Fantasy Romantic drama : ఓటీటీలో రీసెంట్ గా ఒక చైనీస్ ఫాంటసీ రొమాంటిక్ డ్రామా స్ట్రీమింగ్ కు వచ్చింది. అదిరిపోయే విజువల్స్ తో ఆకట్టుకుంటోంది ఈ సిరీస్.

ఇది ఒకరకమైన మాయా లోకం కథ. ఇందులో హీరో ఏమో పెద్ద యుద్ధ వీరుడు, హీరోయిన్ ఏమో వందల ఏళ్ల వయసున్న దెయ్యాల రాణి. వీళ్లిద్దరి మధ్య ప్రేమ ఎలా పుట్టింది, ఆ ప్రేమ కోసం వాళ్లు ఎంతమందితో కొట్లాడారు అనేది మెయిన్ పాయింట్. మన సినిమాల్లో లాగా ఇందులో కూడా విలన్లు, వాళ్ల కుట్రలు, పెద్ద పెద్ద యుద్ధాలు అన్నీ ఉంటాయి. ఇంకా గట్టిగా చెప్పాలంటే, ఇది ఒక సెంటిమెంట్ ప్యాకేజీ. కేవలం ప్రేమ అని కాకుండా, ఒకరి కోసం ఒకరు ప్రాణాలు ఇచ్చేంత రేంజ్‌లో సీన్లు ఉంటాయి. ఆత్మలు, మంత్రాలు, తంత్రాలు లాంటివి నచ్చేవాళ్లకి ఈ సిరీస్ ఒక పండగలా అనిపిస్తుంది. అంతేకాదు దీనికి రెండు క్లైమాక్స్ లు కూడా ఉన్నాయి. అందుకే సిరీస్ కూడా క్రేజీగా ఉంటోంది.

ఎక్కడ చూడచ్చు అంటే

ఈ చైనీస్ ఫాంటసీ రొమాంటిక్ డ్రామా పేరు ‘లవ్ బియాండ్ ది గ్రేవ్’ (Love Beyond the Grave). ఇది 2026లో వచ్చిన 40 ఎపిసోడ్ ల డ్రామా. ఇందులో దిల్రాబా దిల్‌మురాత్ (హీ సిముగా), చెన్ ఫీయు (దువాన్ క్సుగా) ప్రధాన పాత్రల్లో నటించారు. ఈ సిరీస్ లీ క్వింగ్రాన్ రాసిన ‘బాయి రీ తీ డెంగ్’ అనే ఫేమస్ నవల ఆధారంగా రూపొందించబడింది. దీనిని ప్రముఖ దర్శకుడు క్విన్ జెన్ తెరకెక్కించారు. ఈ డ్రామా కోసం చైనాలోని ఫేమస్ హెంగ్డియన్ వరల్డ్ స్టూడియోస్‌లో భారీ సెట్లు వేసి చిత్రీకరించారు. ముఖ్యంగా ఇందులోని విజువల్స్ అద్భుతంగా ఉంటాయని పేరు కూడా వచ్చింది. అలాగే ప్రధాన నటీనటులైన దిల్రాబా, చెన్ ఫీయు తమ పాత్రలకు తామే స్వయంగా డబ్బింగ్ చెప్పుకోవడం ఈ సిరీస్ కు ఉన్న ఒక ప్రత్యేకత. విడుదల కావడానికి ముందే ఈ సిరీస్ భారీ అంచనాలను క్రియేట్ చేసింది. ప్రస్తుతం ఇది వికి (Viki) ఓటీటీలో అందుబాటులో ఉంది.

స్టోరీలోకి వెళ్తే

కథలో హీరోయిన్ హీ సిము ఒక ఆత్మల రాణి. ఆమెకి దాదాపు 400 ఏళ్ల వయసు ఉంటుంది. ఒకరోజు ఆమె ఆహారం కోసం వెతుకుతుండగా, అనుకోకుండా సేనాపతి దువాన్ క్సుని కలుస్తుంది. ఆ సమయంలో జరిగిన కొన్ని పరిస్థితుల వల్ల వాళ్ళిద్దరి మధ్య ఒక ఒప్పందం కుదురుతుంది. దీనివల్ల వారిద్దరి “ఐదు జ్ఞానేంద్రియాలు” (చూపు, వినికిడి, స్పర్శ వంటివి) ఒకదానికొకటి ముడిపడిపోతాయి. అంటే ఒకరికి దెబ్బ తగిలితే ఆ నొప్పి ఇంకొకరికి తెలుస్తుంది, ఒకరు చూసేది ఇంకొకరు చూడగలరు. మొదట్లో ఒకరినొకరు ఇష్టపడకపోయినా, ఈ ఎఫ్ఫెక్ట్ వల్ల ఒకరి మనసులోని బాధను మరొకరు అర్థం చేసుకుంటారు. అలా వాళ్ళ మధ్య ప్రేమ పుడుతుంది. కానీ అసలు సమస్య ఏమిటంటే.. హీరోయిన్ ఒక ఆత్మ, ఆమెకు చావు లేదు. హీరో ఒక సాధారణ మనిషి, అతనికి ఏదో ఒకరోజు మరణం తప్పదు. దీనికి తోడు, అటు మానవ లోకంలోనూ, ఇటు ఆత్మల లోకంలోనూ కొందరు విలన్లు వీరిద్దరినీ విడదీయాలని, యుద్ధాలు సృష్టించాలని ప్లాన్ చేస్తారు.

అయితే వీరిద్దరూ కలిసి అన్ని అడ్డంకులను దాటుకుంటూ వస్తారు. చివరికి ఒక యుద్ధంలో హీరో ప్రాణాపాయ స్థితిలోకి వెళ్తాడు. అప్పుడు హీరోయిన్ ఒక కఠినమైన నిర్ణయం తీసుకుంటుంది. తనకున్న శక్తులను, అమరత్వాన్ని వదులుకుని, ఒక సాధారణ మనిషిగా మారిపోవాలని నిర్ణయించుకుంటుంది. అలా తన శక్తులతో హీరోని కాపాడుకుని, చివరికి తన ప్రియుడితో కలిసి జీవితాన్ని గడపడంతో కథ సుఖాంతమవుతుంది. అయితే ఈ సినిమాకి మరో క్లైమాక్స్ కూడా ఉంది. ఇది ఎలా ఉంటుందనేది ఈ సిరీస్ ను చూసి తెలుసుకోవాల్సిందే.