కరోనా మహమ్మారి ప్రభావం వివిధ రంగాలపై తీవ్రంగా పడింది. దీని బారి నుంచి ప్రజలను కాపాడటానికి ఇప్పటికే హీరోల నుంచి సినీ నిర్మాతల నుంచి, దర్శకుల నుంచి విరాళాలు వెల్లువెత్తిన సంగతి తెలిసిందే. ఈ సంక్షోభం నుంచి సినిమా రంగాన్ని బయటపడేయటానికి సినీ ప్రముఖులు కంకణం కట్టుకున్నారు. నిర్మాణాత్మక కార్యక్రమాల వైపు దృష్టి సారించారు. మెగాస్టార్ చిరంజీవి ఆధ్వర్యంలో 'సి. సి. సి. మనకోసం' (కరోనా క్రైసిస్ చారిటీ మనకోసం) అనే సంస్థను ఏర్పాటు చేశారు.

ఈ 'సి. సి. సి. మనకోసం' సంబంధించిన వివరాలను గురించి దర్శకుడు ఎన్‌.శంకర్ మాట్లాడుతూ.. ''కరోనా వైరస్ ప్రపంచాన్ని అతలాకుతలం చేస్తున్న ఈ సందర్భంలో తెలుగు సినిమా పరిశ్రమకు సంబంధించిన వేలాది మంది కార్మికులకు అండగా నిలబడాలనే సంకల్పంతో చిరంజీవిగారి ఆధ్వర్యంలో సి.

సి. సి. (కరోనా క్రైసిస్ చారిటీ మనకోసం) అనే సంస్థని ఏర్పాటు చేయడం జరిగింది. ఈ సంస్థకి ఛైర్మన్‌గా మెగాస్టార్ చిరంజీవిగారు ఉంటారు. అలాగే సభ్యులుగా తమ్మారెడ్డి భరద్వాజగారు, సురేష్ బాబుగారు, సి.కల్యాణ్‌గారు, దాముగారు, బెనర్జీగారు, నేను సభ్యులుగా ఉంటాము. సి. సి. సి. మనకోసం కమిటీతో పాటు డైరెక్టర్ మెహర్ రమేష్‌గారు, గీతా ఆర్ట్స్ బాబుగారు, కోటగిరి వెంకటేశ్వరరావుగారు, పరుచూరి గోపాలకృష్ణగారు, కొమరం వెంకటేష్‌గారు, ఫెడరేషన్‌కు సంబంధించి అన్ని కార్మిక సంఘాల నాయకులు అందరూ కూడా ఈ సేవా కార్యక్రమంలో భాగస్వాములు అవుతున్నారు. ప్రజలందరూ కూడా స్వయంగా ఇంట్లోనే కరోనా వైరస్‌తో సైనికుల్లా పోరాడుతున్న సందర్భంలో గౌరవ ముఖ్యమంత్రి కేసీఆర్‌గారి నేతృత్వంలో అద్భుతమైన పోరాటం జరుగుతోంది ఈ కరోనా వైరస్ మీద. కరోనాను అంతమొందించే ప్రయత్నంలో ప్రజలందరూ కూడా భాగస్వాములు కావాలి. మీ ఇళ్ళలోనే ఉంటూ కనబడని శత్రువుతో పోరాడండి. విజయం సాధిద్దాం.. సాధిస్తాం. ఈ సేవా కార్యక్రమానికి గౌరవ ముఖ్యమంత్రి కేసీఆర్‌గారి ఆశీస్సులు, పురపాలక ఐటీ శాఖామంత్రి కేటీఆర్‌గారి అండదండలు, అధికారుల, పోలీస్ శాఖవారి సహాయసహకారాలు కావాలని కోరుతున్నాం..'' అన్నారు.