అమెరికా కొత్త గ్రీన్ కార్డు పాలసీని ప్రకటించింది.

ఈ పాలసీ కింద అమెరికాలోని వలసదారులు గ్రీన్ కార్డు పొందాలనుకుంటే ముందు వారు అమెరికాను వీడి తమ స్వదేశానికి వెళ్లి అక్కడి అమెరికా రాయబార కార్యాలయం లేదా కాన్సులేట్ ద్వారా దరఖాస్తు చేసుకోవాల్సి ఉంటుంది.

''తమ వీసా హోదాను మార్చుకోవాలనుకునే వారు, 'కొన్ని ప్రత్యేక పరిస్థితుల్లో తప్ప' దేశం వెలుపల మాత్రమే కాన్సులర్ ప్రాసెసింగ్ ద్వారానే వీసా హోదా మార్చుకోవాల్సి ఉంటుంది'' అని యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (యూఎస్‌సీఐఎస్) శుక్రవారం తెలిపింది.

అక్రమ వలసలను అరికట్టడానికి ట్రంప్ ప్రభుత్వం తీసుకుంటున్న చర్యలలో భాగంగా, వీసాహోల్డర్లు, సందర్శకులు అమెరికాలోనే నివసిస్తూ గ్రీన్ కార్డుల కోసం దరఖాస్తు చేసుకోవడానికి అనుమతించిన చట్టంలోని ఓ లొసుగుకు ఇది చెక్ పెడుతుంది.

ఈ మార్పు తీసుకురావడానికి ముందు సుదీర్ఘమైన గ్రీన్‌కార్డు దరఖాస్తు ప్రక్రియ సమయంలో దరఖాస్తుదారులు అమెరికాలోనే ఉండే వెసులుబాటు ఉండేదని, కానీ ఈ కొత్త విధానం వల్ల ఆ అవకాశం లేకుండా పోయిందని, కొత్త పద్దతిని విమర్శిస్తున్నవారు అంటున్నారు.

గ్రీన్ కార్డు పొందాలనే ఆశతో అమెరికాను వీడే లక్షలాదిమంది వలసదారులకు ఈ కొత్త విధానం తిరిగి అమెరికాకు వెళ్లగలమో లేదో అనే సందిగ్థాన్ని సృష్టించవచ్చు.

గ్రీన్ కార్డు అమెరికాలో శాశ్వత నివాసానికి అనుమతి ఇస్తుంది.

యూఎస్‌సీఐఎస్ తీసుకొచ్చిన ఈ కొత్త విధానం అక్కడ నివసిస్తున్న భారతీయులపై కూడా ప్రభావం చూపుతుందని నిపుణులు అంటున్నారు.

గ్రీన్ కార్డు కోసం దరఖాస్తు చేసుకునే వారిలో.. ఇతర దేశాల నుంచి వచ్చే వృత్తి నిపుణుల సంఖ్య కంటే భారత్, చైనా నుంచి వచ్చే దరఖాస్తుల సంఖ్యే ఎక్కువగా ఉందని తెలిసింది.గ్రీన్‌కార్డు పొందేందుకు 2023 నాటికి 10 లక్షల మంది భారతీయులు క్యూలో ఉన్నారని యూఎస్‌సీఐఎస్ తెలిపారు.

క్వాడ్ విదేశాంగ మంత్రుల సమావేశం కోసం మే 23 నుంచి 26 మధ్యలో అమెరికా విదేశాంగ మంత్రి మార్కో రుబియో భారత్‌లో పర్యటిస్తున్న సందర్భంగా ఈ నిర్ణయం వెలువడింది.

అమెరికా నిర్ణయంపై ప్రశ్నల వెల్లువ

కొత్త గ్రీన్ కార్డు విధానం భారతీయులకు ఎదురుదెబ్బ అని అమెరికాలోని వలసదారుల హక్కుల కార్యకర్త అజయ్ భూటోరియా అన్నారు.

