మనం భోజనం చేసే విధానంలో కొన్ని చిన్న మార్పులు చేసుకుంటే కడుపు నిండిన అనుభూతితో పాటు కేలరీలను కూడా నియంత్రించుకోవచ్చు. తాజాగా చెన్నైకి చెందిన ప్రముఖ ఫిట్‌నెస్ కోచ్ రాజ్ గణపత్ సోషల్ మీడియా ద్వారా సూచించిన ఈ నాలుగు సింపుల్ పద్ధతులు అందుకు ఉపయోగపడతాయి.

భోజనానికి ముందు నీళ్లు తాగడం:

చాలా ఆకలిగా ఉన్నప్పుడు భోజనం మొదలుపెట్టే ముందు ఒక గ్లాసు నీళ్లు తాగడం మంచిది. ఇది కడుపులో కొంత నిండిన భావన కలిగించి, వెంటనే ఎక్కువ ఆహారం తినకుండా నియంత్రించడంలో సహాయపడొచ్చు.

ప్లేట్‌ను బ్యాలెన్స్‌గా ఉంచాలి:

మీ ప్లేట్‌లో ప్రోటీన్, కూరగాయలు, అన్నం లేదా మన శరీరానికి శక్తిని అందించే ఒక ప్రధానమైన కార్బోహైడ్రేట్‌లను సమానంగా ఉండేలా చూసుకోవాలి. అలాగే నూనె, ఫ్రై, క్రీమ్ వంటి ఎక్కువ కేలరీలు ఉండే వంటకాలను తగ్గించడం మంచిది. ఇలా చేస్తే తక్కువ కేలరీలతో మంచి పోషకాలు అందుతాయి.

ముందుగా కూరగాయలు తినాలి:

భోజనం మొదట్లోనే కూరగాయలు తినడం మరో మంచి అలవాటు. కూరగాయల్లో ఉండే ఫైబర్ కడుపు నిండిన అనుభూతిని ఎక్కువసేపు ఉండేలా చేయడంలో సహాయపడుతుంది. ఆ తర్వాత అన్నం, ఇతర కార్బోహైడ్రేట్‌ ఆహారాలు, ప్రోటీన్ తీసుకోవచ్చు.

భోజనం 20 నిమిషాల పాటు తినాలి:

ఆహారాన్ని తొందరగా తినకుండా కనీసం 20 నిమిషాలు సమయం తీసుకోండి. నెమ్మదిగా తింటే శరీరానికి కడుపు నిండిందనే సంకేతాలను గుర్తించడానికి సమయం దొరుకుతుంది. దీంతో అవసరానికి మించి తినకుండా ఉండటం సులభమవుతుంది.