మీ దగ్గర ఉపయోగించని పాత ఆండ్రాయిడ్ ఫోన్ ఉంటే.. దానితోనే వైఫై సిగ్నల్‌ను మరో ప్రాంతానికి అందించేలా ట్రై చేయొచ్చు. రూపాయి ఖర్చు లేకుండా తాత్కాలికంగా వైఫై సమస్యను పరిష్కరించుకోవడానికి ఇది ఉపయోగపడుతుంది.

పాత ఫోన్‌తోనే వైఫై..

మీ వద్ద ఉన్న పాత ఆండ్రాయిడ్ ఫోన్‌ను ముందుగా మీ ఇంటి వైఫైకి కనెక్ట్ చేయాలి. ఆ తర్వాత ఫోన్‌లోని హాట్‌స్పాట్ ఫీచర్‌ను ఆన్ చేస్తే.. ఆ ఫోన్ మరో వైఫై సిగ్నల్‌లా పనిచేస్తుంది. రూటర్‌కు దూరంగా ఉన్న కొన్ని డివైజ్‌లను ఫోన్ హాట్‌స్పాట్‌కు కనెక్ట్ చేసుకోవచ్చు.

ముందు వైఫైకి కనెక్ట్ చేయాలి..

పాత ఆండ్రాయిడ్ ఫోన్‌లో సెట్టింగ్స్ ఓపెన్ చేసి వైఫై లేదా నెట్‌వర్క్ లేదా ఇంటర్నెట్ ఆప్షన్‌లోకి వెళ్లండి. మీ ఇంటి వైఫై నెట్‌వర్క్‌ను ఎంచుకుని పాస్‌వర్డ్‌ ఎంటర్ చేసి కనెక్ట్ చేయండి.

హాట్‌స్పాట్ ఆన్ చేయడం..

ఇప్పుడు సెట్టింగ్స్‌లో హాట్‌స్పాట్ లేదా టెథరింగ్/ వైఫై హాట్‌స్పాట్ ఆప్షన్‌ను ఓపెన్ చేయండి. అక్కడ హాట్‌స్పాట్‌ను ఆన్ చేయండి. అవసరమైతే నెట్‌వర్క్ పేరు, పాస్‌వర్డ్‌ను కూడా మార్చుకోవచ్చు. మీ ఫోన్‌లో 5GHz హాట్‌స్పాట్ ఆప్షన్ ఉంటే.. దగ్గరలోని డివైజ్‌లకు మెరుగైన స్పీడ్ కోసం దాన్ని ఎంచుకోవచ్చు.

ఫోన్ ఎక్కడ పెట్టాలి?

ఫోన్‌ను రూటర్‌కు, వైఫై సిగ్నల్ సరిగ్గా రాని ప్రాంతానికి మధ్యలో ఉంచడం మంచిది. ఇలా చేస్తే ఫోన్‌కు రూటర్ సిగ్నల్ బాగా అందుతుంది. అదే సమయంలో ఫోన్ హాట్‌స్పాట్ ద్వారా మరో ప్రాంతానికి కనెక్షన్ ఇవ్వగలదు. అలాగే హాట్‌స్పాట్‌ని నిరంతరం ఆన్‌లో ఉంచితే బ్యాటరీ త్వరగా అయిపోతుంది. కాబట్టి ఫోన్‌ను ఛార్జర్‌కు కనెక్ట్ చేసి ఉంచడం మంచిది.

పాత ఫోన్ సరిపోతుందా?

అయితే ఇలా చేయడం శాశ్వత పరిష్కారం కాదు. దీంతో ఇంటర్నెట్ స్పీడ్ కూడా పెరగదు. ప్రత్యేక వైఫై ఎక్స్‌టెండర్ లేదా మెష్ వైఫై సిస్టమ్ ఇచ్చే రేంజ్, పనితీరు పాత ఫోన్‌తో రాకపోవచ్చు. అయితే ఇంట్లో ఒక చిన్న గదిలో మాత్రమే వైఫై సిగ్నల్ సమస్య ఉంటే.. కొత్త డివైజ్ కొనకుండా పాత ఆండ్రాయిడ్ ఫోన్‌తో ఈ ట్రిక్‌ను ఒకసారి ట్రై చేయొచ్చు.