మన వ్యక్తిగత వివరాలను తెలుసుకుని, అత్యవసర పరిస్థితిలా చూపిస్తూ డబ్బు లేదా సమాచారాన్ని దోచుకునే ప్రయత్నాలు పెరుగుతున్నాయి. ఇలాంటి మోసాలను గుర్తించేందుకు కొన్ని జాగ్రత్తలు పాటించడం చాలా ముఖ్యం.

ఆ మెసేజ్‌లను నమ్మొద్దు:

మీ పేరు, సంస్థ పేరు లేదా మీకు సంబంధించిన సమాచారం ఉన్న మెసేజ్ నిజమైనదని భావించకూడదు. AIతో వ్యక్తిగత వివరాలతో కూడిన నకిలీ మెసేజ్‌లు సులభంగా తయారవుతాయి. పంపిన వ్యక్తిని, మెసేజ్‌లోని లింక్‌ను ముందుగా పరిశీలించాలి. తొందరగా స్పందించమని ఒత్తిడి చేసే మెసేజ్‌ల విషయంలో మరింత జాగ్రత్తగా ఉండాలి.

వాయిస్, వీడియో కాల్స్‌ను ధృవీకరించాలి:

ఏఐ వాయిస్ క్లోనింగ్‌తో మీకు తెలిసిన వ్యక్తి గొంతును కూడా అనుకరించవచ్చు. బంధువు లేదా స్నేహితుడి పేరుతో డబ్బు అడిగితే వెంటనే నమ్మకండి. మీకు మాత్రమే తెలిసిన ప్రశ్న అడగండి లేదా ఇప్పటికే సేవ్ చేసిన నంబర్‌కు తిరిగి కాల్ చేసి నిర్ధారించుకోండి. వీడియో కాల్ కనిపించినంత మాత్రాన అది నిజమైనదని భావించవద్దు.

OTP, పాస్‌వర్డ్‌లు చెప్పవద్దు:

OTP, PIN, పాస్‌వర్డ్, కార్డ్ వివరాలు వంటి సమాచారాన్ని ఎవరితోనూ పంచుకోకూడదు. ఖాతా మూసేస్తామని, డబ్బు పోతుందని భయపెట్టి వెంటనే చర్య తీసుకునేలా చేసే వ్యక్తులను నమ్మవద్దు. ఒక్క నిమిషం ఆలోచించి, అభ్యర్థన నిజమో కాదో స్వయంగా తనిఖీ చేయండి.

లింక్‌లు, పెట్టుబడి ఆఫర్లను పరిశీలించాలి:

ఏఐతో తయారైన ఫిషింగ్ లింక్‌లు, నకిలీ కంపెనీ వెబ్‌సైట్లు నిజమైనవిగా కనిపించవచ్చు. లింక్ అడ్రస్‌ను పరిశీలించకుండా క్లిక్ చేయొద్దు. స్పెల్లింగ్ మిస్టేక్స్, షార్ట్ లింక్‌లు లేదా అనుమానాస్పద లాగిన్ పేజీలను గమనించాలి. సోషల్ మీడియాలో కనిపించే AI వీడియోలు, ప్రముఖుల నకిలీ ప్రమోషన్లు చూసి పెట్టుబడులు పెట్టొద్దు. అనుమానం వస్తే స్పందించకుండా వదిలేచడమే ఉత్తమం. అప్పుడే మోసాల బారిన పడకుండా ఉండవచ్చు.