అలాంటి ఒక సూపర్ హిట్ హారర్ అండ్ మిస్టరీ కొరియన్ సిరీస్ ‘గోస్ట్ మేన్షన్’ (Ghost Mansion - Korean Series). దెయ్యం సినిమాలు అంటే సాధారణంగా ఓ ఇంట్లోకి వెళ్లిన వాళ్లను ఆత్మలు వెంటాడటం, భయపెట్టడం చూస్తుంటాం. కానీ ఈ సిరీస్ లో మాత్రం ఒక పాత అపార్ట్‌మెంట్‌నే భయానికి కేంద్రంగా మార్చారు. అక్కడ ఒక్కో గదిలో ఒక్కో విషాదకరమైన కథ దాగి ఉంటుంది. ఆ కథలన్నింటినీ ఓ రచయితకు కేర్‌టేకర్ చెబుతాడు. కానీ చివరి ట్విస్ట్ మామూలుగా ఉండదు. మరి ఇంతకీ ఈ సిరీస్ ను ఎక్కడ చూడవచ్చో తెలుసుకుందాం పదండి.

కథలోకి వెళ్తే…

జి-వూ ఓ హారర్ వెబ్‌టూన్ రచయిత. తన కొత్త కథ కోసం భయంకరమైన అనుభవాలను వెతుకుతూ సియోల్ శివార్లలోని గ్వాంగ్లిమ్ మాన్షన్ అనే పాత అపార్ట్‌మెంట్‌కి వెళ్తాడు. అక్కడ అతనికి ఓ మిస్టీరియస్ కేర్‌టేకర్ పరిచయమవుతాడు. ఆ అపార్ట్‌మెంట్‌లో గతంలో జరిగిన వింత సంఘటనలను అతను జి-వూకు ఒక్కొక్కటిగా చెబుతాడు.

మొదటి కథ రూమ్ 504లో జరుగుతుంది. ప్రశాంతంగా నవల రాసుకోవడానికి వచ్చిన ఓ రచయితకు మూసివేసిన అనాథాశ్రమం నుంచి పిల్లల నవ్వులు, ఏడుపులు వినిపిస్తుంటాయి. ఆ శబ్దాలు క్రమంగా అతని మానసిక పరిస్థితినే దెబ్బతీస్తాయి. రూమ్ 907 కథలో ఓ ఫార్మసిస్ట్ వివాహిత మహిళతో అక్రమ సంబంధం పెట్టుకుంటాడు. ఆమె భర్త హత్యకు గురైన తర్వాత… ఆ మహిళలో వచ్చిన వింత మార్పులు అతని జీవితాన్ని నరకంగా మారుస్తాయి.

ఇక రూమ్ 708లో ఓ రియల్ ఎస్టేట్ బ్రోకర్ తన కుటుంబాన్ని వదిలేసి ఓ సింథటిక్ డాల్‌తో జీవిస్తుంటాడు. కానీ ఆ బొమ్మ వెనుక దాగి ఉన్న రహస్యం బయటపడటంతో అతని పరిస్థితి దారుణంగా మారుతుంది. రూమ్ 604లో విదేశాల నుంచి వచ్చిన ఓ యువకుడు స్నేహితుడి ఇంట్లో ఉంటాడు. అక్కడి బూజు, ఇంట్లోని వ్యక్తుల వింత ప్రవర్తన అతడిని భయంకరమైన పరిస్థితుల్లోకి నెడతాయి.

చివరగా రూమ్ 1504లో దొంగతనం చేయడానికి వెళ్లిన వ్యక్తి కథను కేర్‌టేకర్ చెబుతాడు. ఇవన్నీ విన్న జి-వూకి తనకు దొరికిన కీతో ఆ గదిలోకి వెళ్లాలనే ఆసక్తి పెరుగుతుంది. అక్కడే అసలు ట్విస్ట్ బయట పడుతుంది. ఈ అపార్ట్‌మెంట్ ఒకప్పుడు ఓ రహస్య మతపరమైన ఆచారాలకు కేంద్రంగా ఉండేదని తెలుస్తుంది. అక్కడి ఆత్మలు కేర్‌టేకర్ రూపాన్ని ఉపయోగించి కొత్త వ్యక్తులను తమ ఉచ్చులోకి లాగుతుంటాయి. మరి చివరికి జి-వూ పరిస్థితి ఏమైంది ? క్లైమాక్స్ ట్విస్ట్ ఏంటి ? అసలు ఆ అపార్ట్‌మెంట్ అంతలా శపించబడటానికి గల కారణం ఏంటి? అక్కడి కేర్‌టేకర్ నిజంగానే మనిషా లేక దెయ్యమా ? మరి ఆ భయంకరమైన గోస్ట్ మేన్షన్ నుండి ఆ వెబ్ టూన్ రచయిత ప్రాణాలతో బయటపడగలిగాడా? ఆ భవంతిలోని దెయ్యాల వెనుక ఉన్న అసలు రహస్య ఏమిటి అనేది ఈ హారర్ సిరీస్ చూసి తెలుసుకోవాల్సిందే.

ప్రైమ్ వీడియోలో స్ట్రీమింగ్

ప్రపంచవ్యాప్తంగా సంచలనం సృష్టించిన ఈ కొరియన్ మిస్టరీ హారర్ సిరీస్ ‘గోస్ట్ మేన్షన్’లో సుంగ్ జూన్, కిమ్ బో-రా, కిమ్ హాంగ్-పా తమ అద్భుతమైన నటనతో ఆకట్టుకున్నారు. హారర్ చిత్రాల స్పెషలిస్ట్ దర్శకుడు జో బార్న్-కూ ఈ సిరీస్‌కు దర్శకత్వం వహించారు. ఈ సిరీస్ ప్రస్తుతం అమెజాన్ ప్రైమ్ వీడియో (Amazon Prime Video) ఓటీటీ ప్లాట్‌ఫామ్‌లో అందుబాటులో ఉంది. కే-డ్రామాలకు ఇండియాలో ఉన్న క్రేజ్ దృష్ట్యా ఈ సిరీస్ సబ్‌టైటిల్స్‌తో పాటు తెలుగు డబ్బింగ్ ఆడియోలోనూ ప్రసారం అవుతోంది.

మహిళల ఇళ్లకు వచ్చే విచిత్రమైన బాక్సులు… కట్ చేస్తే వరుస హత్యలు… ప్రతి కేసు వెనుక ఒకే మైండ్