''చట్టబద్ధంగా నివసిస్తున్న 12 లక్షల మందికి పైగా భారతీయ-అమెరికన్లు ప్రస్తుతం అనిశ్చితిని ఎదుర్కొంటున్నారు. ప్రస్తుతం గ్రీన్ కార్డు దరఖాస్తుదారులు అమెరికాను వీడి, ఇమ్మిగ్రేషన్ వీసా ద్వారా తిరిగి ప్రవేశించడాన్ని ఈ కొత్త విధానం తప్పనిసరి చేస్తుంది'' అని

''గత రెండేళ్లుగా చదువుకోవడానికి అమెరికాకు వచ్చే విద్యార్థుల సంఖ్యలో 35 నుంచి 40 శాతం తగ్గుదల కనిపించింది. గత డిసెంబర్‌లో.. వీసా స్టాంపింగ్ కోసం భారత్‌కు వెళ్లిన చాలామంది అక్కడే చిక్కుకుపోవడం చూశాం. వీసా స్టాంపింగ్‌కు వారికి లభించిన తేదీలు ఆగస్టు, అక్టోబర్‌ వరకు ఉన్నాయి'' అని తెలిపారు.

''ఈ కొత్త నిర్ణయంతో.. గ్రీన్ కార్డును పొందే మార్గం మునపటి లాగా అంత తేలిక కాదు. ఈ నోటిఫికేషన్ అమెరికా తనకు తానే నష్టం కలిగించుకునే చర్య'' అని చెప్పారు.

''గ్రీన్ కార్డు కోసం క్యూలో ఉన్న 12 లక్షల మంది భారతీయ-అమెరికన్లు అత్యధిక ఆదాయం సంపాదించే, పన్నులు చెల్లించే, చట్టాన్ని గౌరవించే వ్యక్తులలో ఉన్నారు. వీరు అమెరికా ఖజానాకు బిలియన్ల డాలర్లను అందిస్తున్నారు'' అని తెలిపారు.

ట్రంప్ ప్రభుత్వం తీసుకున్న నిర్ణయాన్ని భారత్‌లోని కాంగ్రెస్ ఎంపీ రాజీవ్ శుక్లా కూడా ప్రశ్నించారు.

''అమెరికా వలస విధానంలో ఇటీవల తీసుకొచ్చిన మార్పులు వృత్తి నిపుణుల, విద్యార్థుల గ్రీన్ కార్డు ప్రయాణాన్ని అనిశ్చితిలో పడేస్తున్నాయి'' అని

''కొత్త నిబంధనలు గణనీయమైన అంతరాయాన్ని కలిగించవచ్చు. ఈ విధానం వల్ల ప్రజలపై పడే ప్రభావం ఎక్కువగా ఉంటుంది. దాన్ని విస్మరించకూడదు'' అన్నారు.

''ట్రంప్ ప్రభుత్వం ఈ నిర్ణయాన్ని తిరిగి పరిశీలించాలి. ఎందుకంటే, భారతీయులతో పాటు ప్రపంచవ్యాప్తంగా వేలాది మంది ప్రజలు అమెరికా ఆర్థిక వ్యవస్థకు, సమాజానికి ఎనలేని సహకారం అందించారు'' అని చెప్పారు.

''భారత ప్రభుత్వం కూడా ఈ విషయాన్ని పరిగణనలోకి తీసుకుని, విదేశాల్లో నివసిస్తున్న వారి ప్రయోజనాల కోసం అండగా నిలబడాలి'' అని తెలిపారు.

ఇటీవల వార్తల్లో నిలిచిన ఇన్వెస్ట్‌మెంట్ అడ్వైజర్ ముత్తుకృష్ణన్ దండపాణి.. ఈ కొత్త నిబంధనల కారణంగా అమెరికాలో ఎన్నారైల జీవితం కష్టతరం కాబోతుందని