స్టార్‌ దర్శకుడు శంకర్‌ కుమార్తె అదితి శంకర్‌ హీరోయిన్‌గా కార్తీ నటించే చిత్రం ద్వారా కోలీవుడ్‌కు పరిచయమవుతోంది. 'విరుమన్‌' పేరుతో నిర్మిస్తున్న ఈ చిత్రానికి ముత్తయ్య దర్శకత్వం వహిస్తున్నారు.

పూర్తి గ్రామీణ నేపథ్యంలో రూపొందిస్తున్న ఈ చిత్రం కూడా గతంలో కార్తీ - ముత్తయ్య కాంబోలో వచ్చిన 'కొంబన్‌' చిత్రం తరహాలోనే ఉండేలా ప్లాన్‌ చేశారు. ఇందులో కొత్త హీరోయిన్‌ ఉండాలని భావించిన దర్శకుడు.. అదితిని కథానాయికగా ఎంపిక చేశారు. ఇందులో మదురై యాసలో అదితి డైలాగులుంటాయి. ఇందుకోసం ఆ విధంగా మాట్లాడడం అనతికాలంలోనే నేర్చుకున్న అదితి... తన పాత్రకు సంబంధించిన సన్నివేశాలను సింగిల్‌ టేక్‌లో పూర్తి చేస్తోందట. ఈ విషయాన్ని దర్శకుడు ముత్తయ్య స్వయంగా వెల్లడిస్తూ, ఆమెపై ప్రశంసల వర్షం కురిపించారు. ప్రస్తుతం ఈ చిత్రం షూటింగ్‌ శరవేగంగా జరుపుకుంటుండగా, హీరో సూర్య 2డి ఎంటర్‌టైన్మెంట్‌ పతాకంపై నిర్మిస్తున్నారు.