ఈనేపథ్యంలో బంగ్లాదేశ్‌తో జరిగిన పోరులో ఆడుతూ పాడుతూ గెలిచింది. అయితే అసలైన గండం ఆస్ట్రేలియా రూపంలో మనోళ్లకు పొంచి ఉంది. ఈనెల 28న జరిగే కీలక పోరులో కంగారూల పనికూడా పడితే సెమీస్‌ బెర్త్‌ ఖాయమవుతుంది.

మాంచెస్టర్‌ : గ్రూపు ఆఖరి రెండు మ్యాచ్‌లు చావో..రేవో అయిన వేళ హర్మన్‌ప్రీత్‌ సేన జూలు విదిల్చింది. గురువారం జరిగిన గ్రూప్‌ 'ఎ' మ్యాచ్‌లో బంగ్లాదేశ్‌ను ఐదు వికెట్లతో చిత్తు చేసింది. మొదట బంగ్లాదేశ్‌ 20 ఓవర్లలో 136/8 స్కోరుకే పరిమితమైంది. ఫిర్దౌస్‌ (33), నిగర్‌ సుల్తానా (32), శోభనా మోస్తరీ (22) మాత్రమే రాణించారు. రాధా యాదవ్‌ మూడు, శ్రీచరణి రెండు వికెట్లు పడగొట్టారు. ఛేదనలో భారత్‌ 16.5 ఓవర్లలో 139/5 స్కోరు చేసి నెగ్గింది. షఫాలీ (34 బంతుల్లో 8 ఫోర్లు, సిక్స్‌తో 53) హాఫ్‌ సెంచరీతో మెరవగా, జెమీమా (26) యాస్తికా భాటియా (18 బంతుల్లో 23) సత్తా చాటారు. షఫాలీ 'ప్లేయర్‌ ఆఫ్‌ ద మ్యాచ్‌'గా నిలిచింది.

ఓపెనర్ల జోరు: మంధాన, షషాలీ తొలి వికెట్‌కు మూడు ఓవర్లలోనే 31 రన్స్‌ జోడించి శుభారంభం ఇచ్చారు. మంధాన (8) త్వరగానే నిష్క్రమించినా..షఫాలీ, యాస్తికా వేగంగా ఆడి రెండో వికెట్‌కు 45 పరుగులు జత చేశారు. ఈ దశలో వడివడిగా వికెట్లు చేజార్చుకున్నా..హర్మన్‌, జెమీమా ఐదో వికెట్‌కు 30 పరుగుల భాగస్వామ్యంతో జట్టును విజయ తీరాలకు మళ్లించారు.

శ్రీచరణి చరిత్ర : ఒకే ప్రపంచ కప్‌లో అత్యధిక వికెట్లు పడగొట్టిన భారత బౌలర్‌గా తెలుగమ్మాయి శ్రీచరణి రికార్డుల కెక్కింది. ఈ మ్యాచ్‌లో 2 వికెట్లు సాధించడంతో మెగా టోర్నీలో 4 మ్యాచ్‌ల్లో ఆమె తీసిన వికెట్లు సంఖ్య 12కి చేరింది. గతంలో ఈ రికార్డు పూనమ్‌ యాదవ్‌ (10 వికెట్లు) పేరిట ఉంది.

సంక్షిప్తస్కోర్లు: బంగ్లాదేశ్‌ 20 ఓవర్లలో 136/8 (ఫిర్దౌస్‌ 33, నిగర్‌ సుల్తానా 32, శోభనా మోస్తరీ 22, రాధా యాదవ్‌ 3/28, శ్రీచరణి 2/21); భారత్‌ 16.5 ఓవర్లలో 139/5 (షఫాలీ 53, జెమీమా 26, యాస్తికా 23, హర్మన్‌ నాటౌట్‌ 13, రితూ మోనీ 2/29).

పెళ్లి పేరుతో మోసం.. స్టార్ క్రికెటర్‌పై సంచలన ఆరోపణలు!

కన్నీళ్లు పెట్టుకున్న బ్రెజిల్ స్టార్ నెయ్‌మార్!