బ్రెజిల్‌ను వణికిస్తూనే ఉంది. గడిచిన 24 గంటల్లో దేశంలో 24,831 కరోనా కేసులు నమోదైనట్టు అక్కడి ఆరోగ్యశాఖ ఆదివారం వెల్లడించింది. కొత్తగా నమోదైన కేసులతో మొత్తం కేసుల సంఖ్య 18,64,681కు చేరింది. ఇదిలా ఉంటే.. శనివారం బ్రెజిల్‌లో 39 వేలకు పైగా కేసులు నమోదయ్యాయి. దీంతో తాజాగా నమోదైన కేసుల సంఖ్యలో భారీ తగ్గుదల కనిపిస్తోంది. కేసుల విషయంలోనే కాకుండా మరణాల సంఖ్యలోనూ ఆదివారం తగ్గుదల కనిపించింది. శుక్రవారం దేశంలో కరోనా కారణంగా 1200 మంది చనిపోతే.. శనివారం 1071 మంది మృతిచెందారు. అయితే ఆదివారం మాత్రం ఈ సంఖ్య దాదాపు 650లోపే ఉన్నట్టు ఆరోగ్యశాఖ తెలిపింది. బ్రెజిల్‌లో ఆదివారం చనిపోయిన వారితో కలిపి ఇప్పటివరకు మొత్తంగా 72,100 మంది మృత్యువాతపడ్డారు.

ఇక కరోనా నుంచి ఇప్పటివరకు 11 లక్షలకు పైగా పూర్తిగా కోలుకున్నారు. కాగా.. ప్రపంచవ్యాప్తంగా అత్యధిక కరోనా కేసులు నమోదైన దేశాల జాబితాలో బ్రెజిల్ రెండో స్థానంలో ఉంది. మొదటి స్థానంలో అమెరికా ఉండగా.. ఆ తరువాతి స్థానాల్లో బ్రెజిల్, ఇండియా, రష్యా, పెరు దేశాలున్నాయి. ప్రపంచవ్యాప్తంగా అత్యధిక కరోనా కేసులు అమెరికా, బ్రెజిల్‌లోనే నమోదయ్యాయి.