AC Service charges: వేసవిలో ఏసీల వినియోగం ఏ స్థాయిలో ఉంటుందో ప్రత్యేకంగా చెప్పాల్సిన పనిలేదు. ముఖ్యంగా ఏసీ మెకానిక్ లకు ఈ కాలంలో విపరీతమైన డిమాండ్ ఉంటుంది.

చాలా మంది తమ పాత ఏసీలను సర్వీసింగ్ చేయిస్తుండటమే ఇందుకు కారణంగా చెప్పవచ్చు. అయితే వినియోగదారుల అవసరాన్ని ఆసరాగా చేసుకొని కొందరు మెకానిక్ లు అధిక మెుత్తంలో సర్వీసింగ్ ఫీజు వసూలు చేస్తున్నట్లు తెలుస్తోంది. కాబట్టి 2026 లేటెస్ట్ గణాంకాల ప్రకారం.. ఏసీలో ఏ సమస్యకు ఎంత ఖర్చు అవుతుందో ఈ కథనంలో తెలుసుకునే ప్రయత్నం చేద్దాం.

ఏసీ క్లీనింగ్, జనరల్ సర్వీస్

ఏసీలో పేరుకున్న దుమ్ము, దూళిని వదిలించేందుకు చాలా మంది ఈ సర్వీసు చేయిస్తుంటారు. అయితే ఏసీ రకాన్ని బట్టి వీటికి ఛార్జ్ చేసే ధరలు మారుతూ ఉండొచ్చు. బేసిక్ సర్వీస్ విషయానికి వస్తే.. విండో ఏసీకి రూ.400-700 వసూలు చేస్తారు. స్ప్లిట్ ఏసీకి రూ.500-1000 వరకు ఉంటుంది. ఈ సర్వీసులో ఏసీ ఫిల్టర్లు మార్చడం, పైన పేర్కొన్న దుమ్మును తొలగించడం వంటివి చేస్తారు.

డీప్ క్లీనింగ్ లేదా జెట్ వాష్

ఏసీ సర్వీసింగ్ చేసి చాలా కాలం అయినప్పుడు ఏసీ లోపలి భాగాల్లోనూ పెద్ద ఎత్తున దుమ్ము పేరుకుపోతుంది. ఈ సందర్భంలో హై ప్రెజర్ వాటర్ జెట్‌తో లోపలి భాగాలను శుభ్రం చేయాల్సి రావొచ్చు. ఇందుకోసం రూ.900-1,500 వరకు మెకానిక్ లు వసూలు చేస్తారు.

ఫోమ్ క్లీనింగ్ (Foam Cleaning)

ఏసీ కాయిల్స్ లోపల ఏర్పడే మెుండి మురికి లేదా దుమ్మును వదిలంచడానికి ఫోమ్ క్లీనింగ్ ఆప్షన్ ను మెకానిక్స్ ఉపయోగిస్తుంటారు. ఈ ప్రత్యేక పద్ధతికి కోసం రూ.500 నుంచి రూ.800 అదనంగా వసూలు చేయవచ్చు.

గ్యాస్ రీఫిల్లింగ్

ఏసీ నుంచి కూలింగ్ రాకపోవడానికి ప్రధాన కారణంగా గ్యాస్ లీక్ గురించి చెబుతారు. దీనిని తిరిగి రీఫిల్లింగ్ చేయాల్సి ఉంటుంది. అయితే గ్యాస్ రకాన్ని బట్టి మెకానిక్ డబ్బు వసూలు చేయవచ్చు. పాత మోడల్ ఏసీల్లో R-22 గ్యాస్ ను ఫిల్ చేస్తారు. దీనికోసం రూ.1800-2500 వరకూ ఛార్జ్ చేస్తారు. కొత్త మోడల్ ఏసీలకు R-32 లేదా R-410A గ్యాస్ ను ఉపయోగిస్తారు. దీని కోసం రూ.2,500-3,800 వరకూ ఛార్జ్ చేస్తారు. ఒక వేళ గ్యాస్ ను కొద్దిగా మాత్రమే నింపాల్సి వస్తే.. రూ.1000-1500 లోపు ఇవ్వొచ్చు.

రిపేర్లు, స్పేర్ పార్ట్స్ ఖర్చు

ఏసీలోని ఏదైనా పార్ట్ పాడైతే దానికంటూ సెపరేట్ గా డబ్బులు చెల్లించాల్సి ఉంటుంది. కెపాసిటర్ కొత్తది వేయాల్సి వస్తే రూ.300-900, ఫ్యాన్ మోటార్ రూ.1500-3000, పీసీబీ రిపేర్ రూ.2000-5000 తీసుకుంటారు. ఒకవేళ ఏకంగా కంప్రెసర్ దెబ్బతింటే భారీ మెుత్తంలో చెల్లించాల్సి రావొచ్చు. కొత్త కంప్రెస్ రూ.5000-12000 వరకూ ఉంటుంది.